Mabalinmo a Takuaten ti Disenio iti Nakaparsuaan

NO AGPASPASIARTAYO iti away, madlaw ti kaaduan kadatayo ti kinapintas ti nakaparsuaan. Daytat’ mabalin a sangaraay a sabong, namaris a tumatayab, nangayed a kayo, wenno nakaskasdaaw a buya. Patien ti adu a tattao nga adda Namarsua wenno Nalaing a Diseniador iti dayta a kinapintas.

Mabalin a pagarupem a dagiti sientista laeng ti makatakuat iti narikut ken adda panggepna nga urnos iti nakaparsuaan. Ngem saanmo a kasapulan ti sopistikado a nasientipikuan nga alikamen tapno mailasinmo dagiti adda panggepda nga urnos iti nakaparsuaan. Kasapulam laeng ti napasnek a panagpaliiw, bassit nga imahinasion, ken panangapresiar iti kinapintas ken langa. Mabalin a nasken a kitaem met a naimbag dagiti pamiliar a banag a dimo unay inkankano.

Ti agkawkawikaw a padron ti maysa kadagiti kasisimplean a disenio. Mabalin a makita dayta kadagiti pamiliar ken inaramid ti tao a banag a kas iti nakunikon a tali wenno teribuson. Nupay kasta, mabalin a makitam dagiti nangayngayed nga amang nga agkawkawikaw a padron kadagiti shell iti baybay wenno bimmalisungsong a bunga dagiti saleng. Ket no kitaem a naimbag ti tengnga ti mirasol, agminar manen ti agkawkawikaw a padron. Dagiti saan unay a madlaw nga agkawkawikaw a padron ti mangarkos met iti tengnga ti rosas ken ti saput ti lawwalawwa.

Kitaem a naimbag ti saput ti lawwalawwa. Umuna, agaramid ti lawwalawwa iti pannakapundasion ti saputna, a kunam la no rayos ti pilid. Kalpasanna, mangrugin iti tengnga tapno pagkokonektarenna dagitoy babaen iti napigket a saput. Agrikusrikus a pagsisilpuen ti lawwalawwa agingga a mairingpas ti saputna. Dagitoy lumawlawa a nagtimbukel a saput ti mangbukel iti agkawkawikaw a padron.

Ti maysa pay a nakaskasdaaw a padron iti nakaparsuaan isu ti bassit a pannakamata ti maysa a banag. Dagiti pannakamata ket masarakan kadagiti di ipagpagarup a banag​—kadagiti dutdot ti tumatayab, payak ti kulibangbang, wenno uray iti siksik dagiti ikan. Sigun kadagiti sientista, makatulong dagiti pannakamata iti panaginnarem, mangallilaw iti mangraut, wenno mangiwaksi iti di matarigagayan nga atension. Nalabit ti paboreal ti kalatakan nga ehemplo dagiti pannakamata, ket ti panagaremna ti maysa kadagiti pagsidsiddaawan iti lubong ti nakaparsuaan. Nasdaaw unay ni Alejandro a Dakkel iti kinapintas ti paboreal ta uray la nga impapilitna a rumbeng a masalakniban dayta iti intero a pagturayanna.

Pamiliar met a padron ti nagtimbukel ken ti sukog ti bola. Apresiarentayo la ketdi ti bimmalitok a sukog ti lumlumnek nga init wenno ti kasla pirak a kabus. Kasla langa ti init ti adu a miembro iti pamilia ti daisy. Duyaw ti tengngana ken nadumaduma ti kolor dagiti petalona. Gapu iti bimmalitok a “mata” dagitoy a sabong a masarakan iti adu a lugar, agpiesta dagiti maallukoy a kulibangbang iti nektar a kas iti pannakaallukoy dagiti turista iti bimmalitok nga igid ti baybay.

Gapu ta ti nagtimbukel ti kalakaan a sukog para iti panangipakete, masansan a nadumaduma ti kadakkel, kabassit ken kolor dagiti prutas. Gapu kadagiti makaay-ayo a kolorda, maatrakar dagiti tumatayab isu a dagitoyto met ti agiwaras kadagiti bukel kalpasan a nakakaanda kadagita.

Siempre, dagiti agkawkawikaw a padron, pannakamata, nagtimbukel, ken sukog ti bola ti sumagmamano laeng a pagarigan ti adu a padron a masarakan iti nakaparsuaan. Nupay dadduma ti addaan kadagiti espesipiko a panggep, mabalin a pagarkos wenno panglimo ti dadduma. Aniaman ti kasasaad, takuatem ken tagiragsakem ida.

 [Ladawan iti panid 26]