Ammoyo Kadi?

(Masarakan dagiti sungbat daytoy a pannubok kadagiti naipaay a teksto ti Biblia, ket nayimprenta iti panid 22 ti kompleto a listaan dagiti sungbat. Para iti kanayonan nga impormasion, kitaenyo ti publikasion nga “Insight on the Scriptures,” nga impablaak dagiti Saksi ni Jehova.)

1. Iti tagtagainep ni Ari Nabucodonosor, ania ti imbaga ti anghel a maikabil iti nagdakkel a kayo a napukan, ken ania ti kaipapanan daytoy? (Daniel 4:16)

2. Ania ti inted ni Samson kadagiti Filisteo idi padaya ti kasarna nga idi agangay ket nangted kenkuana iti gundaway a mangpapatay iti 30 a Filisteo idiay Ascalon? (Uk-ukom 14:12-19)

3. Gapu ta saanen a mabaliwan ti linteg, siasino nga agturay iti Babilonia ti napilitan a mangipisok ken ni Daniel iti rukib dagiti leon? (Daniel 6:9)

4. Mano nga opisial ti korte ti imbaon ni Ari Asuero a mangipan ken ni Reyna Vasti iti saklangna tapno maipakita ti kinaimnasna? (Ester 1:10)

5. Sigun ken ni Santiago, ania ti dua a banag a makaay-ayo iti Dios iti “panagdayaw a nadalus ken awan tulawna”? (Santiago 1:27)

6. No saan a kayat ti maysa a Hebreo nga adipen ti mawayawayaan manipud iti apona, ania ti maikalikagum nga aramiden ti apona? (Exodo 21:6)

7. Siasino ti dua nga annak a lallaki ni Eliab manipud iti tribu ni Ruben a nangsuportar iti iyaalsa ni Kore a maibusor kada Moises ken Aaron? (Numeros 16:1-3)

8. Ania a panangbalbaliw iti kasasaad ti kudil ti naiparit kadagiti Israelita? (Levitico 19:28)

9. Siasino ti ina ni Ari Ezekias? (2 Ar-ari 18:2; 2 Cronicas 29:1)

10. Sigun ken ni Solomon, ania ti adda iti “tunggal aramid iti babaen ti langit”? (Eclesiastes 3:1)

11. Ania ti imbilin ni Jehova nga aramiden ni Jeremias idi pinuoran ni Ari Jehoiaquim ti lukot kalpasan a nangngegna ti sumagmamano a lunod a nailanad iti dayta? (Jeremias 36:27-32)

12. Siasino ti nagdinamag nga agpadpada a padi ken nalaing a managkopia? (Nehemias 8:9)

13. Apay a nagkitakit dagiti annak ni Jacob iti kiddaw ni amada nga agsublida idiay Egipto tapno gumatangda iti ad-adu a taraon kabayatan ti bisin? (Genesis 43:1-5)

14. Iti ania a pamay-an a ni Adan naaramid “iti langa ti Dios”? (Genesis 5:1)

15. Ania a nasanger a mula ti dinakamat ni Jesus maipapan iti apagkapullo a siiinget nga impaalagad dagiti Fariseo, a di nangikankano iti “nadagdagsen a bambanag iti Linteg”? (Mateo 23:23)

16. Kasano a sinubok ni Jeremias ti kinatulnog dagiti Recabita? (Jeremias 35:3-6)

17. Kasano a sinikapan ti sangapulo a kakabsat ni Jose ti amada a ni Jacob tapno pagarupenna a ni Jose ket pinatay ti maysa nga atap nga animal? (Genesis 37:31-33)

18. Nupay mabalin a dakdakkel ti dadduma, siasino ti kalatakan a higante a nadakamat iti Biblia? (1 Samuel 17:4)

19. Iti ania a bantay ti nakatayan ni Moises, kalpasan a nakitana ti Naikari a Daga? (Deuteronomio 32:49, 50)

20. Sumango ti tabernakulo ken dagiti naud-udi a templo iti ania a direksion? (Numeros 3:38)

 Dagiti Sungbat ti Pannubok

1. “Ti puso ti animal.” Tapno mapukaw ni Nabucodonosor ti kinasimbengna ken agtignay a kas iti maysa nga animal

2. Burburtia

3. Dario

4. Pito

5. ‘Panangtaripato kadagiti ulila ken iti balo a babbai kadagiti rigatda, ken panamagtalinaed ti maysa nga awanan mulit manipud iti lubong’

6. Ipidegna iti ridaw ken ‘tebbengan ti lapayagna babaen ti maysa a kulukol’

7. Datan ken Abiram

8. Tato

9. Abias, wenno Abi iti ababa

10. “Naituding a tiempo”

11. Tapno agsurat iti baro ken ad-adu pay

12. Esdras

13. Imbaga kadakuada ti agturay iti Egipto a dida mabalin ti agsubli malaksid no kaduada ti buridek a kabsatda a ni Benjamin

14. Adayo a nalalaing ngem iti amin a dadduma pay a parsua, ken addaan kadagiti nadiosan a kalidad ken pannakaawat iti umiso ken di umiso

15. Yerbabuena

16. Inikkanna ida iti arak ken imbilinna nga inumenda dayta a maibusor iti bilin ti amada

17. Insawsawda ti nagayad a kawes ni Jose iti dara ti kalding sada impakita dayta ken ni Jacob

18. Goliat

19. Nebo

20. Daya