Dagiti Numero ken Sika

ADDA aya nalmeng a kaipapanan dagiti numero? “Siempre adda!” mabalin a kunaen ti dadduma, ket dakamatenda ti makapainteres a pagarigan ti panangraut dagiti terorista idi Setiembre 11, 2001.

“Apaman a nadamagko,” kuna ti maysa a numerologist wenno mangad-adal iti kaipapanan dagiti numero, “nadlawko ti petsa: 9-11-2001.” Kaaduanna, maibilbilang ti numero 11 kas maysa kadagiti kangrunaan a numero a siputan dagiti numerologist. Isu a dagiti mamatpati nga adda nalmeng a kaipapanan dagiti numero, nagurnongda iti listaan ti nadumaduma a banag a mainaig iti panangraut dagiti terorista a mangitudtudo iti 11 kas kangrunaan a numero a masapul a siputan. Daytoy ket paset laeng ti nasarakanda:

■ Napasamak ti trahedia iti petsa a 9/11. . . . 9 + 1 + 1 = 11.

■ Ti Setiembre 11 ti maika-254 nga aldaw ti tawen. . . . 2 + 5 + 4 = 11.

■ Ti eroplano a nangdungpar iti makin-amianan a tower ket Flight 11.

■ Adda 92 a nakalugan a tattao iti dayta nga eroplano. . . . 9 + 2 = 11.

■ Adda 65 a pasahero ti eroplano a nangdungpar iti makin-abagatan a tower. . . . 6 + 5 = 11.

■ Kaasping ti numero 11 ti Twin Towers.

■ Iti Ingles, ti sasao a “New York City” ket addaan iti 11 a letra.

Ti numerology wenno inaanito a panangadal iti kaipapanan dagiti numero​—a mangted iti naisangsangayan a kaipapanan dagiti numero, kombinasionda, ken pakadagupanda​—ket nasaknapen a maar-aramid idiay Africa, Asia, ken iti America. Apay a makaallukoy? Sigun iti maysa a Web site, ti panangtarus iti kaipapanan dagiti letra ti alpabeto a nausar kadagiti nagan​—a maysa nga aspeto ti numerology​—ket “makaipaay iti umiso nga impormasion maipapan iti personalidad, ugali, kababalin ken pagkapuyan ti maysa a tao.” Sigun iti daytoy a gubuayan ti impormasion, ti panangadal iti “petsa iti pannakaipasngaytayo ipalgakna ti pagtungpalan ti biagtayo, agraman dagiti rag-o ken pakasuotan.”

Agpayso kadi dagitoy a panangipapan? Wenno adda kadi nalmeng a peggad a nainaig iti datdatlag a panangadal kadagiti numero?