Ti Lawwalawwa nga Agpammarang a Kuton

ADDA bassit a lawwalawwa nga agkarayam a sumrek iti bunton sa agpammarang ken makipagnaed kadagiti kabusorna. Tapno di madlaw dagiti kuton, balbaliwanna ti itsura ken ugalina. Napateg daytoy ta no mariribuk dagiti kuton, agbalinda a narungsot. Tangay naiduma iti kuton ti bagi ti lawwalawwa, adda bassit parikut iti daytoy.

Innem ti saka ti kuton ken dua ti rungona, ngem walo ti saka ti lawwalawwa ken awan rungona. Kasano ngarud nga agpammarang ti lawwalawwa kas kuton? Bueno, innem a saka ti usarenna nga agkarayam idiay bunton dagiti kuton, ken ipangatona ti dua pay a sakana tapno agparang a kasla rungona dagitoy.

Maysa pay, paggarawgarawen ti lawwalawwa ti dua a peke a rungona tapno kasla agpayso dagitoy. Nagsayaat ti pananggarawna kadagitoy ta mapagkamalianda a kasla rungo ti kuton. Matulad pay daytoy nakalalaing nga agpammarang ti nakuti ken agsikkosikko a pannagna dagiti kuton!

Iti aniaman a pamay-an, naan-anay a padasen ti lawwalawwa a tuladen ti kuton, ta ti kinatalgedna ket agpannuray iti pakabigbiganna kas maysa a residente iti bunton dagiti kuton. Iti bunton dagiti kuton, masalakniban ti lawwalawwa kadagiti kadawyan a kabusorna, a pakairamanan ti akut-akot. Saan met a kanen dagiti kumakanta a billit, a mangibilang iti lawwalawwa a naimas a taraon. Maallilaw pay ketdi dagiti lawwalawwa nga agsapsapul iti dadduma a lawwalawwa gapu iti “rungo” ti agtutulad.

Ngem no rauten ti billit, banias, wenno dadduma pay a parsua ti komunidad dagiti kuton, dagus nga agsubli ti lawwalawwa iti agpayso a kasasaadna ket aglibas. Natadtadem ti panagkita dagiti lawwalawwa ngem kadagiti kuton, ken makalagtoda idinto ta di makalagto dagiti kuton, isu a nalaklakada nga aglibas.

No aldaw, ikagumaan ti lawwalawwa ti di agpadlaw iti uneg ti bunton dagiti kuton. Ngem no rabii, aktibo dayta ket agtiliw kadagiti kuton iti mismo a bunton a pagnanaedanna! No maduktalan ti aramid ti lawwalawwa, usarenna ti walo a sakana ket sipapartak nga aglibas.

Ti maysa a kabaian a lawwalawwa ket mabalin a kumadua iti kalakian iti bunton dagiti kuton. Dina laeng paneknekan ti kinamatalekna iti asawana no di ket ipakitana pay ti kinalaingna. Idiay bunton dagiti kuton, agaramid iti adu a makasalaknib a saput, a mangsalaknib saan laeng nga iti asawana no di ket uray pay kadagiti itlogna.

Awan duadua a nakaad-adu pay ti masursuro maipapan iti daytoy a lawwalawwa agraman iti kaaduan a dadduma pay a kita ti animal ditoy daga. Iti masakbayan, anian a nagsayaatto nga adalen ti ad-adu pay maipapan kadagitoy makapaamanga a parsua ti Dios!

[Ladawan iti panid 31]

Lawwalawwa iti nagbaetan ti dua a kuton

[Credit Line]

Bill Beatty