Ti Panangmatmat ti Biblia

Rumbeng Aya a Namnamaen Dagiti Kristiano ti Pannalaknib ti Dios?

Masansan a dakamaten ti Biblia ti abilidad ti Dios a mangsalaknib kadagiti agdaydayaw kenkuana manipud iti pannakadangran. Kinuna ni Ari David: “Alawennak, O Jehova, kadagiti dakes a tattao; saluadannak koma uray pay iti tao nga addaan ar-aramid a kinaranggas.” (Salmo 140:1) Iti kaaldawantayo, adu kadagiti agdaydayaw iti Dios a nakapasar iti kinaranggas, krimen, wenno natural a didigra dandani dida nalasatan ti ipapatay wenno pannakadangran. Pampanunoten ti dadduma no simimilagro a sinalakniban ida ti Dios kadagidi a kasasaad, nangruna ta adda dadduma a situasion a di nakalasat dagiti managbuteng Dios a tattao no di ket napasaranda dagiti nakas-ang a trahedia ken naranggas pay ketdi nga ipapatay.

SALAKNIBAN kadi ni Jehova a Dios ti sumagmamano a tattao idinto ta dina aramiden dayta iti sabsabali? Rumbeng aya a namnamaentayo ti namilagruan a pannakaispaltayo manipud kadagiti kinaranggas ken didigra iti kaaldawantayo?

Namilagruan a Pannalaknib Kadagiti Salaysay ti Biblia

Adu a salaysay ti dakamaten ti Biblia maipapan iti namilagruan nga ibaballaet ti Dios maipuon kadagiti agdaydayaw kenkuana. (Isaias 38:1-8; Aramid 12:1-11; 16:25, 26) Salaysayen met dagiti Kasuratan no kasano a di naispal dagiti adipen ti Dios iti dadduma a kalamidad. (1 Ar-ari 21:1-16; Aramid 12:1, 2; Hebreo 11:35-38) Nalawag ngarud a mabalin nga ikeddeng ni Jehova ti mangsalaknib gapu iti partikular a panggep no kayatna. Isu a no di naispal ti dadduma a Kristiano kadagiti pakasuotan, dida koma ipapan a binaybay-an ida ti Dios. Masapul nga akseptarentayo ti kinapudno a mapasamak ti dakes a bambanag, uray kadagiti matalek nga adipen ni Jehova. Apay?

No Apay a Mapasamak ti Dakes a Bambanag Kadagiti Matalek nga Adipen ti Dios

Ti maysa a rason ket natawidtayo amin ti basol ken kinaimperpekto kada Adan ken Eva. Manamnama ngarud a mapasarantayo ti ut-ot, panagsagaba, ken ipapatay. (Roma 5:12; 6:23) Ti maysa pay a rason ket agbibiagtayo iti maudi nga al-aldaw.  Deskribiren ti Biblia dagiti tattao iti kaaldawantayo kas “awanan nainkasigudan a panagayat, saan a sidadaan iti aniaman a tulagan, manangparpardaya, awanan panagteppel, narungsot, awanan panagayat iti kinaimbag.” (2 Timoteo 3:1-5) Ti panagraira ti panangrames, panagkidnap, panangpapatay, ken dadduma pay a brutal a krimen ti mangpaneknek iti daytoy.

Adu a matalek nga adipen ti Dios ti agnanaed ken agtartrabaho iti tengnga dagiti naranggas a tattao ket no dadduma, biktimaenda ida. Mabalin a mapasarantayo ti mamagpeggad-biag a kasasaad gapu laeng ta addatayo iti di umiso a lugar iti di umiso a panawen. Kasta met a mapasarantayo ti kinaagpayso ti imbaga ni Solomon a “ti tiempo ken ti di mapakpakadaan a pasamak mapagteng kadakuada amin.”​—Eclesiastes 9:11.

Kanayonanna, imbaga ni apostol Pablo a dagiti Kristiano ket agbalin a puntiria ti pannakaidadanes gapu iti panagdayawda iti Dios. Kinunana: “Kinapudnona, amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:12) Kadagiti napalabas a tawen, napaneknekan a pudno daytoy iti adu a pagilian.

No kasta, di maipuera dagiti managbuteng Dios a tattao kadagiti epekto ti kinaranggas, krimen, natural a didigra, wenno ipapatay gapu iti aksidente. Ikalkalintegan ni Satanas nga al-aladan ni Jehova ti ilina tapno dida maan-ano. (Job 1:9, 10) Saan a pudno dayta. Nupay kasta, masiguradotayo nga uray no di mangipaay ni Jehova iti namilagruan a pannakaispal iti maysa a kasasaad, talaga a salsalaknibanna ti ilina.

No Kasano a Salsalakniban ni Jehova ti Ilina iti Kaaldawantayo

Babaen ti Saona, mangipapaay ni Jehova iti nadiosan a panangiwanwan a mangsalsalaknib iti ilina. Ti espiritualidad ken pannakaammo iti Biblia ti mangisuro tapno agbalintay a manakem ken maaddaan iti nalimbong a panunot, a makatulong kadatayo a mangliklik kadagiti kamali tapno makaaramidtayo kadagiti nainsiriban a desision. (Salmo 38:4; Proverbio 3:21; 22:3) Kas pagarigan, naispal dagiti Kristiano iti adu a kalamidad gapu ta impangagda ti pammagbaga ti Biblia maipapan iti seksual a moralidad, kinaagum, pungtot, ken kinaranggas. Kasta met a gapu ta ditay makisinninged kadagiti dakes a tattao, posible nga awantayo iti lugar a mabalin a pakapasamakan ti kalamidad​—iti di umiso a lugar iti di umiso a panawen. (Salmo 26:4, 5; Proverbio 4:14) Tagtagiragsaken dagidiay mangyap-aplikar kadagiti prinsipio ti Biblia ti nasaysayaat a panagbiag isu a masansan a nasalsalun-at ti panunot ken bagida.

Ti kangrunaan a makaliwliwa ket ti pannakaammo a nupay ipalpalubos ti Dios a mapasamak ti dakes a bambanag, ipapaayanna dagiti agdaydayaw kenkuana iti kasapulanda a bileg tapno maibturanda dayta. Ipanamnama kadatayo ni apostol Pablo: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” (1 Corinto 10:13) Ikari met ti Biblia a “ti pannakabalin a nalablabes ngem ti gagangay” ti tumulong kadatayo a mangibtur kadagiti kalamidad.​—2 Corinto 4:7.

Agtignay ti Dios Maitunos iti Pagayatanna

Rumbeng aya a namnamaen dagiti Kristiano a simimilagro nga ispalen ida ti Dios iti amin nga umad-adani a didigra? Saan a suportaran ti Biblia ti kasta a namnama.

Siempre, mabalin nga ikeddeng ni Jehova a Dios a direkta a bumallaet maipuon iti siasinoman kadagiti adipenna. Ket no patien ti siasinoman a ti nadiosan nga ibaballaet ti makagapu a nalasatanna ti pannakadangran, saan koma a mababalaw. Ngem no ikeddeng ni Jehova ti di bumallaet, saan koma a maipagarup a pagilasinan dayta iti dina pananganamong.

Sapay koma ta agtalektayo nga aniaman ti mapasarantayo a pakasuotan wenno kasasaad, mangipaayto ni Jehova iti nadiosan a pannalaknib kadagiti matalek nga adipenna, babaen man ti panangikkatna iti kasasaad, panangipaayna kadatayo iti bileg a mangibtur iti dayta, wenno, no bilang mataytayo ita, pagungarennatayto iti biag nga agnanayon iti baro a lubongna.​—Salmo 37:10, 11, 29; Juan 5:28, 29.