Agimdeng ken Agsursurokayo

“MAGUN-ODANTAYO ti 85 a porsiento nga ammotayo babaen ti panagimdengtayo,” kuna ti maysa a damag iti periodiko a Toronto Star. Nupay kaaduan iti panawentayo ket busbosentayo iti panagimdeng, “masinga wenno makumikom wenno makalipattayo iti 75 a porsiento dayta a panawen.” Ipaganetget dagitoy mamagpanunot nga estadistika a rumbeng a parang-ayentayo ti panagimdengtayo.

“Ti nakapuy a panagimdeng ti pakaigapuan ti adu a parikut iti kagimongan,” sigun iti damag. Ti espesialista iti itataud dagiti depekto iti panagsao ken eksperto iti komunikasion a ni Rebecca Shafir patienna a masansan a daytoy ti pakaigapuan dagiti panagpakamatay, kinaranggas iti eskuelaan, panagsisina iti pamilia, ken panagdroga.

Mapaliiw dagiti sientista iti tay-ak ti kagimongan a nadumaduma ti estilo ti panagimdeng dagiti tattao. Dadduma a tattao ket interesado nga agimdeng iti kabibiag ti dadduma a tattao ken kaykayatda a denggen ti amin a makapainteres a detalye maipapan iti maysa nga estoria. Dadduma ket interesado kadagiti pasamak ket kayatda a direkta ti panagsao ti ages-estoria. “Isu a no agtutungtong ti tattao nga interesado iti kabibiag ti dadduma a tattao ken dagiti interesado kadagiti pasamak, mabalin a dida agkikinnaawatan,” kuna ti Star.

Adda ngarud naimbag a rason nga impaganetget ni Jesus a masapul a “siputanyo no kasano ti panagimdengyo.” (Lucas 8:18) Ti naimbag a panagimdeng ket pakakitaan ti nasayaat a kababalin. Napateg dayta a paset ti epektibo a saritaan. Dagiti praktikal a singasing no kasano ti agimdeng kabayatan ti saritaan ramanenna ti panangliklik kadagiti pakasingaan, medio panagsadag iti paabante, ken masansan nga isusungbat a napakuyogan ti panangperreng ken panangtung-ed iti kasarsaritam. Yantangay kaaduan kadagiti masursurotayo ket agpannuray iti epektibo a panagimdeng, nasken nga itultuloytayo amin a siputan dayta.