PARA ITI NAGANNAK
6: Disiplina
TI KAIPAPANANNA
Ti disiplina ket mabalin a kaipapananna ti panangiturong wenno panangisuro. No dadduma, ramanenna ti panangilinteg iti di umiso nga inaramid ti ubing. Ngem masansan a karaman iti dayta ti panangisuro kadagiti makatulong a prinsipio tapno makaaramid ti ubing kadagiti nasayaat a desision.
NO APAY A NAPATEG
Kadagiti napalabas a dekada, saan unayen a disdisiplinaen ti dadduma a nagannak dagiti annakda ta mabutengda a mapukaw ti kompiansada. Ngem dagiti masirib a nagannak mangipaayda kadagiti nainkalintegan a pagannurotan ken sanayenda dagiti annakda a mangsurot kadagita.
“Masapul nga ammo dagiti annak no ania ti aramiden ken dida aramiden tapno agbalinda a responsable nga adulto. No saan a madisiplina dagiti ubbing, kasda la bangka nga awan timonna—a mayaw-awan inton agangay wenno mapattog pay ketdi.”—Pamela.
TI MABALINYO NGA ARAMIDEN
Tungpalenyo ti ibagayo. No saan a tungpalen ti anakyo ti pagannurotanyo, disiplinaenyo; ngem no agtulnog, komendaranyo.
“Masansan a komendarak dagiti annakko ta natulnogda uray no adu a tattao ti nasukir itan. Nalaklakada nga awaten ti kasapulan a disiplina no makomendaranda.”—Christine.
PRINSIPIO TI BIBLIA: “Aniaman nga imulmula ti maysa a tao, daytanto met ti apitenna.”—Galacia 6:7.
Agbalinkayo a nainkalintegan. Ibagayyo ti disiplina iti edad ken abilidad ti anakyo. Masansan nga epektibo ti disiplina no konektado dayta iti kamalina. Kas pagarigan, no di umiso ti panangusarna iti selponna, mabalin nga alaenyo wenno limitaranyo pay laeng ti panangusarna iti dayta. Ngem saankayo koma nga agunget gapu laeng kadagiti babassit a banag a kasuronyo.
“Ikagkagumaak nga ammuen no inggagara ti anakko ti nagsukir wenno nagkamali laeng. Agduma ti inggagara a panagsukir a masapul a disiplinaen, ken ti pagkapuyan a masapul nga ilinteg.”—Wendell.
PRINSIPIO TI BIBLIA: “Diyo rurruroden dagiti annakyo, tapno saanda a maupay.”—Colosas 3:21; footnote.
Agbalinkayo a naayat. Nalaklaka nga awaten ken tungpalen dagiti annak ti disiplina no ammoda a ti motibo ti nagannak a mangdisiplina ket ayat.
“No agkamali ti anakmi, ipaspasiguradomi a maipagpannakkelmi dagiti nasayaat a desisionna iti napalabas. Ilawlawagmi a saan a madadael ti reputasionna gapu iti kamalina no la ket ta ilintegna dayta, ken ipanamnamami a tulonganmi.”—Daniel.
PRINSIPIO TI BIBLIA: “Ti ayat ket naanus ken naimbag.”—1 Corinto 13:4.
Baka Kayatmo Met ti
TI PAGWANAWANAN
Kasanom a Disiplinaen Dagiti Annakmo?
Deskribiren ti Biblia ti 3 a kangrunaan a pamay-an ti epektibo a disiplina.
AGRIINGKAYO!
Apay a Manmanon ti Disiplinado?
Adda pay la kadi epekto ti kampania ti panagkompiansa iti bagi a nangrugi idi dekada ‘60 iti panangpadakkel iti annak ita?
TI PAGWANAWANAN
Panangdisiplina Kadagiti Annak
Saan a nasayaat ti epektona iti pamiliam no agsubangkayo maipapan iti panangpadakkel iti annakyo. Ammuem no ania ti maaramidan ti agassawa.
AGRIINGKAYO!
No Kasano a Disiplinaen ti Tin-edyermo
Ti disiplina kaipapananna ti panangisuro. Makatulong kenka dagiti prinsipio ti Biblia a mangisuro iti anakmo no kasano ti agtulnog imbes nga agsukir.
