“Aggaggaget koma nga agtrabaho, nga usarenna dagiti imana nga agaramid iti nasayaat, tapno adda mairanudna iti asinoman nga agkasapulan.”​—EFESO 4:28.

Kayat ti Namarsua kadatayo a positibo ti panangmatmattayo iti trabaho. Apay? Naragsak ti tao a nagaget nga agtrabaho ta maipaayna ti kasapulanna ken ti pamiliana. Mabalin a makatulong pay iti agkasapulan. Maragsakan pay ti amona kenkuana. Isu a ti nasayaat a trabahador ket dakdakkel ti posibilidadna a saan a maikkat iti trabaho. Umiso ti panangdeskribir ti Kasuratan kadagiti gunggona ti kinagaget kas “sagut ti Dios.”​—Eclesiastes 3:13.

“Agtalekkami a nadalus ti konsiensiami, ken kayatmi ti agbiag a mapagtalkan iti amin a banag.”​—HEBREO 13:18.

No napudnotayo, adda respetotayo iti bagitayo, natalna ti panunottayo, ken naimas ti turogtayo iti rabii. Kanayonanna, agtalek ken respetuendatayo ti sabsabali. Dagita a nasayaat a bambanag ket saan a marikna dagiti saan a napudno a tattao. Maysa pay, makonkonsiensiada ken madanaganda a baka dumtengto ti tiempo a matiliwanda.

“Iti panagbiagyo, saanyo nga ayaten ti kuarta, no di ket kontentokayo koman kadagiti agdama a bambanag.”​—HEBREO 13:5.

Kasapulantayo ti kuarta para iti makan ken dadduma pay a kasapulantayo. Ngem nakadeldelikado ‘ti ayat iti kuarta’ ta tignayenna ti maysa a tao a mangusar iti ad-adu a tiempo ken pigsana nga agbirok iti ad-adu a kuarta. Gapu iti dayta, mabalin a maapektaran ti relasionna iti asawana, maawan ti tiempona kadagiti annakna, ken madadael pay ti salun-atna. (1 Timoteo 6:9, 10) Maysa pay, mabalin a masulisog nga agkusit. Kuna ti maysa a masirib a lalaki: “Adunto ti bendision ti matalek a tao, ngem agbasolto daydiay agganat a bumaknang.”​—Proverbio 28:20.

“Salaknibam ti praktikal a sirib ken abilidad nga agpanunot.”​—PROVERBIO 3:21.

Tulongannatayo ti nasayaat nga edukasion nga agbalin a responsable nga adulto ken nagannak. Ngem saan nga umanay ti nasayaat a sekular nga edukasion tapno maaddaantayo iti manayon a kinatalged wenno kinaragsak. Tapno naballigitayo iti amin nga aspeto ti biagtayo, kasapulantayo ti edukasion nga ipapaay ti Dios. Kuna ti Kasuratan maipapan iti tao a dumdumngeg iti Dios: “Agballigi ti amin nga aramidenna.”​—Salmo 1:1-3.