Ti dadduma nga agkunkuna a patienda ti salaysay ti Biblia maipapan iti panamarsua ibagbagada a ti daga ken ti amin nga adda iti dayta ket naparsua iti literal nga innem nga aldaw, sumagmamano a ribu a tawen laeng ti napalabas. Kayat met ti dadduma nga ateista a patiem nga awan ti Dios, a ti Biblia ket sarsarita laeng, ken naiparna laeng ti kaadda ti biag.

Agpada a patien ti kaaduan a tattao dagitoy a nagduma a kapanunotan. Ti panangbasbasam iti daytoy a broshur ipakitana a mabalin a maysaka kadakuada. Nalabit mamatika iti Dios ken raraemem ti Biblia. Ngem mabalin a mamatika met iti kapanunotan dagiti eksperto ken napigsa ti impluensiana a sientista a mangibagbaga a saan a naparsua ti biag. No maysaka a nagannak, nalabit pampanunotem no ania ti isungbatmo iti anakmo no agsaludsod maipapan iti ebolusion ken panamarsua.

Saan a babalawen daytoy a broshur ti panangmatmat dagiti tattao a nagduduma ti patpatienda maipapan iti panamarsua wenno dagidiay saan a mamati nga adda Dios. Imbes ketdi, tulongannaka a mangusig manen iti nakaibatayan ti dadduma kadagiti patpatiem. Ilawlawagna ti salaysay ti Biblia maipapan iti panamarsua a mabalin a saanmo pay nga ammo. Ken ipaganetgetna a napateg no ania ti patpatiem mainaig iti panangrugi ti biag.

Mamatika kadi kadagidiay agkunkuna nga awan ti masirib a Namarsua ken saan a mapagpannurayan ti Biblia? Wenno sukimatem no ania a talaga ti isursuro ti Biblia? Ania dagiti sursuro a rumbeng a pagtalkam ken patiem: ti kadi isursuro ti Biblia wenno dagiti ebolusionista? (Hebreo 11:1) Apay a dimo sukimaten no ania ti umiso?