LEKSION 17
Ania Dagiti Kualidad ni Jesus?
No adalentayo dagiti imbaga ken inaramid ni Jesus idi adda ditoy daga, madiskobretayo dagiti kualidadna a mangpadekket kadatayo kenkuana ken iti Amana, ni Jehova. Ania ti dadduma kadagitoy a nagsayaat a kualidadna? Ken kasano a matuladtayo ni Jesus iti biagtayo?
1. Kadagiti ania a pamay-an a ni Jesus ket kas iti Amana?
Idiay langit, binilion a tawen a nakitkita ni Jesus ti inar-aramid ti naayat nga Amana ken nagsursuro kenkuana. Kas resultana, natuladna ti panagpampanunot, rikrikna, ken ar-aramid ti Amana. (Basaen ti Juan 5:19.) Ti agpayso, natulad a naimbag ni Jesus dagiti kualidad ni Amana isu a naibagana: “Ti nakakita kaniak nakitana metten ti Ama.” (Juan 14:9) No maammuam dagiti kualidad ni Jesus, mas maam-ammom ni Jehova. Kas pagarigan, ti panangipateg ni Jesus kadagiti tattao ipakitana nga ipatpategnaka unay ni Jehova.
2. Kasano nga impakita ni Jesus nga ay-ayatenna ni Jehova?
Kinuna ni Jesus: “Tapno maammuan ti lubong nga ay-ayatek ti Ama, tungtungpalek ti imbilin kaniak ti Ama.” (Juan 14:31) Idi adda ni Jesus ditoy daga, impakitana nga ay-ayatenna unay ti Amana babaen ti panagtulnogna kenkuana uray narigat koma nga aramiden dayta. Kaykayat met ni Jesus nga iyes-estoria ti maipapan iti Amana ken tulongan ti dadduma a makigayyem ken Jehova.—Juan 14:23.
3. Kasano nga impakita ni Jesus nga ay-ayatenna dagiti tattao?
Ibagbaga ti Biblia a “nangnangruna a pakaragsakan [ni Jesus] dagiti annak ti tattao.” (Proverbio 8:31) Impakitana dayta babaen ti panangpabilegna kadagiti tattao ken panagsakripisiona a tumulong kadakuada. Nagaramid kadagiti milagro a nangipakita saan laeng a ti pannakabalinna no di ket uray pay ti kinaasina. (Marcos 1:40-42) Naasi ti panangtratona iti amin ken saan a nangidumduma. Dagiti sasaona ket nangpagin-awa ken nangted iti namnama kadagiti nasayaat-panagpuspusona a dimngeg kenkuana. Nakasagana ni Jesus nga agrigat ken matay gapu iti ayatna iti amin a tattao. Ngem nangnangruna nga ay-ayatenna dagiti mangsursurot kadagiti pannursurona.—Basaen ti Juan 15:13, 14.
AMMUEM TI AD-ADU PAY
Adalem ti ad-adu pay maipapan kadagiti kualidad ni Jesus, ken panunotem no kasanom a matulad ti ayat ken kinaparaburna.
4. Ay-ayaten ni Jesus ti Amana
Isuro kadatayo dagiti inaramid ni Jesus no kasanotayo a maipakita ti ayattayo iti Dios. Basaen ti Lucas 6:12 ken Juan 15:10; 17:26. Kalpasan a mabasa ti tunggal teksto, pagsaritaan daytoy a saludsod:
-
Kasanotayo a matulad ni Jesus ken maipakita ti ayattayo ken Jehova?
Ay-ayaten ni Jesus ti nailangitan nga Amana ken kanayon a nakisarita kenkuana iti kararag
5. Pampanunoten ni Jesus ti kasapulan dagiti tattao
Mas pinanunot ni Jesus ti kasapulan ti dadduma ngem iti kasapulanna. Uray nabannog, inusarna ti oras ken pigsana a tumulong kadagiti tattao. Basaen ti Marcos 6:30-44, sa pagsaritaan dagitoy a saludsod:
-
Iti daytoy a teksto, kasano nga impakita ni Jesus a pampanunotenna ti kasapulan ti dadduma?—Kitaen ti bersikulo 31, 34, 41, ken 42.
-
Apay a tinulongan ni Jesus dagiti tattao?—Kitaen ti bersikulo 34.
-
Gapu ta tultuladen ni Jesus dagiti kualidad ni Jehova, ania ti isuro daytoy kenka maipapan ken Jehova?
-
Kasanotayo a matulad ti panangipateg ni Jesus iti dadduma?
6. Naparabur ni Jesus
Naparabur ni Jesus uray saan a nabaknang, ken ibagbagana met kadatayo nga agbalintayo a naparabur. Basaen ti Aramid 20:35, sa pagsaritaan daytoy a saludsod:
-
Ania ti imbaga ni Jesus nga aramidentayo tapno agbalintayo a naragsak?
I-play ti VIDEO, sa pagsaritaan ti sumaruno a saludsod.
-
Ania dagiti pamay-an a makaitedtayo uray saantayo a nabaknang?
Ammom kadi?
Isursuro ti Biblia nga agkararagtayo ken Jehova iti nagan ni Jesus. (Basaen ti Juan 16:23, 24.) No kasta ti panagkararagtayo, ipakpakitatayo a napateg kadatayo ti inaramid ni Jesus tapno agbalintayo a gayyem ni Jehova.
KUNA TI DADDUMA: “Awan bibiang ti Dios iti panagrigrigattayo.”
-
Gapu ta ipakpakita ni Jesus dagiti kualidad ti Amana, kasano nga ipakita dagita nga ipatpategnatayo ni Jehova?
SUMARIO
Ay-ayaten ni Jesus ni Jehova, ken ay-ayatenna dagiti tattao. Gapu ta ni Jesus ket kas iti Amana, no mas maam-ammom ni Jesus, mas maam-ammom met ni Jehova.
Rebiu
-
Kasanotayo a maipakita nga ay-ayatentayo ni Jehova, kas iti inaramid ni Jesus?
-
Kasanotayo a maipakita nga ay-ayatentayo dagiti tattao, kas iti inaramid ni Jesus?
-
Ania ti magusgustuam unay a kualidad ni Jesus?
AGDISKOBREKA PAY
Kitaem ti dadduma a kualidad ni Jesus a mabalintayo a tuladen.
“Tapno Matuladmo ni Jesus, Agbalin a . . .” (Ni Jesus—Ti Dalan, ti Kinapudno, ti Biag, panid 317)
Adalem ti napateg a papel ni Jesus iti kararag.
“Apay nga Agkararagtayo iti Nagan ni Jesus?” (Ti Pagwanawanan, Pebrero 1, 2008)
Ibaga kadi ti Biblia ti itsura ni Jesus?
Ania ti masursurotayo iti panangtrato ni Jesus kadagiti babbai?
“Panagraem ken Dignidad iti Panangaywan ti Dios” (Ti Pagwanawanan, Septiembre 1, 2012)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
