LEKSION 05
Ti Biblia ket Mensahe ti Dios Kadatayo
Inikkannatayo ni Jehova iti espesial a regalo—ti Biblia a naglaon iti 66 a babassit a libro. Ngem baka maisaludsodmo: ‘Sadino ti naggapuan ti Biblia? Asino ti autorna?’ Tapno masungbatan dagitoy a saludsod, pagsaritaanta no kasano a nakadanon kadatayo ti mensahe ti Dios iti Biblia.
1. No tao ti nangisurat iti Biblia, kasano a ti Dios ti Autorna?
Ti Biblia ket insurat ti agarup 40 a lallaki iti sumurok-kumurang a 1,600 a tawen, manipud 1513 B.C.E. agingga iti agarup 98 C.E. Nagduduma ti nagsurat. Adda dagiti pastor, mangngalap, ken ari. Ngem saan nga agkikinnontra dagiti linaon ti Biblia. Apay? Gapu ta ti Dios ti Autor ti Biblia. (Basaen ti 1 Tesalonica 2:13.) Saan a dagiti bukodda a kapanunotan ti insurat dagiti nangisurat iti Biblia. Imbes ketdi, ‘naggapu iti Dios ti imbagada bayat a tigtignayen ida ti nasantuan nga espiritu.’ a (2 Pedro 1:21) Inusar ti Dios ti nasantuan nga espirituna a mangiwanwan, wenno mangidalan, kadagiti tattao a mangisurat iti pampanunotna.—2 Timoteo 3:16.
2. Siasino ti makabasa iti Biblia?
Mabalin a matulongan ti naimbag a damag a mabasa iti Biblia dagiti tattao iti “tunggal nasion ken tribu ken lengguahe ken ili.” (Basaen ti Apocalipsis 14:6.) Sinigurado ti Dios a mabasa ti Biblia iti ad-adu a lengguahe ngem iti aniaman a libro iti historia. Mabasan ti dandani amin a tattao ti Biblia. Agpayso dayta sadinoman ti paggigiananda wenno aniaman ti lengguaheda.
3. Kasano a prinotektaran ni Jehova ti Biblia tapno agtalinaed dayta?
Naisurat ti Biblia kadagiti banag a saan nga agpaut, kas iti lalat ken papiro. Ngem dagiti tattao a mangay-ayat iti Biblia nakaan-annad a nangaramidda kadagiti kopia dayta. Uray no pinadas dagiti nangangato a tattao a pukawen ti Biblia, adda dagiti nangprotektar iti dayta uray no posible a pakatayanda. Saan nga impalubos ni Jehova nga adda asinoman wenno aniaman a mangpasardeng kenkuana a makisarita kadatayo. Kuna ti Biblia: “Agtalinaed iti agnanayon ti sao ti Diostayo.”—Isaias 40:8.
AMMUEM TI AD-ADU PAY
Ammuem ti ad-adu pay no kasano nga indalan ti Dios dagiti tattao a nangisurat iti Biblia, no kasanona a prinotektaran dayta, ken no ania ti inaramidna tapno mabasa dayta dagiti tattao.
4. Impakaammo ti Biblia no asino ti Autorna
I-play ti VIDEO. Kalpasanna, basaen ti 2 Timoteo 3:16, sa pagsaritaan dagiti sumaruno a saludsod.
-
No insurat dagiti tattao ti Biblia, apay ngarud a maawagan a Sao ti Dios?
-
Patiem kadi a kabaelan ti Dios nga ipakaammo ti pampanunotna kadagiti tattao a nangisurat iti Biblia?
Mabalin a ti sekretario ti mangaramid iti surat, ngem ti mensahena ket naggapu iti boss-na a nangidiktar iti dayta. Kasta met, tattao ti nangisurat iti Biblia, ngem ti mensahena ket naggapu iti Dios
5. Saan a napukaw ti Biblia
No ti Biblia ket naggapu iti Dios, ekspektarentayo ngarud a protektaranna dayta. Ipakita ti historia a pinadas dagiti nangangato a tattao a pukawen ti Biblia. Saan a kayat dagiti lider ti relihion a mabasa dagiti tattao ti linaonna. Adu ti nangprotektar iti Biblia uray no nabusbusorda ken uray no pakatayanda. Tapno maam-ammom ti maysa kadakuada, i-play ti VIDEO, sa pagsaritaan dagiti sumaruno a saludsod.
-
Ita ta ammomon nga adu a tattao ti nagsakripisio a mangprotektar iti Biblia, mas interesadoka kadin a mangbasa iti Biblia? Apay?
Basaen ti Salmo 119:97, sa pagsaritaan daytoy a saludsod:
-
Apay nga adu a tattao ti nakasagana a matay tapno laeng maipatarus ken maiwaras ti Biblia?
6. Ti libro a para iti amin a tattao
Iti historia, ti Biblia pay laeng ti libro a kaaduan ti nakaipatarusanna ken kasaknapan ti pannakaiwarasna. Basaen ti Aramid 10:34, 35, sa pagsaritaan dagitoy a saludsod:
-
Apay a kayat ti Dios a maipatarus ti Saona iti adu a lengguahe ken maiwaras dayta?
-
Ania ti magusgustuam maipapan iti Biblia?
Dandani
100%
iti populasion ti lubong
ti makabasan iti Biblia iti lengguahe a maawatanda
Available iti nasurok a
3,000
a lengguahe
ti kompleto wenno ti dadduma a pasetna
5,000,000,000
ti natantia a naaramiden a kopia,
adayo nga ad-adu ngem iti aniaman a sabali a libro
KUNA TI DADDUMA: “Daanen a libro ti Biblia ken insurat la dayta dagiti tattao.”
-
Ania ti makunam?
-
Ania dagiti ebidensia a mangipakita a ti Biblia ket Sao ti Dios?
SUMARIO
Ti Biblia ket Sao ti Dios, ken siniguradona a mabasa dayta ti amin a tattao.
Rebiu
-
Ania ti kayatna a sawen no ibagatayo nga inwanwan, wenno indalan, ti Dios dagiti nangisurat iti Biblia?
-
Ania ti pagbilbilibam maipapan iti pannakaprotektar, pannakaipatarus, ken pannakaiwaras ti Biblia?
-
Ania ti mariknam a nakaammo nga inaramid ti Dios ti amin tapno makisarita kenka?
AGDISKOBREKA PAY
Basaem ti pakasaritaan ti Biblia—manipud kadagiti orihinal a kopia agingga kadagiti moderno a patarus.
“No Kasano a Nakagteng Kadatayo ti Biblia” (Agriingkayo!, Nobiembre 2007)
Ammuem no kasano a nalasatan ti Biblia ti tallo a banag a nakapukawanna koma.
Kitaem ti panagsakripisio dagiti nagipatarus iti Biblia.
Namin-adu a nakopia ken naipatarus ti Biblia. Kasanom a masigurado a saan a nabalbaliwan ti mensahe ti Dios?
“Nabalbaliwan Wenno Nasuktan Kadi ti Linaon ti Biblia?” (Artikulo iti website)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
