Mangpilika kadagiti simple nga ilustrasion. Kas ken Jesus, agusarka iti babassit a bambanag a mangilawlawag iti dadakkel a bambanag, ken simple a bambanag a mangilawlawag iti komplikado a bambanag. Dika manginayon kadagiti detalye a saan a kasapulan ken mangpalibeg laeng iti ilustrasion. Siguraduem a dagiti detalye ti ilustrasionmo ket talaga nga agaplikar iti leksion nga isursurom tapno saan a mariro dagiti agdengdengngeg gapu kadagiti detalye a saan a konektado iti topikom.

Ikabilangam dagiti agdengdengngeg. Mangpilika kadagiti ilustrasion a konektado kadagiti aktibidad ken paginteresan dagiti agdengdengngeg. Agannadka tapno saan a makapabain wenno makapasakit dagiti ilustrasionmo.

Isurom ti kangrunaan a punto. Agpokuska a mangyilustrar kadagiti kangrunaan a punto, saan a dagiti di unay napateg a detalye. Siguraduem a saan laeng a ti ilustrasion ti malagip dagiti agdengdengngeg no di ket uray ti punto nga isursurom.