TI PAMILIA ti kadaanan nga institusion ti tao, ngem agpegpeggad ita. Gapu iti nakaam-amak a panagraira ti panagabuso iti droga ken imoralidad kadagiti agtutubo, panagsaknap ti diborsio ken kinaranggas iti pamilia kadagitoy a tiempo, kellaat a panagadu dagiti pamilia nga addaan agsolsolo a nagannak, ken dadduma pay a serioso a problema, pampanunoten dagiti dadduma no makalasatto pay ngata ti biag ti pamilia.

Posible pay ngata nga agbalin a natalged ti pamilia, a pakaaywanan dagiti miembrona? Wen, no ammo dagiti miembro ti pamilia ti napaypayso a sekreto ti kinaragsak iti pamilia. Saan a nakalemmeng daytoy a sekreto. Napadas ken nasuboken iti adu a siglo. Ania ngay dayta? Daytoy a libro, Ti Sekreto ti Kinaragsak iti Pamilia, ti mangipaay iti sungbat. Mangipaay met daytoy kadagiti praktikal nga ehemplo no kasano a makatulong daytoy a “sekreto” a mangrisut iti adu a narikut a kasasaad iti pamilia. Adda kadi asinoman ita a di makasapul iti kasta nga impormasion?