Ti Inaramid ti Dios Tapno Maisalakan ti Sangatauan
Kapitulo 7
Ti Inaramid ti Dios Tapno Maisalakan ti Sangatauan
1, 2. (a) Kasano a nabigbig ti maysa a Romano a senturion ti kinasiasino ti Anak ti Dios? (b) Apay nga impalubos ni Jehova a matay ni Jesus?
ITI maysa a malem ti primavera ag-2,000 a tawenen ti napalabas, naimatangan ti maysa a Romano a senturion ti in-inut ken nakas-ang nga ipapatay ti tallo a lallaki. Pinaliiw a naimbag dayta a soldado ti maysa kadakuada—ni Jesu-Kristo. Nailansa ni Jesus iti kayo a poste. Iti matuon, nagsipnget ti langit bayat nga umad-adani ti ipapatayna. Idi natayen, nagginggined iti napigsa, ket kinuna ti soldado: “Pudno a daytoy a tao ket Anak ti Dios.”—Marcos 15:39.
2 Anak ti Dios! Husto daydi a soldado. Kalkalpasna a naimatangan ti kapapatgan a pasamak a naaramid ditoy daga. Sakbay dayta, adda idi dagiti gundaway nga inawagan ti Dios a mismo ni Jesus kas dungdungnguenna nga Anak. (Mateo 3:17; 17:5) Apay nga impalubos ni Jehova a matay ti Anakna? Agsipud ta daytoy ti pamay-an ti Dios a mangisalakan iti sangatauan manipud iti basol ken ipapatay.
NAPILI A MAIPAAY ITI NAISANGSANGAYAN A PANGGEP
3. Apay a maitutop a ti bugbugtong nga Anak ti Dios ti napili a maipaay iti naisangsangayan a panggep maipapan iti sangatauan?
3 Kas naadaltayon iti daytoy a libro, adda idin ni Jesus sakbay a nagbalin a tao. Naawagan iti “bugbugtong nga Anak” ti Dios agsipud ta direkta a pinarsua ni Jehova. Kalpasanna, inusar ti Dios ni Jesus a nangpaadda kadagiti amin a sabsabali pay a bambanag. (Juan 3:18; Colosas 1:16) Kaay-ayo unay ni Jesus ti sangatauan. (Proverbio 8:30, 31) Di pakasdaawan a pinili ni Jehova ti bugbugtong nga Anakna nga agserbi iti naisangsangayan a panggep idi nailunod ti sangatauan ken patay!
4, 5. Sakbay nga immay ni Jesus ditoy daga, aniat’ impalgak ti Biblia maipapan iti Mesianiko a Bin-i?
4 Idi sinentensiaanna da Adan, Eva, ken Satanas idiay minuyongan ti Eden, tinukoy ti Dios ti umay a Manangisalakan kas maysa a “bin-i.” Umayto daytoy a Bin-i, wenno putot, tapno pukawenna dagiti nakaro a parikut a pinarnuay ni Satanas a Diablo, “ti kadaanan a serpiente.” Kinapudnona, rumekento ti naikari a Bin-i ni Satanas ken amin dagidiay simmurot kenkuana.—Genesis 3:15; 1 Juan 3:8; Apocalipsis 12:9.
5 Iti panaglabas dagiti siglo, in-inut nga impalgak ti Dios ti maipapan iti Bin-i, a maawagan met iti Mesias. Kas naipakita iti tsart iti panid 37, naruay dagiti padto a nangibinsabinsa iti adu a pasamak iti biagna ditoy daga. Kas pagarigan, aglak-amto iti nakas-ang a pannakairurumen tapno matungpal ti akemna iti panggep ti Dios.—Isaias 53:3-5.
NO APAY A MATAY TI MESIAS
6. Sigun iti Daniel 9:24-26, aniantot’ ibanag ti Mesias, ken kasano?
6 Impakpakauna ti padto a nailanad iti Daniel 9:24-26 nga adda naindaklan a panggep nga itungpal ti Mesias—ti Pinulotan ti Dios. Umayto ditoy daga ‘tapno leppasenna ti salungasing, ken mangaramid iti panungpalan ti basol, ken mangaramid iti panagkakappia gapu iti kinadakes, ken mangyeg iti kinalinteg’ iti agnanayon. Aonento ti Mesias ti matalek a sangatauan iti panangilunod ni patay. Ngem kasanot’ panangaramidna iti daytoy? Ilawlawag ti padto a ‘magessatto,’ wenno mapapatay.
7. Apay a nagidaton dagiti Judio kadagiti animal, ken aniat’ inladawan dagitoy?
7 Pamiliar kadagiti nagkauna nga Israelita ti ideya ti panangabbong iti salungasing. Iti panagdayawda iti sidong ti Linteg nga inted ti Dios kadakuada babaen ken Moises, regular a nangidatonda kadagiti animal. Impalagip daytoy kadagiti umili ti Israel a kasapulan dagiti tao ti pangabbong kadagiti basolda. Ginupgop ni apostol Pablo ti prinsipio iti kastoy a pamay-an: “Malaksid no maiparukpok ti dara awan ti maaramid a pannakapakawan.” (Hebreo 9:22) Awan dagiti Kristiano iti sidong ti Linteg Mosaiko agraman dagiti alagadenna, kas dagiti daton. (Roma 10:4; Colosas 2:16, 17) Ammoda met a dagiti daton nga animal saanda a mapakawan nga agnanayon ken naan-anay dagiti basolda. Imbes ketdi, inladawan dagitoy a daton ti adayo a napatpateg a daton—ti daton nga impaay ti Mesias, wenno Kristo. (Hebreo 10:4, 10; idiligyo ti Galacia 3:24.) Ngem, mabalin a maisaludsodyo, ‘Talaga kadi a masapul a matay ti Mesias?’
8, 9. Aniada a napapateg a banag ti napukaw da Adan ken Eva, ket kasano a naapektaran dagiti annakda iti inaramidda?
8 Wen, masapul a matay ti Mesias tapno maisalakan ti sangatauan. Tapno maawatantayo no apay, masapul a lagipentayo ti minuyongan ti Eden ken panunotentayo no kasanot’ kadakkel ti napukaw da Adan ken Eva idi immalsada iti Dios. Agur-uray idi kadakuada ti biag nga agnanayon! Kas annak ti Dios, tinagiragsakda met ti direkta a pannakirelasion kenkuana. Ngem idi linaksidda ti turay ni Jehova, napukawda amin dagita ket inyegda ti basol ken ipapatay iti sangatauan.—Roma 5:12.
9 Arigna ginastar dagiti immuna a nagannak kadatayo ti nagdakkel a kinabaknang, nga inlumlomda ti bagbagida iti utang. Inyallatiw da Adan ken Eva dayta nga utang kadagiti annakda. Tangay saantay a nayanak a perpekto ken awanan basol, managbasol ken matay ti tunggal maysa kadatayo. No agsakit wenno makaisawangtayo iti makaipas a sao a pagbabawyantayo kalpasanna, mapaspasarantay dagiti epekto ti utang a natawidtayo—ti natauan a kinaimperpekto. (Roma 7:21-25) Agpannuray ti kakaisuna a namnamatayo iti pannakaisubli ti napukaw ni Adan. Nupay kasta, ditay mategged ti perpekto a natauan a biag. Tangay agbasol dagiti amin nga imperpekto a tattao, maikaritay amin iti patay, saan nga iti biag.—Roma 6:23.
10. Aniat’ kasapulan tapno masubbot ti napukaw ni Adan?
10 Nupay kasta, adda kadi mabalin nga isukat iti biag a napukaw ni Adan? Ti pagalagadan ti Dios iti kinahustisia kalikagumanna ti panangtimbeng, “kararua iti kararua.” (Exodo 21:23) Isu a masapul a biag ti kasukat ti biag a napukaw. Saan nga umdas ti biag ti uray asino a tao. Kuna ti Salmo 49:7, 8 maipapan kadagiti imperpekto a tattao: “Awan kadakuada ti makabalin babaen ti aniaman a pamuspusan a manubbot iti kabsatna, ken mangted man iti Dios iti subbot a maipaay kenkuana; (ket nangina unay ti gatad a pangsubbot iti kararuada ta simmardengen iti panawen a di nakedngan).” No kasta, awan kadin ti namnama ti kasasaad? Ay ket, adda.
11. (a) Aniat’ ipasimudaag ti sao a “subbot” iti Hebreo? (b) Siasino ti kakaisuna a makasubbot iti sangatauan, ken apay?
11 Iti pagsasao a Hebreo, ti sao a “subbot” ipasimudaagna ti kuarta a pangsaká iti tao a nakautibo ken ipamatmatna met ti panangtupag. Ti laeng tao nga addaan perpekto a natauan a biag ti makaipaay iti katupag ti napukaw ni Adan. Kalpasan ni Adan, ti kakaisuna a perpekto a tao a nayanak ditoy daga isu ni Jesu-Kristo. Gapuna, awagan ti Biblia ni Jesus kas “ti maudi nga Adan” ken ipanamnamana kadatayo nga ‘inted [ni Kristo] ti bagina kas katupag a subbot nga agpaay iti isuamin.’ (1 Corinto 15:45; 1 Timoteo 2:5, 6) Patay ti impatawid ni Adan kadagiti annakna, [idinto ta] biag nga agnanayon ti impatawid ni Jesus. Ilawlawag ti 1 Corinto 15:22: “No kasano a ken Adan matmatay ti amin, kasta met a ken Kristo mapagbiagto ti amin.” Gapuna, maitutop a maawagan ni Jesus iti “Agnanayon nga Ama.”—Isaias 9:6, 7.
NO KASANO A NABAYADAN TI SUBBOT
12. Kaano a nagbalin ni Jesus a Mesias, ket ania a kabibiag ti sinurotna kalpasanna?
12 Idi otonio ti 29 K.P., napan nagpabautisar ni Jesus iti kabagianna a ni Juan ket iti kasta indatagna ti bagina a mangaramid iti pagayatan ti Dios. Iti dayta a gundaway, pinulotan ni Jehova ni Jesus iti nasantuan nga espiritu. Iti kasta, nagbalin ni Jesus a Mesias, wenno Kristo, ti pinulotan ti Dios. (Mateo 3:16, 17) Kalpasanna, inrugi ni Jesus ti ministeriona a nagpaut iti tallo ket kagudua a tawen. Sinursorna ti ilina, a nangaskasaba maipapan iti Pagarian ti Dios ken nangurnong kadagiti matalek a pasurot. Nupay kasta, kas naipadto, adut’ bimmusor kenkuana.—Salmo 118:22; Aramid 4:8-11.
13. Ania dagiti pasamak a nangiturong iti ipapatay ni Jesus kas natarnaw [a tao]?
13 Situtured nga imbutaktak ni Jesus ti kinamanaginsisingpet dagiti pangulo ti relihion, isut’ gapuna a kayatda a papatayen. Idi agangay, nangbukelda iti nagdakes a wayat a pakairamanan ti panangliput, di umiso a panangaresto, ilegal a panangusig, ken ulbod a pammabasol iti iyaalsa. Nakabkabil, natuptupraan, nauy-uyaw, ken nasapsaplit ni Jesus iti latigo a nadisenio a mangdudog iti lasagna. Kalpasanna, sinentensiaan ti Romano a gobernador a ni Poncio Pilato a matay iti kayo a pagtutuokan. Nailansa iti maysa a kayo a poste ken naibitin sadiay a nakaunnat. Kasla mauyos ti tunggal angesna gapu iti ut-ot, ket adu nga oras ti naglabas sakbay a natay. Kabayatan dayta a panangparigat, sinalimetmetan ni Jesus ti naan-anay a kinatarnawna iti Dios.
14. Apay nga impalubos ti Dios nga agsagaba ken matay ti Anakna?
14 No kasta, idi Nisan 14, 33 K.P., inted ni Jesus ti biagna kas “subbot a kasukat dagiti adu.” (Marcos 10:45; 1 Timoteo 2:5, 6) Manipud idiay langit, nakita ni Jehova ti panagsagaba ken ipapatay ti patpatgenna nga Anak. Apay nga impalubos ti Dios a mapasamak ti kasta a nakas-ang a banag? Inaramidna dayta gaput’ panagayatna iti sangatauan. Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Juan 3:16) Ti ipapatay ni Jesus isurona met kadatayo a ni Jehova ket maysa a Dios ti naan-anay a kinahustisia. (Deuteronomio 32:4) Mabalin a panunoten dagiti dadduma no apay a di insanud ti Dios dagiti prinsipiona iti kinahustisia a mangkalikagum iti kararua iti kararua ket binaybay-anna koman ti supapak ti basol ni Adan. Ti makagapu a ta kanayon a salsalimetmetan ken itantandudo ni Jehova dagiti lintegna, uray no kaipapananna ti dakkel a panagsakripisio iti biangna.
15. Tangay di nainkalintegan no bay-an lattan nga aggibus iti agnanayon ti biag ni Jesus, aniat’ inaramid ni Jehova?
15 Kinalikaguman met ti kinahustisia ni Jehova a maaddaan ti ipapatay ni Jesus iti naragsak a pagbanagan. Ta, adda kadi kinahustisia no binaybay-anna lattan ni matalek a Jesus a maturog nga agnanayon ken patay? Ay ket, awan! Impadto ti Hebreo a Kasuratan a saan nga agtalinaed iti tanem ti nasungdo iti Dios. (Salmo 16:10; Aramid 13:35) Naturog ken patay iti ag-tallo nga aldaw, ket kalpasanna pinagungar ni Jehova a Dios iti biag kas maysa a mannakabalin nga espiritu a persona.—1 Pedro 3:18.
16. Aniat’ inaramid ni Jesus idi nagsubli idiay langit?
16 Iti ipapatayna, naminsan la nga indaton ni Jesus ti natauan a biagna. Idi napagungar iti biag idiay langit, nagbalin a maysa a mangted-biag nga espiritu. Maysa pay, idi immuli ni Jesus iti kasasantuan a disso iti uniberso, naikaykaysa manen iti patpatgenna nga Ama ken pormal nga indatagna Kenkuana ti pateg ti perpekto a natauan a biagna. (Hebreo 9:23-28) Gapuna, mabalinen nga ipakat ti pateg dayta napateg a biag iti natulnog a sangatauan. Aniat’ kaipapanan dayta kadakayo?
TI SUBBOT NI KRISTO KEN DAKAYO
17. Kasanotay a magun-odan ti pannakapakawan maibatay iti daton a subbot ni Kristo?
17 Usigenyo dagiti tallo a pamay-an a magunggonaankayo iti daton a subbot ni Kristo uray itan. Umuna, mangyeg dayta iti pannakapakawan dagiti basol. Babaen ti pammati iti naiparukpok a dara ni Jesus, addaantayo “iti pannakaluk-at babaen ti subbot,” wen, “ti pannakapakawan dagiti labsingtayo.” (Efeso 1:7) Isu nga uray no nakaaramidtayo iti nadagsen a basol, mabalintay ti dumawat iti pammakawan ti Dios iti nagan ni Jesus. No pudpudno nga agbabawitayo, ipakat ni Jehova kadatayo ti pateg ti daton a subbot ti Anakna. Pakawanennatay ti Dios, a paraburannatay iti nasayaat a konsiensia, imbes nga ipatawna ti dusa a patay gaput’ panagbasoltayo.—Aramid 3:19; 1 Pedro 3:21.
18. Iti ania a pamay-an nga ikkannatay ti subbot ni Jesus iti namnama?
18 Maikadua, ipaay ti daton a subbot ni Kristo ti pakaibatayan ti namnamatayo iti masanguanan. Iti sirmata, nakita ni apostol Juan ti “maysa a dakkel a bunggoy, nga awan ti tao a makabael a mangbilang” a makalasat iti sumungsungad a nakaam-amak a panungpalan daytoy a sistema ti bambanag. Apay a makalasatda idinto ta dadaelen ti Dios ti nakaad-adu a sabsabali pay? Kinuna ti maysa nga anghel ken Juan a ‘linabaan [ti dakkel a bunggoy] dagiti pagan-anayda ket pinapudawda ida iti dara ti Kordero,’ ni Jesu-Kristo. (Apocalipsis 7:9, 14) No la ket mamatitayo iti naiparukpok a dara ni Jesu-Kristo ken agbiag a maitunos kadagiti nadiosan a pagannurotan, nadalustayo iti imatang ti Dios ken adda namnamatay nga agbiag nga agnanayon.
19. Kasano a paneknekan ti daton ni Kristo nga isu ken ni Amana ket ay-ayatendakayo?
19 Maikatlo, ti daton a subbot isut’ kadakkelan a pammaneknek ti ayat ni Jehova. Nayebkas iti ipapatay ni Kristo ti dua a kadakkelan a pannakaiparangarang ti ayat iti pakasaritaan ti uniberso: (1) ti ayat ti Dios iti panangibaonna iti Anakna tapno matay maipuon kadatayo; (2) ti ayat ni Jesus iti situtulok a panangipaayna iti bagina kas maysa a subbot. (Juan 15:13; Roma 5:8) No pudpudno a mamatitayo, agaplikar daytoy nga ayat iti tunggal maysa kadatayo. Kinuna ni apostol Pablo: ‘Ti Anak ti Dios . . . nagayat kaniak ken nangiyawat iti bagina maipaay kaniak.’—Galacia 2:20; Hebreo 2:9; 1 Juan 4:9, 10.
20. Apay a rumbeng a mamatitayo iti daton a subbot ni Jesus?
20 Gapuna, ipakitatay ti panagyaman iti ayat nga imparangarang ti Dios ken ni Kristo babaen ti panamati iti daton a subbot ni Jesus. Ti panangaramid iti kasta mangiturong iti biag nga agnanayon. (Juan 3:36) Nupay kasta, ti pannakaisalakantayo ket saan nga isut’ kangrunaan a makagapu iti panagbiag ken ipapatay ni Jesus ditoy daga. Saan, adda dakdakkel nga isyu, sapasap nga isyu, a kangrunaan a pakaseknanna. Kas makitatayto iti sumaganad a kapitulo, nairamantay amin iti dayta nga isyu agsipud ta ipakitana no apay nga impalubos ti Dios nga agpaut ti kinadakes ken panagsagaba iti daytoy a lubong.
SUBOKENYO TI PANNAKAAMMOYO
Apay a masapul a matay ni Jesus tapno maisalakan ti sangatauan?
Kasano a nabayadan ti subbot?
Kadagiti ania a pamay-an a magunggonaankayo iti subbot?
[Salsaludsod]
[Ladawan iti panid 67]
