KAPITULO 24

Makatulong Aya ti Seks iti Relasionmi?

Dua a bulan pay laeng nga agnobio da Heather ken Mike ngem iti panagriknada, kasla nabayagdan nga agam-ammo. Kanayonda nga agtinneks, nakabaybayagda pay nga agtungtungtong iti telepono, ken agkaalaanda! Ngem ita ta sellag ken duduada iti uneg ti nakaparada a lugan, saan laengen a basta makitungtong ti kayat ni Mike.

Iti napalabas a dua a bulan, agin-inniggem la iti ima da Mike ken Heather ken apagbiit la nga agbinnisongda. Agingga la dita ti kayat ni Heather. Ngem dina met kayat a mapukawna ni Mike. Isu la ngamin ti mangiparparikna kenkuana nga isu ket espesial ken nakapimpintas. ‘Uray ta agin-innayatkami met ken Mike,’ kunkunana iti un-unegna.

 NALABIT ammomon no ania ti sumaruno a mapasamak. Ngem mabalin a saanmo a maamiris no ania ti epektona kada Mike ken Heather ti panagseks​—sigurado a saan a nasayaat. Usigem dagiti sumaganad:

No salungasingem ti pisikal a linteg, kas iti linteg ti grabidad, sigurado a maisagmakka. Kasta met laeng no salungasingem ti paglintegan iti moral, kas iti bilin nga: “Adaywanyo ti pannakiabig.” (1 Tesalonica 4:3) Ania dagiti pagdaksanna no saanmo a tungpalen dayta a bilin? Kuna ti Biblia: “Ti mangyugali iti pannakiabig agbasbasol a maikaniwas iti bukodna a bagi.” (1 Corinto 6:18) Kasano a kasta? Mangisuratka iti tallo a dakes nga epekto ti panagseks dagiti di pay nagkasar.

  1 ․․․․․

2 ․․․․․

3 ․․․․․

Ita, subliam dagiti insuratmo. Inramanmo kadi dagiti banag a kas iti sakit a mayakar babaen iti sekso, masikogan a balasang, ken pannakapukaw ti anamong ti Dios? Sigurado a nasaem dagita a mapasaran ti asinoman a manglabsing iti moral a linteg ti Dios mainaig iti pannakiabig.

Ngem mabalin a masulisogka latta. Nalabit ikalintegam, ‘Awan ti dakes a mapasamak kaniak.’ Maysa pay, ar-aramiden met dayta ti amin! Pagpampannakkel dagiti kaeskuelaam dagiti kapadasanda iti seks, ket kasla awan met ti dakes nga epektona kadakuada. Nalabit, kas ken Heather iti rugrugi daytoy nga artikulo, mabalin nga ipagarupmo pay ketdi a nasingsingedkayo nga agnobio no agsekskayo. Maysa pay, siasino koma met ti mayat a mauyaw gapu ta birhen pay laeng? Saan ngata a nasaysayaat no sumurotka lattan iti uso?

Ngem agurayka! Umuna, saan met nga amin ket agar-aramid iti kasta. Agpayso nga adda dagiti estadistika a mangipakita a nakaad-adu dagiti agtutubo a makiseseks. Kas pagarigan, iti maysa a surbey iti Estados Unidos, natakuatan a 2 iti kada 3 nga agtutubo iti dayta a pagilian ket napadasandan ti nakiseks sakbay pay nga agturposda iti haiskul. Ngem kayat met a sawen dayta a 1 iti kada 3 ti saan​—ket adu met dayta a bilang. Komusta ngay dagidiay makiseseks? Natakuatan dagiti managsukimat a mapaspasaran ti adu kadagita nga agtutubo ti maysa wenno ad-adu pay kadagiti sumaganad a nakas-ang nga epekto.

1 PANNAKABURIBOR. Kaaduan nga agtutubo a nakiseks a di pay nagkasar ti nagkuna a pagbabbabawyanda dayta.

 2 PANNAKAPUKAW TI PANAGTALEK. Kalpasan ti panagseksda, panunoten ti tunggal maysa kadakuada, ‘Siasino pay ngata ti nagarawna wenno nakagaraw kenkuana?’

3 PANNAKADISMAYA. Kaykayat ti maysa a babai ti makinobio iti mangisakit kenkuana, saan ket a manggundaway kenkuana. Ken adu a lallaki ti saanen a mangayat iti babai a nagarawdan.

Malaksid iti dayta, adu a lallaki ti nagkuna a pulos a saanda nga ikasar ti babai a nagarawdan. Apay? Gapu ta kaykayatda ti babai a saan pay a namulitan ti dayawna!

No maysaka a babai, masdaawka kadi​—wenno nalabit makapungtotka pay ketdi? No kasta, laglagipem daytoy: Ti panagseks ti di pay nagkasar ket saan a kas kadagiti maipabpabuya iti pelikula ken iti TV. Pagparparangenda laeng a ti panagseks dagiti agtutubo ket awan ti pagdaksanna ken mangipakita a pudpudno ti ayan-ayatda. Ngem saanka a paallilaw! Dagidiay mangguyugoy kenka a makiseks uray saankayo pay a nagkasar ket ti laeng bagbagida ti pampanunotenda. (1 Corinto 13:4, 5) Maysa pay, no pudpudno nga ay-ayatennaka ti maysa a tao, dangrannaka kadi iti pisikal wenno emosional? (Proverbio 5:3, 4) Ken no pudpudno a maseknan kenka dayta a tao, sulisogennaka kadi a mangdadael iti relasionmo iti Dios?​—Hebreo 13:4.

 No maysaka nga agtutubo a lalaki nga adda nobiana, dagiti nadakamat iti daytoy a kapitulo tignayennaka koma a mangpanunot iti kasasaad ti relasionyo. Isaludsodmo iti bagim, ‘Talaga kadi nga ipatpategko ti nobiak?’ No wen ti sungbatmo, kasanom a maipakita dayta iti kasayaatan a pamay-an? Masapul nga addaanka iti bileg a mangsurot kadagiti linteg ti Dios, sirib a mangliklik kadagiti makasulisog a kasasaad, ken ayat tapno maipangpangrunam dagiti pagsayaatanna. No addaanka kadagiti kasta a kualidad, posible a mariknanto ti nobiam ti kas iti narikna ti Sulamita a nadalus iti moral, a nangikuna: “Ni patpatgek kukuak ket siak kukuanak.” (Kanta ni Solomon 2:16) Iti ababa a pannao, maipagpannakkelnaka!

 Maysaka man a lalaki wenno babai, no makisekska a saankayo pay a nagkasar, maperdi ti dayawmo gapu ta impalubosmo a mapukaw ti maysa a banag a napateg. (Roma 1:24) Awan duadua nga adu nga agtutubo ti makarikna nga awanen ti kaes-eskanda gapu ta kas man la binaybay-anda lattan a matakaw ti napateg a paset ti kinataoda! Dimo ipalubos a mapasamak dayta kenka. No guyugoyennaka ti kaayan-ayatmo a makiseks babaen ti panangikunana a, “No talaga nga ay-ayatennak, mayatka,” sititibker nga isungbatmo, “No ay-ayatennak, saanmo a kiddawen dayta!”

Nakapatpateg ti dayawmo isu a saanmo a basta ipadawat lattan. Ipakitam a determinadoka a mangtungpal iti bilin ti Dios, nga adaywam ti pannakiabig. Inton adda asawamon, mabalinmonton ti makiseks. Ken naan-anayto a matagiragsakmo dayta, nga awan ti pagdandanagam, pagbabbabawyam, ken pagam-amkam​—a masansan nga epekto ti pannakiseks ti di pay nagkasar.​—Proverbio 7:22, 23; 1 Corinto 7:3.

ADU PAY TI MABASAM MAIPAPAN ITI DAYTOY A TOPIKO ITI TOMO 2, KAPITULO 4 KEN 5

ITI SUMAGANAD A KAPITULO

Kasano kadakes ti masturbasion?

NAPAPATEG A TEKSTO

“Adaywanyo ti pannakiabig. . . . Ti mangyugali iti pannakiabig agbasbasol a maikaniwas iti bukodna a bagi.”​—1 Corinto 6:18.

BALAKAD

No maipapan iti pannakilangen iti saanmo a kasekso, ti nasayaat a panunotem ket: Saanmo nga aramiden ti saanmo a kayat a makita dagiti dadakkelmo nga aramidem.

AMMOM KADI . . . ?

Mabalin nga isukat ti maysa a lalaki ti nobiana no nagarawnan.

DAGITI ARAMIDEK!

No adda kaduak a saanko a kasekso, dagiti kasasaad a liklikak ket

No adda saanko a kasekso a kayatna ti makisinnarak kaniak iti maysa a nalmeng a lugar, ti ibagak ket ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Nupay kasla makaay-ayo ti pannakiseks a di pay nagkasar, apay a rumbeng a saanmo nga aramiden dayta?

● Ania ti aramidem no adda mangawis kenka a makiseks?

[Blurb iti panid 176]

Kas maysa a Kristiano, addaanka kadagiti kualidad a makaay-ayo kadagiti sabsabali. Gapuna, agbalinka nga alerto ken agkedkedka no adda mangallukoy kenka nga agaramid iti imoral. Tagipatgem dagita a kualidad. Dimo isuksukat iti apagbiit a ragsak!’’​—Joshua

[Ladawan iti panid 176, 177]

No makisekska iti kaayan-ayatmo a dikay pay nagkasar, arigna nga inusarmo a pagpigadan ti nagpintas a lamina