Nasayaat nga Ulidan​—Ni Moses

Nagsayaat ti biag ni Moises. Dimmakkel iti sangakabbalayan ni ari Paraon ken nasursuruan iti isuamin a kinasirib ti Egipto. (Aramid 7:22) Ania ti pangusaranna iti dayta a pannakasanayna? Kabaelanna ti agbalin a natan-ok, nabaknang, ken mannakabalin. Nupay kasta, saan a nagpaimpluensia kadagiti kasadaranna ken saanna nga inyun-una dagiti managimbubukodan nga ambisionna. Imbes ketdi, inkeddengna nga usaren ti biagna iti wagas a di ninamnama ti adu. Pinilina “ti dakes a pannakatrato a kadua ti ili ti Dios.” (Hebreo 11:25) Napukaw kadi ni Moises dagiti naimbag a banag? Saan. Gapu ta pinilina ti agserbi iti Dios ken tumulong kadagiti tattao, naaddaan iti naragsak ken makapnek a biag.

No addaanka iti gundaway a mangala iti kalkalainganna nga edukasion, anianto ti pangusaram iti dayta? Mabalinmo ti agpabaknang wenno gumun-od iti pannakabalin. Wenno kas ken Moises, mabalinmo ti mangaramid iti banag a pudno a makagunggona iti biagmo. Mabalinmo nga usaren ti mental ken pisikal a paglaingam nga agserbi iti Dios ken kadagiti kaarrubam. (Mateo 22:35-40) Dayta ti kasasayaatan a pangusaram iti biagmo!