KAPITULO 7

Nakasaganaak Kadin a Lumasin Kadagiti Dadakkelko?

“No dadduma, mariknak a kasla tagtagibassitendak dagiti tattao gapu ta 19 ti tawenkon ngem addaak pay laeng iti poder dagiti dadakkelko. Kas man la saanak nga agmataengan no diak lumasin.”​—Katie.

“Ag-20 ti tawenkon ngem masuronak ta diak man la maaramid ti kaykayatko. Kayatko pay ketdin ti pumanaw iti balaymi.”​—Fiona.

URAY no saanka pay a nakasagana, baka kayatmon ti lumasin kadagiti dadakkelmo. Normal laeng dayta. Ngamin, kas nailawlawag iti Kapitulo 3, pinanggep ti Dios a dagiti agtutubo ket agmataengan ken inton agangay, panawanda dagiti dadakkelda ken maaddaanda iti bukod a pamilia. (Genesis 2:23, 24; Marcos 10:7, 8) Ngem kasanom a maammuan no nakasaganakan a lumasin? Usigem ti tallo a napateg a saludsod a nasken a sungbatam. Ti umuna ket . . .

 Apay a Kayatmo ti Lumasin?

Kitaem ti listaan iti baba maipapan kadagiti rason no apay a kayatmo ti lumasin. Numeruam dagita sigun iti agsasaganad a kapategda kenka.

․․․․․ Tapno maitarayak dagiti problema iti pagtaenganmi

․․․․․ Tapno maaramidko ti kaykayatko

․․․․․ Tapno raemendak dagiti gagayyemko

․․․․․ Tapno kaduaek ti gayyemko nga agkasapulan iti kakuarto

․․․․․ Tapno agboluntarioak iti sabali a lugar

․․․․․ Tapno umadu ti kapadasak

․․․․․ Tapno maksayan ti paggastuan dagiti dadakkelko

․․․․․ Dadduma pay

Saan met ketdi a dakes dagiti nadakamat. Ngem ti saludsod ket, Ania ti motibom? Kas pagarigan, no lumasinka tapno nawaywayaka a mangaramid iti kayatmo, baka agbabawikanto laeng!

Ni Danielle, a pimmanaw iti poder dagiti dadakkelna iti sumagmamano a tiempo idi agtawen iti 20, ket nakasursuro manipud iti kapadasanna. Kinunana: “Talaga nga adda latta dagiti saantay a maaramid. No lumasinka, saanmo met la a maaramid ti kayatmo gapu iti eskediulmo iti trabaho wenno kurang ti kuartam.” Ni Carmen a nagabrod iti innem a bulan, kinunana: “Naragsakak met ngem masansan nga awan ti inanak! Siak amin ti mangaramid iti gagangay a trabaho iti balay​—agdalus iti uneg ken ruar, agtarimaan, aglaba, aglampaso, ken dadduma pay.”

Dika agdarasudos nga agdesision gapu iti panangdurog dagiti sabsabali. (Proverbio 29:20) Uray no nasayaat dagiti rasonmo a lumasin kadagiti dadakkelmo, saan laeng a dayta ti kasapulam. Nasken nga ammom ti agbiag. Isu a ti maikadua a saludsod ket . . .

Nakasaganaka Kadin?

Ti ipapanaw iti poder dagiti nagannak ket mayarig iti panag-hiking iti kabakiran. Mapanka  ngata sadiay no dimo pay ammo ti agipatakder iti tolda, agpasged, agluto, wenno agbasa iti mapa? Siempre saan! Kaskasdi, adu nga agtutubo ti limmasin kadagiti dadakkelda uray no bassit pay laeng ti ammoda a trabaho iti balay.

Kinuna ni masirib nga Ari Solomon a “daydiay nasaldet utobenna dagiti addangna.” (Proverbio 14:15) Tapno masiguradom no nakasaganakan a lumasin, usigem dagiti sumaganad. Markaam iti ✔ dagiti kabaelamon nga aramiden ken X dagiti masapul a sursuruem pay.

□ Agbadyet: “Diak pay pulos napadasan ti nagbayad kadagiti naggastuak,” kuna ni Serena nga agtawen iti 19. “Isu a maamakak a lumasin ken mangibadyet iti kuartak.” Kasanom a masursuro ti agbadyet?

Kuna ti maysa a proverbio iti Biblia: “Ti masirib a tao umimdengto ken gumun-od iti ad-adu pay a pammilin.” (Proverbio 1:5) Gapuna, apay a dimo damagen kadagiti dadakkelmo no mano ti binulan a magasto ti maysa a tao para iti taraon, lugan, plete, abang wenno pagtinnag iti balay? Kalpasanna, agpaisuroka kadakuada no kasano ti agbadyet ken agbayad kadagiti paggastuam. *

□ Agtagibalay: Kuna ni Brian, nga agtawen iti 17, a ti kabusbusorna a trabaho inton lumasinen ket ti aglaba. Kasanom a maammuan no  kabaelamon ti agtakder iti bukodmo a saka? Kastoy ti insingasing ni Aron nga agtawen iti 20: “Padasem ti agbiag iti makalawas a kasla agbukbukodka. Usarem ti kuarta a mateggedam a makitienda ken sika ti agluto iti kanem. Sika ti manglaba ken mangplantsa iti badom. Sika payen ti agdalus iti balayyo. Ken ikagumaam ti mapan kadagiti papanam a saankan nga agpaitulod ken agpasukon.” No aramidem dagita, (1) masursurom dagiti napateg a trabaho ken (2) ad-adda a maapresiarmo ti ar-aramiden dagiti dadakkelmo.

□ Pannakilangen: Makatunosam kadi dagiti dadakkelmo ken dagiti kakabsatmo? No saan, baka panunotem a nasaysayaat no makipagnaedka laengen iti gayyemmo. Ngem usigem ti kinuna ni Eve nga agtawen iti 18: “Nagkasera ti dua kadagiti gagayyemko iti maymaysa nga apartment. Nakasingsingedda idi, ngem saanda metten nga agkatunosan idi agkaduadan iti maymaysa nga apartment. Nadalimanek ‘diay maysa, nakawarwara ‘diay maysa. Naespirituan ti panagpampanunotna ‘diay maysa idinto ta saan unay ‘diay maysa. Talaga a saanda nga agkadutdotan!”

Ania ti solusion? Kuna ni Erin nga agtawen iti 18: “Adu ti masursurom maipapan iti pannakilangen kadagiti sabsabali bayat nga addaka pay laeng iti poder dagiti dadakkelmo. Masursurom  ti agpabus-oy ken mangrisut kadagiti problema. Napaliiwko a dagidiay lumasin tapno maliklikanda ti makiapa kadagiti dadakkelda masursuroda no kasano nga itarayan dagiti problema imbes a risuten dagita.”

□ Regular a panagadal iti Biblia ken panagdaydayaw: Adda dagidiay lumasin gapu ta kayatda a liklikan ti naespirituan a rutina dagiti dadakkelda. Determinado met dagiti dadduma a mangmantener iti regular a panagadal ken panagdaydayawda ngem in-inut a nabaybay-anda dagita. Kasano a maliklikam ti ‘pannakarba ti pammatim’? *​—1 Timoteo 1:19.

Kayat ni Jehova a Dios a paneknekantayo no pudno met laeng dagiti patpatientayo. (Roma 12:1, 2) Mangaramidka iti nasayaat nga eskediul para iti panagadal iti Biblia ken panagdaydayaw sa surotem dayta. Apay a saanmo nga isurat iti kalendario ti rutinam iti naespirituan ket kitaem no masurotmo dayta iti makabulan uray no saandaka a palagipan dagiti dadakkelmo?

Ti maudi a saludsod a nasken nga usigem ket . . .

Ania ti Kayatmo a Maragpat?

Kayatmo kadi ti lumasin kadagiti dadakkelmo tapno maitarayam dagiti problema wenno tapno nawayaka a mangaramid iti kayatmo? No wen, kayatna a sawen a naipamaysa ti  panunotmo iti mapanawam saan ket nga iti papanam. Mayarig dayta iti panagmaneho a ti kitkitaem ket ti likudan. No ti likudan ti kitkitaem bayat nga agmanmanehoka, saanmo a makita ti adda iti sanguanam. Ania ti punto? Saan a ti laeng ipapanawmo iti poder dagiti dadakkelmo ti panunotem no di ket no ania ti nasayaat nga aramidem.

Pimmanaw iti pagtaenganda ti dadduma nga agtutubo a Saksi ni Jehova tapno makakasabada kadagiti dadduma pay a lugar iti pagilianda wenno iti sabali pay ketdi a pagilian. Adda met dagidiay napan nagboluntario iti sanga nga opisina dagiti Saksi ni Jehova wenno iti panagibangon kadagiti lugar a pagdaydayawan. Kayat met a sursuruen dagiti dadduma ti agbiag a bukbukod sakbay a makiasawada. *

Aniaman ti panggepmo nga aramiden, panunotem a naimbag dayta. Kuna ti Biblia: “Dagiti gakat daydiay nasaet sigurado a mangipaay iti pagsayaatan, ngem tunggal maysa a nadarasudos sigurado nga agturong iti panagkasapulan.” (Proverbio 21:5) Ipangagmo ti balakad dagiti dadakkelmo. (Proverbio 23:22) Ikararagmo ti maipapan iti dayta. Ken no agdesisionka, usigem dagiti nadakamat a prinsipio ti Biblia.

Ti saludsod ket saan a no nakasaganakan a lumasin no di ket no kabaelamon ti agbiag a bukbukod. No kabaelamon, mabalin a nakasaganakan a lumasin kadagiti dadakkelmo.

[Footnotes]

NAPAPATEG A TEKSTO

“Ti maysa a lalaki panawannanto ti amana ken ti inana.”​—Mateo 19:5.

BALAKAD

Padasem nga ited kadagiti dadakkelmo ti gatad a magasto para iti kanem, abang ti kuartom, ken dadduma pay a paggastuan. No saanmo a kabaelan wenno saanmo a kayat a bayadan dagita, saanka pay a nakasagana a lumasin.

AMMOM KADI . . . ?

Dagiti rason a lumasinka kadagiti dadakkelmo apektaranna no kasanonto ti kinaragsakmo.

DAGITI ARAMIDEK!

Ti panggepko nga aramiden no lumasinak kadagiti dadakkelko ket ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Uray no adda problemam iti pamiliayo, apay a nasayaat no saanka pay laeng a lumasin?

● Bayat nga addaka pay laeng iti poder dagiti dadakkelmo, ania dagiti mabalinmo nga aramiden para iti pamiliam ken mangisagana kenka a mangasikasonto iti bukodmo a pamilia?

[Blurb iti panid 52]

Gagangay laeng a kayatmo ti agbiag a bukbukod. Ngem no ti panggepmo a lumasin ket tapno nawayaka a mangaramid iti kayatmo, ipakita dayta a saanka pay a talaga a nakasagana a pumanaw iti poder dagiti dadakkelmo.’’​—Aron

[Ladawan iti panid 50, 51]

Ti ipapanaw iti poder dagiti nagannak ket mayarig iti panag-hiking iti kabakiran​—nasken a sursuruem pay nga umuna no kasano ti agbiag a bukbukod