ITI uneg ti maysa ket kagudua a tawen, nagtitinnulong dagiti construction volunteer idiay Kyrgyzstan ken dagiti naggapu iti sabali a pagilian iti panangpasayaat ken panangpalawa kadagiti pasilidad ti sangay idiay Bishkek a kabesera ti pagilian. Idi Oktubre 24, 2015, maysa a bulan laeng kalpasan ti proyekto, naidedikar dagiti pasilidad. Nasurok a 3,000 ti nakabuya iti programa a naikonektar iti 18 a Kingdom Hall ken 5 pay a pasdek. Ni Stephen Lett, a miembro ti Bagi a Manarawidwid, ti nangipaay iti makatukay a palawag ti dedikasion a natemaan iti “Agserbi ken Jehova Buyogen ti Naan-anay a Puso.” Iti simmaruno nga aldaw, adda makapabileg-pammati a programa a nabuya ti kaaduan nga agibumbunannag iti pagilian.

 Idi Sabado, Mayo 14, 2016, adda 6,435 nga immatender iti dedikasion ti sanga nga opisina ti Armenia, nga adda iti 6 a kadsaaran ti maysa a napintas a patakder a 18 ti kadsaaranna. Naidedikar met ti maysa nga Assembly Hall ken dagiti pasilidad para iti School for Kingdom Evangelizers. Naisalaysay kadagiti palawag ti nangrugian ti pakasaritaan dagiti adipen ni Jehova idiay Armenia. Idi rugrugi ti 1900’s, nakasabaan dagiti Armenian a napan idiay United States ket idi katengngaan ti 1970’s, naidanon ti naimbag a damag idiay Armenia, idi paset pay laeng dayta ti Soviet Union. Idi agangay, legal a nairehistron ti organisasion ket nabukel ti sangay. Saan a pulos idi a ninamnama ti adu kadagiti immatender iti dedikasion a masaksianda dagita a panagrang-ay iti organisasion. Ti tampok ti programa ket idi siraragsak nga immanamong dagiti immatender ken David Splane, a miembro ti Bagi a Manarawidwid, a maidedikar ken Jehova dagita a nagpipintas a pasilidad.