SIPUD idi nairugi ti Internet television station a JW Broadcasting idi 2014, nagadun a tattao iti intero a lubong ti naparegta ken nabang-aran iti naespirituan. Maluktanen dayta iti nasurok a 90 a lengguahe. Kas pagarigan, maipatpatarusen dagiti programa iti Ewe, Ga, ken Twi (kas iti naipakita) isu a maragragsakan ti nasurok a 130,000 a kakabsat idiay Benin, Côte d’Ivoire, Ghana, ken Togo. *

“No dengdenggek dagiti miembro ti Bagi a Manarawidwid ken dagiti katulonganda, kasla adda ni Jehova iti kuartok a makisarsarita kaniak,” kinuna ni Agatha, nga asawa ti maysa a manangaywan iti sirkito idiay Ghana. “No awan dayta, kasano koma a maaddaan iti kasta kadakkel a pribilehio  ti maysa a nanumo a babai a kas kaniak nga aggigian iti bassit a suli ti daga? Gapu iti dayta, talaga a nadekdekketkami itan kadagiti kakabsattayo iti intero a lubong.”

Naggapu daytoy a komento idiay Zambia: “Uray no marigrigat dagiti kakabsat iti adu a kongregasion, ikagkagumaanda a buyaen ti JW Broadcasting. Kas pagarigan, agarup 30 a kilometro ti kaadayo ti Misako Congregation iti kaasitgan nga ili ken adda dayta iti kataltalonan. No matutudo, napegges ti ayus ti adu a waig iti dayta a lugar.” Agbolboluntario ti ministerial nga adipen a ni Simon iti dayta a kongregasion a dakdakkel ti panagkasapulanna. Imbagana: “Kada bulan, adda kabsat iti kongregasion a magna iti agarup dua nga oras a mapan iti haywey sa aglugan a mapan iti ili a pagda-download-an dagiti kakabsat kadagiti video. Nagsiddaaw ti maysa a lalaki nga agtawen iti 70 idi naammuanna nga adda dagiti maipabuya a video iti gimong iti dayta a nagadayo a lugar. Isu nga iti umuna a gundaway, immatender iti gimong a kadua ti dua nga annakna. Imbagana, ‘Kastoy ti nasayaat a panagsursuro maipapan iti Dios.’”

Kastoy ti linaon ti maysa a surat ti panagyaman a naggapu idiay Russia: “Makatawenen nga agbuybuyakami iti JW Broadcasting ket maragragsakankami. Idi binuyami ti kaunaan a video, nariknami a dagus a naikaykaysakami kadagiti kakabsat iti intero a lubong! Nagmayat! Nariknami a pasetnakami ti maysa a dakkel a pamilia! Maragsakankami a makakita kadagiti ipatpategmi a miembro ti Bagi a Manarawidwid. Talaga nga ikagkagumaandakami nga ipaayan iti naespirituan a taraon iti umiso a tiempo, ket magun-odan ti amin dagita. Padpadaananmi a kanayon dagiti sumaruno a video. Ad-adda manen nga ipagpannakkelmi a maysakami a Saksi ni  Jehova. Pagyamanan, kakabsat! Agyamyamankami ken Jehova ken ni Kristo kadagiti nakaskasdaaw a bambanag nga ar-aramidenda. Mapabpabileg ken mabangbang-arankami!”

Nataenganen ken nakapuyen ti salun-at ti agassawa a taga-Germany a da Horst ken Helga. Insuratda: “Nagmayat ti JW Broadcasting. Mapabpabilegkami, aglalo kadagiti kapadasan dagiti kakabsat nga adda depekto wenno sakitna. Matigtignaykami kadagiti ulidanda a mangited iti amin a kabaelanmi uray no adda sakitmi. Idi nabuyami ti maipapan iti kabsat nga agserserbi kas panglakayen uray paralisado ti kagudua ti bagina, nasursuromi nga adda amin maitedtayo a napateg a banag ken Jehova. No mabuybuyami dagita a mapagulidanan a kakabsat, agyamyamankami ken Jehova ken ipakpakaasimi a bendisionanna ida.”

Imbaga ni Kodi a taga-England: “Pagyamanan iti tiempo ken kinagagetyo a mangar-aramid iti jw.org, JW Broadcasting, ken dagiti video da Caleb ken Sophia. Pagyamanan ta pinagbalinyo a nalaklaka a maawatan ti Biblia. Nabautisaranak idi walo ti tawenko. Inton medio dumakkelak, tumulongakto nga agibangon iti Kingdom Hall! Kayatko met ti agtrabaho idiay Bethel. Siam ti tawenkon, isu a dandanikon maaramid dayta.”

Insurat ti walo ti tawenna a ni Arabella a taga-England: “Thank you kadagiti video ken aktibidad. Mas naam-ammok ni Jehova gapu kadagita. Tultulongannak dagiti aktibidad iti jw.org a mangam-ammo ken Jehova, ken agen-enjoy-ak pay. Naglaingkayo a mangaramid kadagiti kanta nga alisto a maikabesa. Natulongannak met dagiti video da Caleb ken Sophia. Thank you iti kinagagetyo.”