IDI 1948, rinugianmi ken Paula ken ti balasangmi ti makigimong kadagiti Saksi ni Jehova idiay Blanco Arriba. Magmagnakami idi iti 40 a kilometro nga agpapan-agawid, ngem awan uray maysa a gimong ti naliwayanmi. Idi Enero 3, 1949, nabautisarankami ken Paula.

Innem a bulan kalpasanna, naaresto ti dadduma kadakami iti kongregasion ken nasentensiaankami a maibalud iti tallo a bulan. Maturogkami idi iti suelo ken maminsan la iti kada aldaw a maikkankami iti taraon—tumok a saba (green banana) ken tsaa. Idi nakaruarkamin iti pagbaludan, binutbutengdakami dagiti opisial ti gobierno ket impagarupda nga isardengmin ti mangasaba. Ngem idi nakaawidkamin, sililimed nga intuloymi ti naggigimong ken nangasaba. Gapu ta kanayon a sipsiputandakami dagiti pannakabagi ti gobierno, agtataripnongkami kadagiti balbalay, pagmulaan iti kape, wenno iti kataltalonan.  Imbes a maymaysa a lugar ti maulit-ulit a pagtataripnonganmi, ipakaammomi iti kada ngudo ti gimong ti sumaruno a paggigimongan. Mapankami mangasaba idi a saggaysa; nakabadokami iti pangtrabaho, ken awan itugotmi a literatura ken Biblia. Kaskasdi a namin-adu a naibaludak iti pito a nagduduma a pagbaludan manipud 1949 agingga iti 1959. Tallo agingga iti innem a bulan ti sentensiak tunggal maibaludak.

Agan-annadak idi ta dagiti kakabagiak ti bumusbusor kaniak. Uray no maturogak iti kabambantayan wenno iti kataltalonan tapno didak mabirokan, matiliwandak latta no dadduma. Iti naminsan a naarestoak, impandak idiay La Victoria a pagbaludan iti Ciudad Trujillo. Adda 50 agingga iti 60 a balud iti maysa a selda sadiay. Mamindua a pakanendakami iti kada aldaw—nagiling a mais iti bigat ken sangkabassit nga inapoy ken bukbukel iti aldaw. Siempre, kinasabaan ti amin a Saksi dagiti padada a balud. Regular a naggigimongkami babaen ti panangibagami kadagiti kabesadomi a teksto ti Biblia, ken panangyestoria kadagiti kapadasanmi iti ministerio.

Iti naudi a pannakaibaludko, maysa a soldado ti nangipang-or iti putan ti paltogna iti ulok ken iti paragpagko. Sagsagabaek pay laeng dagiti epekto daydi a pannakapangpang-or ken dadduma pay a pannakamaltratok. Ngem gapu kadagidiay a pannakasubok, nasursurok ti agandur ken bimmileg ti pammatik ken determinasionko nga agserbi ken Jehova.

Agtawenakon iti 96 ken agserserbiak kas ministerial nga adipen iti kongregasionmi. Diakon makapagna iti adayo isu nga agtugawak iti sango ti balaymi tapno kasabaak ti amin a lumabas. Para kaniak, saan nga arapaap ti namnama nga ipaay ti Pagarian. Agpaypayso dayta, ken ikaskasabakon iti nasurok nga 60 a tawen. Pudpudno kaniak ti baro a lubong, a kas met laeng idi damo a nangngegko ti mensahe ti Pagarian. *