Salmo 89:1-52
Maskil.* Salmo ni Etan+ nga Ezrahita.
89 Agnanayon nga agkantaakto maipapan kadagiti ebkas ti napudno nga ayat ni Jehova.
Isarsaritakto ti kinamatalekna iti amin a henerasion.
2 Ta kinunak: “Agtalinaedto iti agnanayon ti napudno nga ayat,+Ket sititibker nga impasdekmo idiay langit ti kinamatalekmo.”
3 “Nakitulagak ken David, ti adipenko a pinilik;+Inkarik kenkuana:+
4 ‘Pagtalinaedekto ti kaputotam*+ iti agnanayon,Ket pagtalinaedekto ti tronom iti amin a henerasion.’”+ (Selah)
5 O Jehova, idaydayaw ti langit dagiti nakaskasdaaw nga aramidmo,Wen, iti kongregasion dagiti nasantuan maidaydayaw ti kinamatalekmo.
6 Ta asino iti langit ti mabalin nga ipada ken Jehova?+
Asino kadagiti annak ti Dios+ ti kas ken Jehova?
7 Ti Dios ket mararaem unay iti ummong* dagiti nasantuan;+Kadagiti adda iti aglawlawna, isu ket nakaskasdaaw ken naindaklan.+
8 O Jehova a Dios dagiti armada,Asino ti mannakabalin a kas kenka, O Jah?+
Iti amin a banag, kanayon a matalekka.+
9 Kontroladom ti panagdawel ti baybay;+No dumakkel dagiti dalluyonna, pagtalnaem ida.+
10 Rinumekmo ti Rahab+ ket pinataymo.+
Babaen ti napigsa a takiagmo, inwarawaram dagiti kabusormo.+
11 Kukuam ti langit ken kukuam ti daga;+Ti nabunga a daga ken amin a nagyanna+—pinarsuam amin ida.
12 Ti amianan ken ti abagatan ket inaramidmo;Siraragsak nga idaydayaw ti Tabor+ ken Hermon+ ti naganmo.
13 Ti takiagmo ket mannakabalin;+Ti imam ket napigsa,+Ti makannawan nga imam ket maitan-ok.+
14 Kinalinteg ken kinahustisia ti pundasion ti tronom;+Napudno nga ayat ken kinamatalek ti adda iti sangom.+
15 Naragsak dagiti tattao a mangidaydayaw kenka iti napigsa a timek.+
O Jehova, magmagnada iti lawag ti naraniag a rupam.
16 Agmalmalem a pagragsakanda ti naganmo,Ket maitan-okda gapu iti kinalintegmo.
17 Ta sika ti dayag ken pigsada,+Ken gapu ta aprobarannakami, manaynayonan ti pigsami.*+
18 Ta kukua ni Jehova ti kalasagmi,Daydiay Nasantuan a Dios ti Israel ti makinkukua iti arimi.+
19 Iti maysa a sirmata iti dayta a tiempo, imbagam kadagiti napudno kenka:
“Pinapigsak ti maysa a mannakabalin;+Intan-okko ti maysa a pinilik manipud kadagiti tattao.+
20 Nakitak ni David nga adipenko;+Dinutokak* babaen ti nasantuan a lanak.+
21 Ti imak ti tumulong kenkuana,+Ken ti takiagko ti mangpapigsa kenkuana.
22 Awanto ti kabusor a mangsingir iti buis kenkuana,Ken awan ti managdakdakes a mangparigat kenkuana.+
23 Rumekekto dagiti kabusorna iti imatangna,+Ket papatayekto dagiti gumurgura kenkuana.+
24 Ipakitakto kenkuana ti kinamatalek ken ti napudno nga ayatko,+Ket nayonakto ti pigsana* maigapu iti naganko.
25 Ikabilkonto ti imana* iti baybayKen ti kannawan nga imana kadagiti karayan.+
26 Umawagto kaniak, ‘Sika ti Amak,Ti Diosko ken ti Dakkel a Bato a pakaisalakanak.’+
27 Ken isaadkonto a kas inauna,+Ti kangatuan kadagiti ari iti daga.+
28 Agnanayon nga ipakitakto kenkuana ti napudno nga ayatko,+Ket dinto pulos mawaswas ti tulagko kenkuana.+
29 Pagtalinaedekto iti agnanayon dagiti kaputotanna*Ket agpautto a kas iti langit ti tronona.+
30 No saan a tungpalen dagiti annakna ti lintegkoKen saanda a suroten dagiti bilinko,*
31 No sukirenda dagiti paglintegakKet saanda nga aramiden dagiti bilinko,
32 Bautekto ida a kas panangdusak gapu iti kinasukirda*+Ken saplitekto ida gapu iti kamalida.
33 Ngem diakto pulos ikkaten ti napudno nga ayatko kenkuana,+Saankonto met nga ibabawi ti karik kenkuana.*
34 Saankonto a lipaten ti tulagko,+Wenno baliwan ti inyebkasen ti bibigko.+
35 Gapu ta nasantuanak, namimpinsan nga inkarik;Saanakto nga agulbod ken David.+
36 Agtalinaedto iti agnanayon dagiti kaputotanna;*+Ket iti imatangko, agpautto a kas iti init ti tronona.+
37 Kas iti bulan, natibkerto ti pannakaipasdekna iti agnanayonKas maysa a matalek a saksi iti tangatang.” (Selah)
38 Ngem binaybay-am ken inlaksidmo;+Nakapungtotka iti daydiay dinutokam.*
39 Binaybay-am ti tulagmo iti adipenmo;Saanmo a rinaem ti koronana ket imbarsakmo iti daga.
40 Tinumbam ti amin a paderna;*Rinebbam dagiti natibker a bakudna.
41 Tinakawan ti amin a lumabas iti dalan;Inuy-uyaw dagiti kaarrubana.+
42 Pinagballigim dagiti kalabanna;*+Pinaragsakmo ti amin a kabusorna.
43 Insublim met ti espadana iti kalubanna,Ken binaybay-am a maabak iti paggugubatan.
44 Pinagpatinggam ti kinadayagnaKet imbalintuagmo ti tronona iti daga.
45 Pinaababam dagiti aldaw ti kinaagtutubona;Ket linapunosmo iti bain. (Selah)
46 O Jehova, agingga iti kaano a dinak ikaskaso? Agnanayon kadi?+
Agtultuloy kadi ti pungtotmo a kas iti sumsumged nga apuy?
47 Lagipem no kasano kaababa ti biagko!+
Awan kadi ti serserbi ti panangparsuam iti amin a tattao?
48 Adda aya tao a saan a pulos a matay?+
Malisianna aya ni Tanem?* (Selah)
49 O Jehova, ayandan dagiti pakakitaan iti napudno nga ayatmo,Nga inkarim ken David gapu iti kinamatalekmo?+
50 Lagipem, O Jehova, ti pannakauy-uyaw dagiti adipenmo;No kasano nga ib-ibturak* ti pananguyaw ti amin a tattao;
51 No kasano ti pananginsulto dagiti kabusormo, O Jehova;No kasano ti pananginsultoda iti tunggal addang daydiay dinutokam.
52 Maidaydayaw koma ni Jehova iti agnanayon. Amen ken Amen.+
Footnotes
^ Lit., “bin-im.”
^ Wenno “asamblea.”
^ Lit., “sarami.”
^ Wenno “Pinulotak.”
^ Lit., “sarana.”
^ Wenno “autoridadna.”
^ Lit., “bin-ina.”
^ Wenno “pangngeddengko.”
^ Wenno “panagrebeldeda.”
^ Lit., “Saanakto met nga agbalin nga ulbod iti kinamatalekko.”
^ Lit., “bin-ina.”
^ Wenno “pinulotam.”
^ Wenno “bato a balayna.”
^ Lit., “Impangatom ti makannawan nga ima dagiti kalabanna.”
^ Lit., “aw-awitek iti barukongko.”
