Salmo 56:1-13
Iti direktor; naisurot iti tono “Ti Naulimek a Kalapati nga Adda iti Adayo.” Salmo ni David. Miktam.* Idi tiniliw dagiti Filisteo idiay Gat.+
56 Kaasiannak, O Dios, ta adda tao a mangdardarup* kaniak.
Agmalmalem a rarauten ken idaddadanesdak.
2 Agmalmalem a dardarupendak dagiti kalabanko;Adu ti sipapangas a bumusbusor kaniak.
3 No mabutengak,+ sika ti pagtalkak.+
4 Iti Dios—nga idaydayawko ti saona—Agtalekak iti Dios; saanak a mabuteng.
Ania ti maaramidan kaniak ti tao* laeng?+
5 Agmalmalem a saksaktandak;Kanayon a pampanunotenda ti panangdangranda kaniak.+
6 Dida ipadpadlaw ti idadarupda;Sipsiputanda ti amin a garawko,+Mangnamnamada a makettelda ti biagko.*+
7 Ilaksidmo ida gapu iti kinadakesda.
Gapu iti pungtotmo, O Dios, dusaem dagiti nasion.+
8 Nakitam amin a rigatko bayat nga itartarayak ti kabusorko.+
Urnongem koma dagiti luluak iti lalat a pagkargaam.+
Saan aya a naisurat dagita iti librom?+
9 Iti aldaw nga agpatulongak, umatrasto dagiti kabusorko.+
Daytoy ti masiguradok: Ti Dios ket adda iti abayko.+
10 Iti Dios—nga idaydayawko ti saona—Ken Jehova—nga idaydayawko ti saona—
11 Agtalekak iti Dios; saanak a mabuteng.+
Ania ti maaramidan kaniak ti tao laeng?+
12 O Dios, masapul a tungpalek dagiti inkarik kenka;+Iyebkaskonto dagiti panagyamanko kenka.+
13 Ta manipud ken patay inispalnak+Ken linapdam ti pannakaitibkol dagiti sakak,+Tapno agtultuloyak nga agbiag ken magna iti imatang ti Dios.+
