Ebanghelio ni Mateo 24:1-51
-
PAGILASINAN TI KAADDA TI KRISTO (1-51)
24 Bayat a pumampanaw ni Jesus iti templo, immasideg dagiti adalanna tapno ipakitada kenkuana dagiti pasdek sadiay.
2 Kinunana kadakuada: “Makitayo kadi dagita? Pudno kunak kadakayo, awanto a pulos ti bato nga agtalinaed iti bato a nakaituonanna, marpuogdanto amin.”+
3 Bayat nga agtugtugaw iti Bantay Dagiti Olibo, immasideg dagiti adalan ket kinunada: “Ibagam kadakami, kaanonto a mapasamak dagita, ken anianto ti pagilasinan ti kaaddam*+ ken ti panungpalan daytoy a sistema ti bambanag?”*+
4 Insungbat ni Jesus: “Agannadkayo nga awan koma ti asinoman a mangallilaw kadakayo,+
5 ta adunto ti mangusar iti naganko, nga ibagbagada, ‘Siak ti Kristo,’ ket adunto ti maallilawda.+
6 Makadamagkayto kadagiti gubat iti nadumaduma a lugar. Dikay agdanag, ta masapul a mapasamak dagitoy, ngem saan pay a panungpalan.+
7 “Ta bumusorto ti nasion iti sabali a nasion ken ti pagarian iti sabali a pagarian,+ ket addanto met bisin+ ken ginggined iti nadumaduma a lugar.+
8 Amin dagitoy ti pangrugian dagiti rigat.
9 “Parigatendakayto+ dagiti tattao ken papatayendakayo,+ ket guraendakayto ti amin a nasion gapu iti naganko.+
10 Adunto met ti maitibkol, ket traidoren ken guraendanto ti maysa ken maysa.
11 Adunto ti tumaud nga ulbod a propeta ket adunto met ti maallilawda;+
12 ket gapu iti ikakaro ti kinadakes, lumamiisto ti ayat ti ad-adu.
13 Ngem ti makapagibtur* agingga iti panungpalan, maisalakanto.+
14 Ti naimbag a damag maipapan iti Pagarian maikaskasabanto iti intero a daga tapno maammuan ti* amin a nasion;+ kalpasanna, umayton ti panungpalan.
15 “Gapuna, inton makitayo ti makarimon a banag a mangdadael, nga agtaktakder iti nasantuan a lugar,+ kas impadto ni propeta Daniel (tarusan koma ti agbasa ti kaipapanan daytoy),
16 dagidiay adda idiay Judea agkamangda koman iti kabambantayan.+
17 Asinoman nga adda iti tuktok ti balay umulog koman ken saanen a mangala iti kasapulanna iti uneg ti balayna,
18 ket asinoman nga adda iti talon saan koman nga agawid a mangala iti kagayna.
19 Kaasi pay dagiti masikog ken agpaspasuso kadagita nga aldaw!
20 Ikarkararagyo a ti panagkamangyo ket saan koma a mapasamak iti tiempo ti lam-ek wenno iti aldaw ti Sabbath;
21 ta addanto dakkel a rigat+ a saan pay a napaspasamak manipud idi panangrugi ti lubong agingga ita, ken dinto met mauliten.+
22 Kinapudnona, no saan a mapaababa dagita nga aldaw, awan ti maisalakan; ngem mapaababanto dagita gapu kadagiti napili.+
23 “No addanto mangibaga, ‘Kitaenyo! Adda ditoy ti Kristo,’+ wenno, ‘Adda sadiay!’ diyo patpatien.+
24 Ta addanto dagiti sinsinan Kristo ken ulbod a propeta+ ket agaramiddanto iti dadakkel a pagilasinan ken nakaskasdaaw a bambanag tapno padasenda nga allilawen+ uray dagidiay napili.
25 Adtoy! Laglagipenyo a pinakdaarankayo.
26 No ngarud ibaga dagiti tattao, ‘Kitaenyo! Adda idiay let-ang,’ dikay mapan sadiay; ‘Kitaenyo! Adda iti uneg ti balay,’ diyo patpatien.+
27 Ta no kasano nga aggilap ti kimat iti tangatang manipud daya nga agpalaud, kastanto met ti kaadda* ti Anak ti tao.+
28 Sadinoman nga ayan ti bangkay, aguurnong sadiay dagiti agila.+
29 “Apaman a malpas ti rigat kadagidiay nga aldaw, agsipngetto ti init,+ saanto nga agraniag ti bulan, matnagto dagiti bituen ti langit, ken magunggonto dagiti pannakabalin iti langit.+
30 Kalpasanna, agparangto iti langit ti pagilasinan ti Anak ti tao, ket ti amin a tribu ti daga banugbogendanto ti barukongda gapu iti ladingit,+ ket makitadanto ti Anak ti tao+ nga um-umay kadagiti ulep ti langit nga addaan pannakabalin ken dakkel a dayag.+
31 Mapuyotanto a sipipigsa ti trumpeta ket ibaonnanto dagiti anghelna a mangummong kadagiti pinilina manipud iti uppat nga angin, manipud iti maysa nga ungto ti langit agingga iti sabali nga ungtona.+
32 “Adda masursuroyo iti ilustrasion maipapan iti kayo a higos: No agbulongen dagiti naganus a sangana, ammoyo a dandanin ti kalgaw.+
33 Isu nga inton makitayo a mapaspasamaken amin dagitoy a banag, masiguradoyo nga isu ket asidegen kadagiti ridaw.+
34 Pudno kunak kadakayo a saanto a pulos lumabas daytoy a henerasion agingga a mapasamak amin dagitoy a banag.
35 Agpukaw man ti langit ken daga, agtalinaedto latta dagiti saok.+
36 “No maipapan iti dayta nga aldaw ken oras, awan ti makaammo,+ uray dagiti anghel idiay langit wenno ti Anak, no di laeng ti Ama.+
37 Ta no ania ti kasasaad idi kaaldawan ni Noe,+ kastanto met ti kasasaad iti kaadda* ti Anak ti tao.+
38 Ta dagiti tattao sakbay ti Layus ket mangmangan, umin-inum, ken agaassawa, agingga iti aldaw a simrek ni Noe iti daong.+
39 Saanda a nangikankano agingga a dimteng ti Layus ket nayanudda amin.+ Kastanto met iti kaadda ti Anak ti tao.
40 Addanto dua a lallaki iti talon; maalanto ti maysa ket mabatinto ti sabali.
41 Addanto dua a babbai nga aggilgiling iti paggilingan; maalanto ti maysa ket mabatinto ti sabali.+
42 Isu nga itultuloyyo ti agbantay, ta diyo ammo no ania nga aldaw nga umay ti Apoyo.+
43 “Ngem panunotenyo daytoy: No ammo ti bumalay no ania nga oras iti rabii nga umay ti mannanakaw,+ nagtalinaed koma a siririing ken dina koma impalubos a maserrek ti balayna.+
44 Gapu iti daytoy, kanayon koma a nakasaganakayo,+ ta umay ti Anak ti tao iti oras a saanyo nga ipagarup.
45 “Asino a talaga ti matalek ken masirib nga adipen a dinutokan ti apona a mangaywan kadagiti adipen iti balayna, tapno ipaayna ti taraonda iti umiso a tiempo?+
46 Naragsak dayta nga adipen no masangpetan ti apona a kasta ti ar-aramidenna!+
47 Pudno kunak kadakayo, dutokannanto a mangaywan iti amin a sanikuana.
48 “Ngem no dakes dayta nga adipen ket ibagana iti bagina, ‘Mabayag pay a sumangpet ti apok,’+
49 ket kabilenna dagiti padana nga adipen sa makipangan ken makiinum kadagiti mammartek,
50 umayto ti apona iti aldaw a saanna a namnamaen ken iti oras a saanna nga ammo,+
51 ket dusaennanto iti nakaro ken ipanna iti ayan dagiti managinsisingpet, ket agsangit ken agngaretngetto.+
