Ebanghelio ni Mateo 20:1-34
20 “Ti Pagarian ti langit ket mayarig iti maysa nga ulo ti sangakabbalayan nga addaan iti kaubasan,+ a nasapa a rimmuar iti bigat tapno agbirok kadagiti trabahador a tangdananna.
2 Kalpasan ti pannakitulagna a tangdananna ida iti maysa a denario* para iti maysa nga aldaw, imbaonna ida iti kaubasanna.
3 Rimmuar met iti agarup alas nuebe ti bigat* ket nakitana dagiti agtaktakder iti pagtagilakuan nga awan ti ar-aramidenda.
4 Kinunana kadakuada, ‘Mapankayo met iti kaubasak, ket itedkonto ti rumbeng a tangdanyo.’
5 Iti kasta, napanda. Rimmuar manen iti agarup alas dose ti aldaw* ken alas tres ti malem* ket nagbirok iti dadduma pay a trabahador.
6 Rimmuar pay iti agarup alas singko ti malem* ket adda dagiti nasarakanna nga agtaktakder, ket kinunana kadakuada, ‘Apay nga agtaktakderkayo ditoy nga agmalmalem nga awan ti ar-aramidenyo?’
7 Insungbatda, ‘Awan met ngamin ti nangayab kadakami nga agtrabaho.’ Imbagana kadakuada, ‘Inkayo met iti kaubasak.’
8 “Idi rumabiin, kinuna ti makinkukua iti kaubasan iti katalekna, ‘Ayabam dagiti trabahador ket itedmo ti tangdanda.+ Iyun-unam dagiti naud-udi a naayaban sa iyud-udim dagiti immun-una.’
9 Idi immay dagiti naayaban iti alas singko ti malem,* naikkanda iti saggaysa a denario.*
10 Isu nga idi immay dagiti immuna a naayaban, impagarupda a dakdakkel ti tangdanda, ngem naikkanda iti saggaysa laeng a denario.*
11 Idi maawatda dayta, nagreklamoda iti ulo ti sangakabbalayan
12 ket kinunada, ‘Maysa nga oras laeng a nagtrabaho dagiti naudi nga immay, ngem impadam kadakami ti tangdanda nupay nagrigrigatkami a nagtrabaho nga agmalmalem iti kapudotan!’
13 Ngem insungbatna iti maysa kadakuada, ‘Gayyem, awan ti dakes nga inaramidko kenka. Saan kadi a nagtulagta a maysa a denario* ti tangdanmo?+
14 Alaem ti tangdanmo ket inkan. Kayatko nga ited iti naud-udi nga immay ti kas iti tangdanmo.
15 Awan aya ti kalintegak a mangaramid iti kayatko iti sanikuak? Wenno umapal* kadi ta matam, gapu ta naimbagak?’*+
16 Iti kasta, dagiti naudi umunadanto ket dagiti immuna maudidanto.”+
17 Bayat a sumangsang-atda idiay Jerusalem, kinasarita ni Jesus ti 12 nga adalan ket kinunana kadakuada iti dalan:+
18 “Sumangsang-attayon idiay Jerusalem, ket mayawatto ti Anak ti tao kadagiti panguluen a papadi ken eskriba. Ikeddengdanto a mapapatay+
19 sa iyawatda iti tattao kadagiti nasion tapno mapagkakatawaan, masapsaplit, ken mailansa iti kayo.+ Ngem mapagungarto iti maikatlo nga aldaw.”+
20 Immasideg ken Jesus ti ina dagiti annak ni Zebedeo+ agraman ti dua nga annakna. Nagruknoy sa nagkiddaw iti maysa a banag.+
21 Insaludsod ni Jesus: “Ania ti kayatmo?” Insungbatna: “Inton agturayka iti Pagariam, pagtugawem koma ti dua nga annakko iti makannawan ken makannigidmo.”+
22 Kinuna ni Jesus: “Saanyo nga ammo ti kidkiddawenyo. Kabaelanyo kadi ti uminum iti kopa nga asidegen nga uminumak?”+ Insungbatda: “Kabaelanmi.”
23 Kinunana kadakuada: “Pudno nga uminumkayto iti kopak.+ Ngem saan a siak ti mangpili no siasino ti agtugaw iti makannawan ken makannigidko, ta para dayta kadagidiay nangisaganaan ni Amak.”+
24 Idi nangngeg dayta ti 10 pay nga apostol, nasuronda kadagiti agkabsat.+
25 Ngem inayaban ida ni Jesus sa kinunana: “Ammoyo a dagiti agturay kadagiti nasion dominaranda dagiti iturayanda ken dagidiay natan-ok usarenda ti autoridadda kadagiti umili.+
26 Saan a kasta ti aramidenyo.+ Ngem asinoman a mayat nga agbalin a natan-ok, isu ti agserbi kadakayo,+
27 ken asinoman a mayat nga agbalin a kangrunaan kadakayo, isu ti agbalin nga adipenyo.+
28 Ta immay ti Anak ti tao, saan a tapno pagserbian, no di ket tapno agserbi+ ken itedna ti biagna* kas pangsubbot iti adu.”+
29 Bayat a pumampanawda iti Jerico, adu a tattao ti simmurot kenkuana.
30 Adda dua a bulsek a lallaki a nakatugaw iti igid ti dalan ket nangngegda a lumablabas ni Jesus isu nga impukkawda: “Apo, kaasiannakami, Anak ni David!”+
31 Ngem inungtan ida dagiti tattao ken imbagada nga agulimekda, ngem impigpigsada pay nga impukkaw: “Apo, kaasiannakami, Anak ni David!”
32 Nagsardeng ni Jesus ket inayabanna ida sa kinunana: “Ania ti kayatyo nga aramidek kadakayo?”
33 Insungbatda: “Apo, makakitakami koma.”
34 Naasian ni Jesus isu a sinagidna dagiti matada.+ Dagus a nakakitada ket simmurotda kenkuana.
Footnotes
^ Lit., “agarup maikatlo nga oras.”
^ Lit., “agarup maikanem nga oras.”
^ Lit., “agarup maikasiam nga oras.”
^ Lit., “agarup maika-11 nga oras.”
^ Lit., “maika-11 nga oras.”
^ Lit., “dakes.”
^ Wenno “naparaburak.”
^ Wenno “kararuana.”
