Isaias 7:1-25
7 Idi kaaldawan ni Ahaz+ nga anak ni Jotam nga anak ni Uzias, nga ari ti Juda, immay ni Ari Rezin ti Siria ken ni Peka+ nga ari ti Israel, nga anak ni Remalias, tapno gubatenda ti Jerusalem, ngem saanna* a nasakup dayta.+
2 Naipadamag iti sangakabbalayan ni David: “Kimmappon ti Siria iti Efraim.”
Nagpigerger ti puso ni Ahaz ken ti puso ti ilina gapu iti buteng, kas kadagiti kayo iti kabakiran nga ipallapallayog ti angin.
3 Kinuna ni Jehova ken ni Isaias: “Pangngaasim ta mapanka ken Ahaz, sika ken ti anakmo a ni Sear-jasub,*+ iti ungto ti pagayusan ti danum iti makinngato a pagurnongan iti danum,+ iti abay ti kalsada nga agturong iti paglalabaan.
4 Ibagam kenkuana, ‘Agtalinaedka a kalmado. Dika agbuteng, ken saanmo a pakapuyen ti pakinakemmo gapu kadagitoy dua a puon ti agas-asuk a troso, gapu iti nakaro a pungtot ni Rezin nga ari ti Siria ken ti anak ni Remalias.+
5 Ta nagkukumplot ti Siria, Efraim, ken ti anak ni Remalias maibusor kenka, ket kinunada:
6 “Gubatentayo ti Juda ket pagsisinaen* ken sakupentayo,* sa pagbalinentayo nga ari ti anak ni Tabeel.”+
7 “‘Daytoy ti kinuna ti Kangatuan* nga Apo Jehova:
“Saanto nga agballigi dayta,Ken saanto a mapasamak.
8 Ta ti Damasco ti ulo ti Siria,Ket ni Rezin ti ulo ti Damasco.
Iti 65 laeng a tawenNaan-anayto a madadael ti Efraim ken saanton nga ili.+
9 Ti Samaria+ ti ulo ti Efraim,Ket ti anak ni Remalias+ ti ulo ti Samaria.
No saan a natibker ti pammatim,Saankanto a natalged.”’”
10 Kinuna pay ni Jehova ken ni Ahaz:
11 “Agkiddawka iti pagilasinan ken Jehova a Diosmo;+ kas kauneg man dayta ti Tanem* wenno kas kangato ti tangatang.”
12 Ngem kinuna ni Ahaz: “Saanakto nga agkiddaw, ken saankonto met a suboken ni Jehova.”
13 Kinuna ni Isaias: “Pangngaasiyo ta dumngegkayo, O sangakabbalayan ni David. Kurang pay kadi ti panangsubokyo iti anus dagitoy a lallaki? Kayatyo met kadi a suboken ti anus ti Dios?+
14 Gapuna, ikkannakayto ni Jehova iti pagilasinan: Agsikogto ti maysa a balasang* ken mangyanak iti lalaki,+ ket panaganannanto iti Immanuel.*+
15 Manganto iti mantekilia ken diro inton ammonan a laksiden ti dakes ken pilien ti naimbag.
16 Ta sakbay nga ammo ti ubing a laksiden ti dakes ken pilien ti naimbag, mabaybay-anto a naan-anay ti daga ti dua nga ari a pagbutbutngam.+
17 Iyegto ni Jehova maibusor kenka, iti ilim, ken iti sangakabbalayan ni amam ti narigat a tiempo a saan pay a napasamak manipud idi simmina ti Efraim iti Juda,+ ta ibaonnanto ti ari ti Asiria.+
18 “Iti dayta nga aldaw, paswitanto ni Jehova dagiti ngilaw iti adayo a pagay-ayusan ti danum ti Nilo iti Egipto ken dagiti uyokan iti Asiria,
19 ket mapan ken agyandanto amin kadagiti bakras ti tanap,* iti birri ti dadakkel a bato, iti amin a siitan a kayo, ken iti amin a lugar nga adda danumna.
20 “Iti dayta nga aldaw, babaen ti naabangan a labaha iti rehion ti Karayan,* babaen ti ari ti Asiria,+ kiskisanto ni Jehova ti buok ti ulo, saka, agraman ti barbas.
21 “Iti dayta nga aldaw, pagtalinaedento ti maysa a tao a sibibiag ti maysa nga urbon a baka iti arban ken dua a karnero.
22 Ken gapu ta adu ti gatas, manganto iti mantekilia, ta manganto iti mantekilia ken diro ti amin a natedda iti daga.
23 “Iti dayta nga aldaw, dagiti laeng siitan a kayo ken ruot ti agtubo iti dati nga ayan ti 1,000 a puon ti ubas nga aggatad iti 1,000 a pedaso a pirak.
24 Mapanto sadiay dagiti lallaki nga addaan iti bai ken pana, gapu ta napno ti daga iti siitan a kayo ken ruot.
25 Saankanto nga umasideg kadagiti bantay a dati a madaldalusan iti gabion gapu iti butengmo kadagiti siitan a kayo ken ruot. Agbalinto dagita a pagaraban dagiti kalakian a baka ken dagiti karnero.”
Footnotes
^ Wenno mabalin a, “saanda.”
^ Kaipapananna, “Natda Laeng ti Agsubli.”
^ Wenno mabalin a, “butbutngen.”
^ Wenno “giwangantayo dagiti paderna.” Lit., “wakwakantayo.”
^ Wenno “Soberano.”
^ Wenno “nga agtutubo a babai.”
^ Kaipapananna, “Adda Kadatayo ti Dios.”
^ Karayan a maaddaan laeng iti danum no panagtutudo.
^ Kayatna a sawen, ti Eufrates.
