Isaias 47:1-15
47 Bumabaka ket agdalupisakka iti tapok,O birhen nga anak a babai ti Babilonia.+
Agtugawka iti daga nga awanan iti trono,+O anak a babai dagiti Caldeo,Ta saandakanton nga iyalikaka ken pagustuan dagiti tattao.
2 Mangalaka iti gilingan ket aggilingka iti arina.
Ikkatem ti abungotmo.
Uksobem ti paldam, lukaisam ta gurongmo.
Ballasiwem dagiti karayan.
3 Maipakitanto ti labus a bagim.
Maibabainkanto.
Agibalesakto+ ket awanto ti tao a makaigawid kaniak.*
4 “Daydiay mangsaka kadatayo—Jehova a panguluen dagiti armada ti naganna—Ket Daydiay Nasantuan ti Israel.”+
5 Agtugawka a siuulimek ket mapanka iti kasipngetan,O anak a babai dagiti Caldeo;+Saandakanton nga awagan iti Reyna* dagiti Pagarian.+
6 Nakapungtotak iti ilik.+
Binay-ak a marugitan ti tawidko,+Ken inyawatko ida iti imam.+
Ngem saanmo a kinaasian ida.+
Pinadagsenam uray dagiti nataengan.+
7 Imbagam: “Agnanayonto a siak ti Reyna.”*+
Saanmo nga impapuso dagitoy a banag;Saanmo a pinanunot ti pagbanaganda.
8 Ita, denggem daytoy, sika a managayat iti ragragsak,+Nga agtugtugaw a sitatalged, ken mangibagbaga iti pusona:
“Siak, ket awanen ti sabali.+
Saanakto a mabalo.
Saankonto a mapadasan ti maawanan iti annak.”+
9 Ngem bigla a mapasamakto kenka daytoy dua a banag iti maymaysa nga aldaw:+
Maawanankanto iti annak ken mabaloka.
Mapasamakto amin daytoy kenka+Gapu iti* adu a panagkulam ken nabileg a panag-engkantom.+
10 Nagtalekka iti kinadakesmo.
Kinunam: “Awan ti makakita kaniak.”
Inyaw-awannaka ti kinasirib ken pannakaammom,Ken ibagbagam iti pusom: “Siak, ket awanen sabali.”
11 Ngem madidigrakanto,Ket saanto a mapasardeng dayta ti panag-engkantom.*
Agrigatkanto; dimonto maliklikan dayta.
Dagus a madadaelkanto iti wagas a saanmo nga ammo.+
12 Ituloymo ngarud ti panag-engkantom ken ti nakaro a panagkulammo,+Nga inaramidmo manipud pay idi agtutuboka.
Bareng magunggonaanka;Bareng mapagsiddaawmo dagiti tattao.
13 Naumakan iti adu a mangbalbalakad kenka.
Patakderem man ida ita tapno isalakandaka,Dagidiay agdaydayaw iti langit,* a kumitkita kadagiti bituen,+Dagidiay mangmangted iti pannakaammo tunggal baro a bulanMaipapan kadagiti banag a dumteng kenka.
14 Kasda la garami.
Mauramdanto iti apuy.
Saanda a maisalakan ti bagida iti darang ti apuy.
Saanda a beggang a pagpapudot,Ken saan nga apuy a paginuduan.
15 Kastanto ti pagbalinan dagiti engkantadormo,Dagidiay binannogmo manipud kinaagtutubom.
Mayaw-awandanto, agturongda iti bukodda a direksion.*
Awanto ti mangisalakan kenka.+
Footnotes
^ Wenno mabalin a, “ket saankonto a sanguen a siaasi ti asinoman.”
^ Wenno “Apo a Babai.”
^ Wenno “Apo a Babai.”
^ Wenno mabalin nga, “Iti laksid ti.”
^ Wenno “Ket saanmonto nga ammo a pasardengen dayta babaen ti panag-engkantom.”
^ Wenno mabalin a, “Dagidiay mangbingbingay iti langit; Dagiti astrologo.”
^ Lit., “bukodda a rehion.”
