Deuteronomio 30:1-20
30 “Inton mapasamak kadakayo amin dagitoy a sasao, ti bendision ken ti lunod nga inkabilko iti sanguananyo,+ ket malagipyo* dagita+ inton addakayo kadagiti nasion a pangiwarawaraan kadakayo ni Jehova a Diosyo,+
2 ket agsublikayo ken Jehova a Diosyo+ ken ipangagyo ti timekna iti amin a puso ken iti amin a kararuayo,*+ maitunos iti amin nga ibilinko kadakayo ita nga aldaw, dakayo ken dagiti annakyo,
3 isublinto met ni Jehova a Diosyo dagiti naipanaw kadakayo+ ket kaasian+ ken ummongennakayo manen manipud iti amin a nasion a nangiwarawaraan kadakayo ni Jehova a Diosyo.+
4 Uray no naipankayo iti ungto ti daga, ummongennakayto ni Jehova a Diosyo tapno isublinakayo.+
5 Ipannakayto ni Jehova a Diosyo iti daga a tinagikua dagidi ammayo, ket tagikuaenyonto dayta. Bendisionan ken pagbalinennakayto nga ad-adu ngem kadagidi ammayo.+
6 Dalusanto* ni Jehova a Diosyo ti pusoyo ken ti puso dagiti annakyo+ tapno ayatenyo ni Jehova a Diosyo iti amin a puso ken iti amin a kararuayo* ket agbiagkayto.+
7 Iti kasta, ipalak-amto ni Jehova a Diosyo amin dagitoy a lunod kadagiti kabusoryo, a nanggura ken nangidadanes kadakayo.+
8 “Agsubli ken ipangagyonto ti timek ni Jehova ket tungpalenyo ti amin a bilinna nga itedko kadakayo ita.
9 Pagballigiento ni Jehova a Diosyo ti amin nga aramidenyo,+ paaduennanto dagiti annakyo, dagiti tarakenyo, ken dagiti apit iti dagayo, ta maragsakanto manen ni Jehova a mangparang-ay kadakayo, kas iti ragsakna a nangparang-ay kadagidi ammayo.+
10 Iti kasta, ipangagyonto ti timek ni Jehova a Diosyo ken surotenyo dagiti bilin ken paglinteganna a naisurat iti daytoy a libro ti Linteg, ket agsublikayto ken Jehova a Diosyo iti amin a puso ken iti amin a kararuayo.*+
11 “Saan a narigat ken kabaelanyo a tungpalen* daytoy a bilin nga itedko ita kadakayo.+
12 Awan daytoy idiay langit, tapno ibagayo, ‘Asinonto ti umuli idiay langit a mangala, tapno maammuan ken matungpaltayo?’+
13 Awan met iti ballasiw ti baybay, tapno ibagayo, ‘Asinonto ti bumallasiw iti baybay a mangala, tapno maammuan ken matungpaltayo?’
14 Ta nakaas-asideg kadakayo ti sao ti Linteg, adda dagita iti ngiwat ken pusoyo,+ tapno matungpalyo.+
15 “Ikabilko ita nga aldaw iti sanguananyo ti biag ken bendision, ti ipapatay ken lunod.+
16 No ipangagyo dagiti bilin ni Jehova a Diosyo nga ibilinko kadakayo ita, babaen ti panangayatyo ken Jehova a Diosyo,+ pannagnayo iti dalanna, ken panangtungpalyo kadagiti bilin, paglintegan, ken pangngeddengna, agbiagkayto+ ken umadukayo, ket bendisionannakayto ni Jehova a Diosyo iti daga a tagikuaenyo.+
17 “Ngem no tumallikud ti pusoyo+ ken dikay mangipangag ket masulisog ken agdayawkayo kadagiti sabali a dios ken agserbikayo kadakuada,+
18 ibagak kadakayo ita a sigurado a madadaelkayto.+ Saankayto nga agbiag iti napaut iti daga a tagikuaenyo iti ballasiw ti Jordan.
19 Saksik ti langit ken ti daga maibusor kadakayo ita nga aldaw, nga inkabilko ti biag ken ipapatay iti sanguananyo, ti bendision ken ti lunod;+ ket masapul a pilienyo ti biag tapno agbiagkayo,+ dakayo ken dagiti annakyo,+
20 babaen ti panangayatyo ken Jehova a Diosyo,+ panangipangagyo iti timekna, ken panagmatalekyo kenkuana,+ ta isu ti biagyo ken pagbalinennanto a napaut ti panagnaedyo iti daga nga insapata ni Jehova nga ited kadagidi ammayo, da Abraham, Isaac, ken Jacob.”+
