Deuteronomio 21:1-23
21 “No adda masarakanyo a bangkay ti tao iti daga nga ited ni Jehova a Diosyo a tagikuaenyo, ket saanyo nga ammo ti nangpapatay kenkuana,
2 mapan kitaen dayta dagiti panglakayen ken dagiti ukom+ ket rukodenda ti kaadayo ti bangkay kadagiti siudad iti aglawlawna.
3 Kalpasanna, dagiti panglakayen iti kaasitgan a siudad mangalada iti urbon a baka a saan pay a naus-usar a pagtrabaho, saan pay a naisangol,
4 ket ipanda dayta a baka iti tanap* nga agay-ayus ti danumna a saan a naarado wenno namulaan iti bukel, ket tukkolenda sadiay ti tengnged ti baka.+
5 “Umasideg dagiti papadi a Levita, ta pinili ida ni Jehova a Diosyo nga agserbi kenkuana,+ ket mangbendisionda iti nagan ni Jehova.+ Ibagada no kasano a masolbar ti tunggal kaso maipapan iti kinaranggas.+
6 Amin a panglakayen iti kaasitgan a siudad masapul a bugguanda dagiti imada+ iti ngatuen ti baka, a natukkol ti tengngedna iti tanap,
7 ket ibagada, ‘Saanmi nga imbukbok ti dara daytoy a tao, ket saanmi met a nakita idi napasamak dayta.
8 O Jehova, saanmo koma nga isingir daytoy iti Israel a sinubbotmo,+ ket saanmo met nga ipabasol iti Israel ti dara daytoy inosente a tao.’+ Iti kasta, saanto a maisingir kadakuada ti panagbasol iti dara.
9 Dikayto mapabasol iti dara ti inosente a tao ta inaramidyo ti umiso iti imatang ni Jehova.
10 “No gubatenyo dagiti kabusoryo ket abaken ida ni Jehova a Diosyo ken tiliwenyo ida kas balud,+
11 ket nakakitakayo kadakuada iti napintas a babai, a nagustuanyo ken kayatyo nga asawaen,
12 mabalinyo nga iyawid. Kalpasanna, masapul a kiskisanna ti ulona, agikuko,
13 ken suktanna ti bado a suotna idi natiliw, sa agyan iti balayyo. Sangitanna ni tatang ken nanangna iti makabulan.+ Kalpasanna, mabalinyon a dennaan ket agbalinto nga asawayo.
14 Ngem no dikayo naragsakan kenkuana, bay-anyo a mapan+ iti sadinoman a kayatna. Ngem diyo ilako wenno dangran, ta pinilityo nga asawaen.
15 “Kas pagarigan, dua ti asawa ti maysa a lalaki ket ad-adda nga ay-ayatenna ti maysa.* Agpada a naaddaanda iti anak a lalaki ngem ti inauna nga anak ket impasngay ti saan unay a maay-ayat.+
16 Inton itedna kadagiti annakna ti tawidna, saanna koma nga ited ti kalintegan kas inauna iti anak daydiay ad-adda nga ay-ayatenna, no di ket itedna dayta iti anak daydiay saan unay a maay-ayat ta isu ti inauna.
17 Masapul a bigbigenna kas inauna ti anak daydiay saan unay a maay-ayat babaen ti panangtedna iti doble a bingay iti aniaman nga adda kenkuana ta isu ti inauna nga anakna.* Adda kalinteganna kas inauna.+
18 “No adda nasukir ken rebelioso nga anak, ket saan nga agtultulnog ken tatang wenno nanangna,+ ken saanna a kayat ti dumngeg uray ilintegda,+
19 masapul nga ipan da tatang ken nanangna kadagiti panglakayen iti ruangan ti siudad
20 ket ibagada kadagiti panglakayen iti siudad, ‘Nasukir ken rebelioso daytoy nga anakmi, ken saanna a kayat ti agtulnog. Narawet+ ken mammartek.’+
21 Gapuna, uboren ti amin a tattao iti siudad agingga a matay. Masapul nga ikkatenyo ti dakes iti tengngayo. Madamagto dayta ti intero nga Israel ket agbutengda.+
22 “No makaaramid ti maysa a tao iti basol a maikari iti ipapatay, ket napapatay+ sa imbitinyo iti kayo,+
23 saan koma nga agpatnag a nakabitin ti bangkayna iti kayo.+ Imbes ketdi, itabonyo iti dayta nga aldaw, ta inlunod ti Dios ti maysa a naibitin,+ ket diyo rugitan ti daga nga ited ni Jehova a Diosyo kas tawidyo.+
Footnotes
^ Karayan a maaddaan laeng iti danum no panagtutudo.
^ Lit., “dua ti asawa ti maysa a lalaki, maysa ti maay-ayat ken maysa ti magurgura.”
^ Wenno “umuna a bunga ti pannakabaelna nga agputot.”
