Maysa nga Apocalipsis ken Juan 12:1-17
12 Kalpasanna, nakakitaak idiay langit iti nagpaiduma a pagilasinan: Maysa a babai+ a naarkosan* iti init ket adda iti baba ti sakana ti bulan, ken adda 12 a bituen iti koronana,
2 ken masikog ken dandanin aganak. Agik-ikkis gapu iti ut-ot ken rigatna nga agpasikal.
3 Adda pay sabali a pagilasinan a nakitak idiay langit. Kitaem! Adda dakkel a dragon+ a kasla apuy ti kolorna, 7 ti ulona, 10 ti sarana, ken adda korona ti tunggal ulona.
4 Guyguyoden ti ipusna ti kakatlo dagiti bituen+ ti langit, ket intapuakna dagita iti daga.+ Nagtaktakder ti dragon iti sango ti babai+ a dandanin aganak tapno alun-onenna ti maladaga apaman a mayanak.
5 Impasngay ti babai ti maysa nga anak a lalaki+ a mangipastor iti amin a nasion babaen ti sarukod a landok.+ Naagaw* ti anakna a naipan iti Dios a nakatugaw iti tronona.
6 Nagkamang ti babai idiay let-ang, nga ayan ti lugar nga insagana ti Dios a pakataraonanna iti 1,260 nga aldaw.+
7 Adda gubat a napasamak idiay langit: Nakigubat ni Miguel*+ ken dagiti anghelna iti dragon. Nakigubat met ti dragon ken dagiti anghelna
8 ngem saanda a nangabak,* ken awanen ti lugarda idiay langit.
9 Isu a naitapuak ti dakkel a dragon,+ ti nagkauna nga uleg,+ daydiay naawagan iti Diablo+ ken Satanas,+ a mangal-allilaw iti intero a mapagnaedan a daga.+ Naitapuak iti daga+ agraman dagiti anghelna.
10 Nakangngegak iti napigsa a timek idiay langit a nangibaga:
“Dimtengen ti panangisalakan,+ ti pannakabalin, ti Pagarian ti Dios,+ ken ti autoridad ti Kristona, ta naitapuaken ti mangak-akusar kadagiti kakabsattayo, daydiay mangak-akusar kadakuada iti aldaw ken rabii iti sango ti Diostayo!+
11 Pinarmekda isuna+ babaen ti dara ti Kordero+ ken ti mensahe nga impakaammoda,*+ ket sisasaganada a mangisuko iti biagda*+ ken matay.
12 Agragsakkayo ngarud, dakayo nga agnanaed iti langit! Kaasi pay ti daga ken ti baybay,+ ta bimmaba kadakayo ti Diablo a kasta unay ti pungtotna, ta ammona nga ababan ti tiempona.”+
13 Idi naamiris ti dragon nga isu ket naitapuaken iti daga,+ indadanesna ti babai+ a nangyanak iti ubing a lalaki.
14 Ngem naited iti babai ti dua a payak ti dakkel nga agila,+ tapno makatayab a mapan iti lugarna idiay let-ang, a pakataraonanna iti maysa a panawen ken pampanawen ken kagudua ti maysa a panawen*+ nga adayo iti uleg.+
15 Nangipugso ti uleg iti danum a kasla karayan iti likudan ti babai, tapno malmes iti dayta.
16 Ngem ti babai ket tinulongan ti daga. Nagnganga ti daga ket inigupna ti karayan nga impugso ti dragon.
17 Isu a nakapungtot ti dragon iti babai, ket napan tapno gubatenna dagiti nabatbati a kaputotanna,*+ a mangtungtungpal kadagiti bilin ti Dios ken nadutokan a mangsaksi ken Jesus.+
Footnotes
^ Wenno “nakawesan.”
^ Wenno “Naala.”
^ Kaipapananna, “Asino ti kas iti Dios?”
^ Wenno mabalin a, “ngem naabak dayta [kayatna a sawen, ti dragon].”
^ Lit., “sao a sinaksianda.”
^ Wenno “kararuada.”
^ Kayatna a sawen, tallo ket kagudua a panawen.
^ Lit., “bin-ina.”
