Ti Umuna nga Ar-ari 21:1-29
21 Kalpasan dagitoy, adda napasamak mainaig iti kaubasan a kukua ni Nabot a Jezreelita. Napasamak daytoy idiay Jezreel,+ iti abay ti palasio ni Ahab nga ari ti Samaria.
2 Kinuna ni Ahab ken ni Nabot: “Itedmo kaniak ti kaubasam tapno pagmulaak iti natnateng, ta asideg dayta iti balayko. Sukatakto iti nasaysayaat a kaubasan. Wenno no kayatmo, gatangek.”
3 Ngem insungbat ni Nabot: “Diak mabalin nga ited ti tawid dagidi ammak, ta iparit dayta ni Jehova.”+
4 Iti kasta, nagawid ni Ahab a nakamisuot ken naliday gapu ta imbaga ni Nabot a Jezreelita: “Diak mabalin nga ited ti tawid dagidi ammak.” Kalpasanna, nagidda ket timmallikud ken saanna a kayat ti mangan.
5 Immasideg ni Jezebel+ nga asawana ket insaludsodna: “Apay a nakalidlidayka* ken saanmo a kayat ti mangan?”
6 Insungbat ni Ahab: “Imbagak ngamin ken Nabot a Jezreelita, ‘Gatangek ta kaubasam. Wenno no kayatmo, sukatak iti sabali a kaubasan.’ Ngem kinunana, ‘Diak ited kenka ti kaubasak.’”
7 Kinuna ni Jezebel nga asawana: “Saan kadi a sika ti ari nga agturturay iti Israel? Bumangonka, manganka, ken agragsakka. Itedkonto kenka ti kaubasan ni Nabot a Jezreelita.”+
8 Gapuna, nangaramid ni Jezebel kadagiti surat iti nagan ni Ahab ket minarkaanna iti pangselio ti ari+ sa impatulodna dagita kadagiti panglakayen+ ken natan-ok a tattao nga agnanaed iti siudad ni Nabot.
9 Kastoy ti linaon dagiti surat: “Iwaragawagyo ti panagayunar, ket pagtugawenyo ni Nabot iti sanguanan dagiti tattao.
10 Pagtugawenyo iti sanguananna ti dua nga awan serserbina a lallaki nga agtestigo maibusor kenkuana,+ ket ibagada, ‘Inlunodmo ti Dios ken ti ari!’+ Kalpasanna, iruaryo ken uborenyo agingga a matay.”+
11 Tinungpal dagiti lallaki, dagiti panglakayen ken natan-ok a tattao nga agnanaed iti siudad ni Nabot, ti naikabil kadagiti surat ni Jezebel a naipatulod kadakuada.
12 Nangiwaragawagda iti panagayunar ken pinagtugawda ni Nabot iti sanguanan dagiti tattao.
13 Kalpasanna, immasideg ken nagtugaw iti sanguanan ni Nabot ti dua nga awan serserbina a lallaki ket nagtestigoda maibusor kenkuana iti sanguanan dagiti tattao. Kinunada: “Inlunod ni Nabot ti Dios ken ti ari!”+ Kalpasanna, impanda ni Nabot iti ruar ti siudad ket inuborda agingga a natay.+
14 Nangibaonda iti nangipadamag ken Jezebel: “Naubor ken natayen ni Nabot.”+
15 Apaman a nangngeg ni Jezebel a naubor ken natayen ni Nabot, kinunana ken Ahab: “Tumakderka, tagikuaem ti kaubasan ni Nabot a Jezreelita+ a saanna a kayat nga ilako kenka, ta awanen ni Nabot. Natayen.”
16 Idi nangngeg ni Ahab a natayen ni Nabot, bimmangon ket napan iti kaubasan ni Nabot a Jezreelita tapno tagikuaenna dayta.
17 Ngem kinuna ni Jehova ken ni Elias+ a Tisbita:
18 “Tumakderka, inka sabten ni Ahab nga ari ti Israel, nga adda idiay Samaria.+ Adda idiay kaubasan ni Nabot, ta tagikuaenna daytan.
19 Ibagam kenkuana, ‘Daytoy ti kinuna ni Jehova: “Adda kadi pinataymo a lalaki+ ken innalam pay ti sanikuana?”’+ Ibagam pay kenkuana, ‘Daytoy ti kinuna ni Jehova: “Iti lugar a nangdildilan dagiti aso iti dara ni Nabot, sadiayto met a dildilan dagiti aso ti daram.”’”+
20 Kinuna ni Ahab ken ni Elias: “Nasarakannak met laeng, kabusorko!”+ Insungbat ni Elias: “Wen. ‘Gapu ta determinadoka* a mangaramid iti dakes iti imatang ni Jehova,+
21 mangyegak kenka iti didigra, ket papatayenkanto ken ibusekto ti tunggal lalaki* a kaputotam,+ a pakairamanan dagiti awan pigsana ken nakapuy iti Israel.+
22 Pagbalinekto ti sangakabbalayam a kas iti sangakabbalayan ni Jeroboam+ nga anak ni Nebat ken kas iti pamilia ni Baasa+ nga anak ni Ahias, ta pinagpungtotnak ken pinagbasolmo ti Israel.’
23 Kinuna met ni Jehova maipapan ken Jezebel: ‘Kanento dagiti aso ni Jezebel iti maysa a lote iti Jezreel.+
24 Kanento dagiti aso ti asinoman a kaputotan ni Ahab a matay iti siudad; ken kanento dagiti billit ti asinoman a matay iti away.+
25 Talaga nga awanen ti kas ken Ahab+ a determinado* a mangaramid iti dakes iti imatang ni Jehova, a sinugsogan ni Jezebel+ nga asawana.
26 Nagdakes ti inaramidna babaen ti panagserbina kadagiti makarimon nga idolo,* kas iti inaramid dagiti Amoreo, a pinapanaw ni Jehova iti sanguanan dagiti Israelita.’”+
27 Apaman a nangngeg ni Ahab dagitoy, pinisangna ti badona ket nangisuot iti nakersang a lupot. Nagayunar ken nagid-idda iti nakersang a lupot ken nagnagna a napalalo ti lidayna.
28 Iti kasta, imbaga ni Jehova ken ni Elias a Tisbita:
29 “Nakitam kadi no kasano a nagpakumbaba kaniak ni Ahab?+ Gapu ta nagpakumbaba iti sanguanak, saanko nga iyeg ti didigra bayat a sibibiag. Iyegkonto ti didigra iti pamiliana iti kaaldawan ti anakna.”+
Footnotes
^ Lit., “nakalidliday ti espiritum.”
^ Lit., “inlakom ti bagim.”
^ Lit., “asinoman nga umis-isbo iti pader.” Pagsasao iti Hebreo a panglais kadagiti lallaki.
^ Lit., “nangilako iti bagina.”
^ Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
