Iti Paset 1 daytoy a serye, naireport ti maar-aramidan ti jw.org iti pannakaiwaras dagiti digital a video ken publikasion. Ipakita ti Paset 2 no kasano a nakatulong ti jw.org tapno kanayon a mapakaammuan dagiti kakabsat iti intero a lubong kadagiti agdama a pasamak a mangapektar kadagiti Saksi ni Jehova.

Naintiempuan a Damdamag: Ti JW Damdamag a seksion iti jw.org regular nga itampokna dagiti kabaruan nga artikulo a naglaon kadagiti mapagtalkan nga impormasion maipapan kadagiti kakabsattayo. Karaman kadagitoy dagiti regular nga update maipapan kadagiti natural a didigra ken trabaho a panangsaranay, ibubusor ti gobierno, di nainkalintegan a pannakaibalud dagiti kakabsattayo iti nadumaduma a pagilian, ken dadduma pay a napapateg a damdamag. Kas pagarigan, idi Marso 21, 2017, impakaammo ti maysa nga artikulo kadagiti kakabsat iti intero a lubong a dandanin maiparit ti panagdaydayaw dagiti Saksi ni Jehova iti Russia ken nayawis kadagiti kakabsat a suratanda dagiti opisial ti gobierno ti Russia.

Alert ti Kasangsangpet a Damag: Damo a nagparang ti feature a Kasangsangpet a Damag iti jw.org idi Hulio 2017. Dagitoy nga ababa nga alert pakaammuanna dagiti kakabsattayo kadagiti kasangsangpet a damag uray awan ti atiddog nga artikulo iti JW Damdamag. Kas pagarigan, maaramid dagiti alert no mawayawayaan dagiti kakabsattayo a naibalud gapu iti pammatida, kas idi Disiembre 31, 2020, idi nawayawayaan ni Feliks Makhammadiyev iti maysa a pagbaludan iti Russia ken nakaduana manen ni baketna a Yevgeniya. Bayat ti pandemic, nausar ti alert dagiti Kasangsangpet a Damag tapno maipakaammo dagiti online a sesion ti kombension ken dagiti napateg a desision ti Bagi a Manarawidwid Dagiti Saksi ni Jehova, kas iti pannakaisubli ti in-person a gimong ken ti publiko a panangasaba. Adu nga alert ti nairuar sumagmamano laeng nga oras kalpasan ti napateg a pasamak iti maysa a paset ti lubong. Kas pagarigan, idi Hunio 2018, nairuar ti Kasangsangpet a Damag di nagbayag kalpasan a nangaramid ti Constitutional Court ti South Korea iti importante a desision a mangideklara a ti kaawan ti alternatibo a serbisio sibil ti pagilian ket saan a maitunos iti konstitusion.

Dagiti Update Manipud iti Bagi a Manarawidwid: Idi Marso 18, 2020, ti kaunaan nga update manipud iti Bagi a Manarawidwid ket nairuar iti jw.org tapno mangparegta kadagiti kakabsat bayat ti COVID-19 pandemic. Adu ti umanamong iti imbaga ti maysa a sister maipapan kadagiti update: “Kas da la gayyem a personal a mangkomkomusta kaniak. Diak ammo no maibturak ti pandemic no awan dagitoy nga update. Kanayon nga eksakto ti sangpet dagita.” Addan nairuar a 28 kadagitoy a naintiempuan nga update.

Bayat a kumarkaro ti pannakasinasina ti lubong ken bigla nga adda dagiti napateg a pasamak, rumigrigat ti agbirok kadagiti mapagtalkan a damag. Ngem maragsakantayo ta umaw-awat dagiti kakabsattayo iti naintiempuan ken umiso a report iti jw.org. Daytoy ti makatulong kadatayo nga ‘agtalinaed a kalmado ken agtalek’ iti Diostayo a ni Jehova.—Isaias 30:15.

• Video a maida-download iti kada bulan

• Inaldaw a mangbisbisita iti website iti kada bulan

• Pannakaipakaammo ti sangalubongan a kampania a panagsurat, Marso 2017

• Pannakairuar ti kaunaan nga update manipud iti Bagi a Manarawidwid, Marso 2020

• Pannakaipakaammo ti pannakaisubli ti in-person a panaggigimong, Marso 2022

• Pannakaipakaammo ti pannakaisubli ti panangasaba iti publiko, Hunio 2022

• Pannakairuar dagiti online a sesion ti kombension, Hunio agingga iti Agosto, 2022