Jaabwọ kahị jẹ́ e-egbeju nya ẹla ọkẹkpẹ, iJisọsị kpa ọhịhị nyamwụ “ya ẹrụ ọnyịịla rụ́ ịpyị Adịrahụ nya Ohe Oluhye ju angịnyị.” (ILuku 8:1) Ọ họ ụkụrwọ la ọngịrị nyamwụ wuu, jẹdịyẹ ịmayịlị ohu ịmanyị tị́ ụ-ụwa ọ-ọpyị nya Isirẹlụ chajị kọ ka jẹ́-ẹ ya ẹla nya Ịpyị-Adịrahụ nya Ohe Oluhye je angịnyị. Apwụ nya ịMatiyu, ịMakị, iLuku, bala ịJọn, kị ri apwụ nya Ẹrụ Ọnyịịla, ya ẹla u-uhye nya ụkụrwọ nya iJisọsị ịKịrayịsị. Apwụ ịwẹ tị gu ẹnyị nya Ịpyị-Adịrahụ nya Ohe gụ ụka ohu. Iru nyaa kpehe bwu ẹpwụ nya omyi ẹla nya iJisọsị ịnyị, ẹla ịmanyị bwu ẹpwụ nya ẹla ọlẹ ká iJisọsị ya u-uhye nya Ịpyị-Adịrahụ nya Ohe ị tị dọmwụ da ju ẹ-ẹpwụ nya Ụpwụ Ịgọgọ lẹ!—ỊJọn 21:25.

Ịyẹ tị́ du ká Ịpyị-Adịrahụ nya Ohe baba ha iJisọsị ịịwẹ? Ang odudu ọhẹ ri, iJisọsị jẹ́ nyori Ohe chwọọ nyọka ri Adịrahụ nya Ịpyị-Adịrahụ ọwẹ. (Ayịsaya 9:6; iLuku 22:28-30) Ma iJisọsị á ya irya nọ ọ-ọka ya ọngịrị lee ogbo hịlọmwụ ka. (ỊMatiyu 11:29; ịMakị 10:17, 18) Ọ́ kaa họ ụkụrwọ nya Ịpyị-Adịrahụ nya Ohe chajị nya apyobwuna nyịlọmwụ ka. Ang ọhọhẹ ọlẹ ko du ká Ịpyị-Adịrahụ nya Ohe Oluhye baba ha iJisọsị yẹẹyẹẹ ụka ọlanyị bala ọlẹẹlẹẹ a ri ọchajị nya ang ọlẹ ká Ịpyị-Adịrahụ ọwẹ wẹẹ ka họ ha angịlẹ kị họ́ọ. Angịịwa ri Adamwụ olepwoohe bala angịjụgbẹyị nyamwụ ịlẹ kị godayị kpẹẹkpẹẹ.

IJisọsị la ọháha okpori-kpori ẹ-ẹga nya Adamwụ olepwoohe. (Etu 8:30; ịJọn 14:31) Abwụma ịnyịịla-ịnyịịla nya Adamwụ, lala ọháha, ahyẹẹrwẹrwa, eje ọkpẹẹkpẹẹ kaa myọọ lẹhị yẹẹyẹẹ. (Ehile Ọmada 32:4; Ayịsaya 49:15; 1 ịJọn 4:8) Lẹ ọ ka wụ́ iJisọsị eje lụmẹ ụka kọ wo ịnịịkịla ịlẹ kị kaa kpa pyẹ u-uhye nya Adamwụ. Ịnịịkịla lala o-ri, akama nya angịnyị nyị́ kaa ri Ohe ẹla ka, Ohe nyị tịtọ ká angịnyị nyị ka yẹ akama. Ang ọhẹ ọlẹ kọ du ká iJisọsị “ya ẹrụ ọnyịịla dodehe rụ́ ang chajị nya ịpyị Adịrahụ” nya Ohe à wẹ lẹ, chajị ọ jẹ́ nyori lụka o-kpii Ịpyị-Adịrahụ ọwẹ nyị ka rụ ẹnyị nya Adamwụ ịgba. (ỊMatiyu 4:23; 6:9, 10) Ányị ọ tị́ ka bwu lịnyị?

Bwula Ịpyị-Adịrahụ, iJihova ka yẹ ang da lụmẹ-lụmẹ ịlẹ kị ka ju angịnyị ehe apyobwuna. “Ohe Oluhye ka yile egbejida hi egbahị” nya angịnyị ịlẹ kị godayị kpẹẹkpẹẹ wuu. IJihova ka ta ang myị́ ang ọlẹ wuu kọ kaa ju ọmwụ nya ida ojeje ayịreji. Ọ ka họ ká “igu ogbugbu ohe-lohe á ka ji kaka. Lee, ida ọbaba bala ida ojeje ọhẹ-lọhẹ ọ-ka jiji kaka. Lee, ang ọjụjụ ọhẹ-lọhẹ, ọ ka ji kaka ịnyịnyị.” (Ọwụrụụ-wụrụ 21:3, 4) Bwula Ịpyị-Adịrahụ, Ohe Oluhye ka ta akama ụma ọnyị myị́ ọnyị wuu ayịreji. b

Ọ́ la ẹbyẹbyị tịng tị nyọlẹ kọ kaa chị iJisọsị kpákpákpá nyọka ya ẹla nya Ịpyị-Adịrahụ je angịnyị ka. Ọ jẹ́ nyori Ịpyị-Adịrahụ ọwẹ nyị ka mẹjẹ jaabwọ ká Adamwụ la ọngịrị bala ọ-la ọháha kaka ba. (IJemsi 5:11) IJisọsị jẹ́ ịnyịnyị nyori Ịpyị-Adịrahụ ọwẹ nyị ka ju apyobwuna ha angịkịla ịlẹ kị họ́ọ, kị ri angịnyị ehe ịlẹ kị godayị kpẹẹkpẹẹ.

IJisọsị hịhị tataata e-epwoohe bala Adamwụ ene kọọ wẹ odehe ọlẹ. Adamwụ kpọọ họ ang myị́ ang wuu, tụ́ ịdịchụ iluhye-ọgba bala ogu nyaa, bala odehe bala ang ịhịhị ịnyịịla-ịnyịịla ịlẹ kị jam ẹ-ẹpwụ nyamwụ. (Ala iKolosi 1:15, 16) Ma bwu ẹpwụ nya ang ịwẹ wuu, angịnyị ehe “há” iJisọsị yẹẹyẹẹ.—Etu 8:31.

Ẹrụ ọnyịịla ọ-kpa pyẹ nya iJisọsị mẹjẹ nyori angịnyị ehe họ́ọ yẹẹyẹẹ. Bwu ọmwụ ọdada, o ya dodehe nyori ọwa nyị warị nyọka “ya ẹrụ ọnyịịla” je angịlẹ kị baba nyamwụ. (ILuku 4:18) Ma iJisọsị-ị́ họ ba ẹ-ẹla oyaya nya angịnyị ọ-dụbwọ kem ka, ụka lụmẹ-lụmẹ ọ kaa mẹjẹ bwula ang ịlẹ kọ kaa họ nyori angịnyị họ́ọ. Ọ-chụ pwokwita, ụka ká iru nya angịnyị tuguru nyọka wo ẹla nyamwụ, “olegu nya ahyẹẹrwẹrwa jụ ka ẹpwụ nyamwụ, ọọwa lẹ, o juwa họ alẹdụrụ ịlẹpwụ nyaa uda nya ẹdụrụ nyaa la datị-datị wuu lẹlẹ.” (ỊMatiyu 14:14) Ụka ká ọlẹng ọhẹ ọlẹ kọ jụ ẹdụrụ mẹ ọmyịmyị jẹ bwula o-byi iJisọsị nyị ka họwa uda myị́ kori kịị nyị tịtọ, ọháha gu iJisọsị gbịla nyọka họ ọlẹng ọwẹ uda, ọọwa lẹ, o byoo yẹkẹẹ, “m̀ myị nya ịlẹhị-ịlẹhị lẹ, la gogo alẹ mẹ!” (ILuku 5:12, 13) Ụka ká iJisọsị yẹ iMeri oligu nyamwụ kọ wẹẹ bida chajị nya igu nya ịLasarọsị ọnyịnamwụ, “o gu iJisọsị ọ-ọkịlẹtụ lụmẹ-lụmẹ . . . o juwa chị́ arụ ẹ-ẹpwụ nya ọkịlẹtụ nyamwụ ụ-ụwa,” ọọwa lẹ, ‘iJisọsị à jida lẹlẹ.’ (ỊJọn 11:32-36) Ọọwa lẹ, iJisọsị à họ ẹlẹhẹ ọlẹ kọ la ẹbyẹbyị lụmẹ ẹe, o wule ịLasarọsị eji bwula igu nanana nyori ọ la ahyẹẹnụ ine ko gbu lẹ!—ỊJọn 11:38-44.

IJisọsị jẹ́ nyori akụrwọ ẹbyẹbyị ịwẹ nyị́ ja tata ka. Ọ jẹ́ nyori angịlẹ kọ họ uda bwu ẹdụrụ nyaa wuu nyị ja jụ ẹdụrụ myịmyị wẹẹ, ọ jẹ́ nyori angịlẹ ko wuleji bwula igu wuu nyị ja gbu myịmyị wẹẹ. Ma iJisọsị jẹ́ nyori Ịpyị-Adịrahụ nya Ohe nyị ka myị́ akama nya angịnyị ehe gboyi myị́ oyi. Ịnyị à du kọ họ akụrwọ ẹbyẹbyị kem ka lẹ, ọkọkọ nya ọọwa, “o ya ẹrụ ọnyịịla rụ́ ịpyị-adịrahụ nya Ohe Oluhye ju angịnyị.” (ỊMatiyu 9:35) Akụrwọ ẹbyẹbyị nyamwụ me ang ịlẹ ká Ịpyị-Adịrahụ nya Ohe ka họ chị odehe ọnụ wuu jẹ. Kụ ẹhị yẹ ehe ịlẹ ká ịBayịbụụ chị u-uhye nya ụka ọọwa wẹẹ.

• Ẹdụrụ-ụ́ ka ji kaka.

  Ọ ka wụrụ ahị nya alidu bala ọ wụrụ arụ nya angị-kpila. Ikuku ka gbajị lala ẹrwa, ángịlẹ wuu kị jẹ ya ẹla-ka ka mwu eje gboo.” Ịnyịnyị, ọngọngọhẹ “á tụtụm ka ya yẹkẹẹ, ‘Ẹdụrụ jụm alẹ’ kaka.”—Ayịsaya 33:24; 35:5, 6.

• Igu-ú ka ji kaka.

  “Alabwẹla ọnyịịla à ka la ọpyị ọlẹ lẹ, ị ka kụ am̀ gbe oyi myị oyi.”—Eje Ọnyịịla 37:29.

  “Ụka ọọwa, Amkpaa Agụgụ ka ta igu ayịreji pyịyọọ! Ọ ka yịlẹ egbejida hi ahị nya ọng myị ọng wuu.”—Ayịsaya 25:8.

• Egu ka wuleji.

  “Angịlẹ kị gbugbu juwa i-iworu nyaa wuu ka wo omyi nya Ọnyẹwẹ nya Ohe Oluhye! Ụka ọọwa, egu ịịwa wuu ka gba kpehe bwu ẹpwụ nya iworu nyaa.”—ỊJọn 5:28, 29.

  “Owuleji bwula igu ka juwa.”—Ụkụrwọ nya Alẹrụ 24:15.

• Ọng myị́ ọng ka la ẹpwa bala ụkụrwọ.

  ‘Ị ka me ube, ị tị ka nune ẹ-ẹpwa nyaa. Ị ka wu ẹrụ nya alakọnụ, ị ka hya egbe nyaa nẹ. Ị́ ka me ẹpwang angịkịla ka kwaa ẹpwa ka. Ị́ ka wu ẹrụ, angịkịla ka hya egbe ịlụwa ri ka. . . . Angịnyị ịlẹ kam chụ ka ya ụya ẹ-ẹpwụ nya ụkụrwọ nya ụbwọ nyaa.’—Ayịsaya 65:21, 22.

• Ẹwụ-ụ́ ka ji kaka.

  “Ọ họ ẹwụ ọdada olodehe kpụba gu onwu gu ọba.”—Eje Ọnyịịla 46:9.

  “Alụma ọhẹ-ẹ́ ka dẹwụ ta alụma ọkịla kaka. Ẹwụ ọ-mẹjẹ awụlẹ ka myị gbanggbang.”—Ayịsaya 2:4.

• Ang oriri ka dịda.

  “Ọpyị há ang-ẹrụ hiigu-hiigu lẹ, Ohe Oluhye ọlẹ kọ ri Ohe Oluhye nyahị wahị kụrụụhi lẹ.”—Eje Ọnyịịla 67:6.

  “Myị ká ang oriri ā dịda ọ-ọpyị ọlẹ, ká ang-ẹrụ iluhye nya ikiti ā há ọgwọgụ.”—Eje Ọnyịịla 72:16.

• Ẹbyahị á ka ji kaka.

  “Ị́ ka deeri nya alẹbyahị pyịyọọ ka.”—Eje Ọnyịịla 9:18.

  “Ọọ gba alẹbyahị kpehe ụka kị chị eko wụrwọọ, ọọ da angị la ọbaba bala angị la ọngọdụbwọ ka ụbwọ. Ọọ yẹ ahyẹẹrwẹrwa nya angị jula ọlọlọhẹ-ka bala angị ji ẹpwụ nya ọbaba. Ọọ chị ọhịhị nyaa da.”—Eje Ọnyịịla 72:12, 13.

Nyọlẹ ká kụ ẹhị yẹ ehe ịlẹ ká Ohe Oluhye chị u-uhye nya Ịpyị-Adịrahụ nyamwụ wẹ lẹ, à yẹ ang odudu ká Ịpyị-Adịrahụ ọwẹ baba ha iJisọsị lụmẹ lẹ? Ụka kọ jam odehe, ọ kaa tịtọ nyọka ya ẹla nya Ịpyị-Adịrahụ ọwẹ je ọng myị́ ọng ọlẹ kọ ka ke ụrụ wo lọọ, chajị ọ jẹ́ nyori Ịpyị-Adịrahụ ọwẹ à ka myị́ akama ịlẹ ká angịnyị ehe jam yẹ alẹ wuu lẹ.

Ehe ịlẹ ká ịBayịbụụ chị u-uhye nya Ịpyị-Adịrahụ kpụng ịpyọ? Kori ọ́ lịnyị, ányị a tị́ ka bwu jẹ́ ang u-uhye nya Ịpyị-Adịrahụ ọwẹ gụ ọọwa? Ịnyịnyị, ịyẹ a tị́ ka jẹ́-ẹ họ chajị ká ka yé apyobwuna bwu ahị ọwawa ịwẹ? Ụpa ohyẹẹkpẹ bwu ẹpwụ nya ahị nya ala ịlẹ ka wẹ ịtọ ẹla ịwẹ.