Bwu enjwo-enjwo nyam, akụrwọ ụbwọ nya Ohe kaa hám yẹẹyẹẹ. Ugbiyegu nyam kaa ju ipinu bala ihu ịhụ́hị-hụ́hị iloye nya epweji nyahị Jyväskylä, ịị Central Finland ụga. Ịnyịnyị iyo ileji hám yẹẹyẹẹ. Ụka kam ri onjwo, M̀ kaa tịtọ nyọka wu ụbwọyị bala ebwu ọnyị myị́ ọnyị kam yẹ bajẹ! Jaabwọ kam wẹẹ nwà, abwọlẹ ká angịnyị kaa kpa iyo ileji ụ-ụgbẹyị ọlẹ kọ pwoku-ka wụm ẹjẹ yẹẹyẹẹ. Nyọlẹ kọ nọ chẹẹ, m̀ yẹjula ogu i-chewu ke iyo ileji. Ẹ-ẹpwụ nya ogu ọwẹ, m̀ tọ angịnyị ịlẹ kam bala ịwa anyị lirya ookpokpo.

Ahị kaa ya ẹla ju angịnyị u-uhye nyọka chewu ke iyo ileji. Ahị kaa da apwụ du kịla angịnyị bala ọ-hụ ẹhụ bwu ẹgẹhẹ ka ẹga ọkịla lala ẹga kịị kpa egbii nya iyo ra bala ẹga ọ-kpa eteji ma iyo yẹ juwa ya ẹla taa pyịpyị. Ahị dọmwụ ya ogu nya angị kaa chewu ke iyo ileji yeji. Chajị nyọlẹ kahị juwa maga nyọka kpa ẹla ọwẹ kịlahị-ịlahị lẹ, ahị kaa la akama bala alegbeju i-kpeji ụka lụmẹ-lụmẹ. Ị wum bala ọ-kpam ka ịkọọtu ụka lụmẹ-lụmẹ.

Datị hi ẹla nya iyo, akama ịkịla ịlẹ kị jam odehe dọmwụ nyọka ri olo ham ịnyịnyị. Ọọwa du kam yẹjula ogu lụmẹ-lụmẹ, tụ́ Amnesty International and Greenpeace. M̀ kpa ọngịrị nyam wuu họ ụkụrwọ ha ogu ọwẹ. M̀ kaa dayị ya ẹla ha alẹbyahị, angịlẹ kị ye ang ri ka, bala angịnyị ịlẹ kị ji ẹpwụ nya iwe-ahụrụ ilujwo.

M̀ wẹ ka jẹ́ dụmwọ-dụmwọ nyori, ḿ ka jẹ́-ẹ yẹ odehe ọlẹ da ka. Nanana nyori ogu ịwẹ họ ị jẹ́ nwụ akama ịhyẹ ịlẹ kị ri ichiche rịrị, ma ịlẹ kị ri akama ịtụka juwa tịpyọ gu olene. Ọ lala o-ri olegu ọnyọọngịrị ọtịpyọ ọhẹ nyị wu odehe ọlẹ wuu da mile lẹ, ọngọngọhẹ-ẹ́ tị dọnụ wẹ ka. Ọ lam lala o-ri ḿ la ọngịrị ọlọlẹhẹ ka.

M̀ dọmwụ nyọka kụ irya u-uhye nya Ohe Oluhye bala ịBayịbụụ nyọlẹ ká ọkịlẹtụ kpụm enyi chajị nya abwọ ọ-chịm pyẹpyẹ. M̀ kaa jẹ́ ịBayịbụụ bala Alibeenu nya iJihova ene-ene. Nanana nyori ẹla nyaa kaa myịm lẹhị chajị ị la dụmwọ bala ọ-mẹjẹ nyori ị lirya ẹ-ẹga nyam, ḿ nwụlanọ nyọka yẹ ọhịhị nyam da ụka ọwẹ lẹ kạ. Ugbẹnyị lẹ, ang tị yẹda.

M̀ hu ịBayịbụụ nyam bala ọ-dọmwụ nyọka wọọ. Ọ kpụm ẹjẹ yẹẹyẹẹ. M̀ yẹ ụpa nya ịBayịbụụ lụmẹ-lụmẹ kị mẹjẹ́ẹhị nyọka kpa iyo ileji hiigu-hiigu. Ọ-chụ pwokwita, Etu 12:10 ya nyori “Ọlabwẹla ọnyịịla kaa kpahị ju iyo nyamwụ.” Ịnyịnyị m̀ wẹ ka jẹ́ nyori o-Ohe Oluhye à ju ọmwụ nya akama ịla odehe ka. Ọkọkọ nyọọwa, akama nyahị jam lụmẹ gụ ọọwa chajị angịnyị lụmẹ-lụmẹ á kaa ba ụgbẹyị nyamwụ jẹ ka ịnyị. Ọ myịm lẹhị lụmẹ ụka kam jẹ́ ang u-uhye nya ọháha bala ugbodu ojuju nya iJihova.—Eje Ọnyịịla 103:8-14.

Ụka ọwẹ m du ẹrụ nyọka ya What Does the Bible Really Teach? du wam ẹẹ. Ahyaahị Alibeenu nya iJihova ahụ bala ọrụ ịhyẹ jum ụga. Ị ya nyori nyị ka jẹ́ ịBayịbụụ balam, ọọwa m myị ẹẹ. Ịnyịnyị m̀ dọmwụ nyọka ka ọjịra-jịra ka Ube nya Ịpyị-Adịrahụ. Chajị nyọọwa, ẹlịlẹhị dọmwụ nyọka yeji ọ-ọkịlẹtụ nyam.

Bwula ụbwọ ọdada nya ịBayịbụụ, m jẹ́ yẹ abwẹla nyam lụmẹ-lụmẹ da. M̀ hwabwọ la ọ-ka nwà ẹchụ bala ọ-nwà ere kpoye. M̀ nwụ abwọlẹ kam kaa kụrụ ang bala o-ju agidi bala ẹla oyaya nyam họ. Ịnyịnyị m̀ nwụ irya nyam ẹ-ẹga nya alegbeju i-kpeji họ. (Ala iRom 13:1) M̀ myịmyị tụụbwo hi ọhịhị nya ụya ọhọhọ beji, ọhịhị ọlẹ ká angịnyị jẹ́m gụ wuu la.

Ọyẹda ọlẹ kọ lujwo ham gụgụ wuu ri ọ-ka kpehe hi ogu ọlẹ kam ji ene-ene. Ọyẹda ọọwa á họ lodu gbe ụtụrụ ka. Ụka nya ọgbanyẹ, ọ lam lala o-ri ẹla ọtịpyọ am nya-à wẹẹ họ kori kam gbịlọm kpehe hi ogu ịwẹ lẹ. Ma, m̀ wẹ ka jẹ́ nyori Ịpyị-Adịrahụ nya Ohe kẹnẹ-kẹnẹ à ka jẹ́-ẹ myị́ akama ịla odehe ọlẹ ẹẹ. M̀ dọmwụ nyọka kpa ọngịrị nyam wuu tuubwu ju Ịpyị-Adịrahụ ọwẹ bala o-ya ẹla je angịnyị chajị nyamwụ.—ỊMatiyu 6:33.

Nyọlẹ kam ri ọngọhẹ nya angị ma uya chajị nya ọyẹda wẹẹ, m̀ kaa chị angịnyị ebwo imiiye—angịnyị ịnyịịla bala angịnyị ịtịpyọ. M̀ tị nwụlanọ nyọka yụbwọ gu ẹla nya angịlẹ kam yaa nyori ị ri angịnyị ịtịpyọ. Ma, bwula ụbwọ ọdada nya ịBayịbụụ, ḿ kaa la ẹtẹ ọbaba ẹ-ẹga nya angịkịla kaka. Ọkọkọ nya ọọwa, m̀ kaa maga nyọka la ọháha ẹ-ẹga nya angịnyị ehe wuu. (ỊMatiyu 5:44) Ụgbẹyị ọhẹ ọlẹ kam kaa mẹ ọháha ọwẹ jẹ ri o-ya ẹrụ ọnyịịla chajị nya Ịpyị-Adịrahụ je angịnyị. Ọ kpụm ịpyọ lụmẹ nyọka yẹ jaabwọ ká ụkụrwọ ọnyịịla ọwẹ wẹẹ ya okpunyi, ọkẹkẹnị bala ẹhị ọrịrịị-rịrị ọlam ha angịnyị.

M̀ ye okpunyi nya ọkịlẹtụ nyọlẹ kam tụụbwọ hi ang myị́ ang wuu ju iJihova ụ-ụbwọ. M̀ jẹ́ myị̀myị̀ nyori Ohe Ọngọ Họ Ang Wuu á ka ya iwe da ị ka kpa iyo ileji bala angịnyị ehe nmaa-nmaa pyịyọọ lee ọ-ta odehe ọnyịịla-ọnyịịla ọlẹ ayịreji gboyi myị́ oyi ka. Ma bwula Ịpyị-Adịrahụ nyamwụ, ọ ka nwụla ang myị́ ang ịlẹ wuu kị bịrị. (Ayịsaya 11:1-9) Ọ kaa ya ọkẹkẹnị ham nyọlẹ kam jẹ́ ẹlịlẹhị ịwẹ bala ọ-ka da angịkịla ụbwọ la ọmyịmyị ẹ-ẹga nyaa. Ḿ kaa yọọ nyori m̀ baba nyọka yẹ odehe da kaka.