UKU ịmanyị tị́ nya angịnyị nya ịKịrayịsị chụ nyori ịwa nyị́ ka họ ọhọhọ nya ịtịya ọkpụkpụ nya ọmama nya ịKịrayịsị ka. Ányị ẹla nya eje ọchịchị nyaa à tị́ laa? Ọ laa ịwa bala anyị nyaa lala o-ri ịngịhyẹ nyị nyẹ ịwa? Yẹ ẹla ọlẹ ká Alibeenu nya iJihova ịlụpa nya odehe wuu ya u-uhye nya ẹlẹwẹ?

Ịtịya ọkpụkpụ nya ịKịrayịsị: “Ene kam ri Olibeenu nya iJihova, ḿ kaa ka ịchọọchị lụmẹ ka. Kori kam kaka wẹwẹ, ọ kaa ri ụka nya Esimasị lee ụka nya Isita ịnyị. Ụka ọlịnyị, ḿ dọmwụ kaa kụ irya nya iJisọsị ka. Ḿ kaa họ Esimasị lẹẹlẹẹ kaka, ma m̀ kaa ka ọjịra-jịra ụka imiiye ẹ-ẹpwụ nya epwihi bala ọ-dọmwụ kaa mẹ ang jẹ angịkịla u-uhye nya iJisọsị!”​—EVE, BWU AUSTRALIA.

Ọkẹkẹnị nya o-hu ha: “Ọ kaa kpụm ịpyọ ụka ká angịnyị á gam ahị lụka kam yahị me ka. Ẹla ọ-yahị me ka kaa kpụm ịpyọ lụmẹ! Ịnyịnyị, ọ kaa kpụm ịpyọ nyọka da ụpwụ bala ọ-gba arụrụ du ta angịkịla, chajị ọọwa kaa du kị kaa chị ọkẹkẹnị, bala ọ-ya ọkẹkẹnị ham am ayịdang.”​—REUBEN, BWU NORTHERN IRELAND.

Ọ-da angịlẹ kị la ịbaba ụbwọ: “Ọ kaa kpụhị ịpyọ nyọka kpụ ang oriri ha angịlẹ kị jụ ẹdụrụ. Ụka ọhẹ ahị kaa kpa ịfụlawa, ịkịra nya inwa, bala ang āhị ịkịla kịlaa nyọka kpa ọkẹkẹnị waa. Ọ kaa kpụhị ịpyọ chajị ahị ka jẹ́-ẹ ju angịwẹ ụga ụka onyị myị́ ọnyị ẹ-ẹpwụ nya ẹka.”​—EMILY, BWU AUSTRALIA.

Ọ-yẹjụla awụlẹ nya ugbiyegu: “Ụka ká ugbiyegu nyahị á tụchawụlẹ, ọ kaa kpụ anyị nyahị ịpyọ nyọka bịrị ụka bala anyịnịna nya adaa bala anyịnam, bala ịnaa bala adaa anyị ịgbahị, tụ́ ala ugbiyegu nyahị wuu ịlẹ kị ji lụrụ. Áhị kaa la ọ-tụ́ tutu ọhẹ ka chajị ahị ka jẹ́-ẹ họọ myị́ ụka myị́ ụka ẹ-ẹpwụ nya ẹka, alugbiyegu nyahị tị jẹ́ nyori ahị nyị kaa ju ịwa ụga chajị nya ọháha ọlẹ kahị la ẹ-ẹga nyaa ịnyị.”​—WENDY, BWU CAYMAN ISLANDS.

Okpunyi: “Lụka nya Esimasị, ọọ lala o-ri ang lụmẹ ká angịnyị ka họ lẹ, ị́ kaa kụ irya nya okpunyi kpong-kpong ka. M̀ jẹ́ ehe ọlẹ ká ịBayịbụụ chị u-uhye nya angịnyị ehe lẹ, ọhụ kaa bam eji yẹẹyẹẹ. M̀ jẹ́ nyori anyị nyam ka chị ọkẹkẹnị ị-ịlahị ịnyịnyị.”​—SANDRA, BWU SPAIN.