À LA akama ụka ọhẹ bala ọ-la ọngọngọhẹ ka dang ụbwọ ka ẹnẹhẹ lẹ? Ahị jam hịhị la “ụka olujwo nya ịlẹhị-ịlẹhị” ọlẹ kọ ka du ká ọkịlẹtụ ka kpụhị enyi lee ọ-lala o-ri ahị ji ụbwọọhị myị́. (2 Tim. 3:1) Ma ụka kahị la akama, angịnyị ji ịlẹ kị ka jẹ́-ẹ dahị ụbwọ myị́. ỊBayịbụụ ya nyori aligu ịnyịịla nyị ka jẹ́-ẹ dahị ụbwọ yẹẹyẹẹ “lụka nya ọbaba.”—Etu 17:17.

Ọlẹrụ ịPọlụ yé apyobwuna bwu ẹga nya aligu nyamwụ ịlẹ kị ba ogu-ẹdịyẹ la awụlẹ. (Kol. 4:7-11) Ụka ọlẹ kị wu ịPọlụ ju agba i-iRom, aligu nyamwụ họ ang ịlẹ kọ ka jụ họ lịlọmwụ myị́ ka họọ. Ọ-chụ pwokwita, Epafurodayịtọsị kpa ang ịlẹ ká angịnyị nya ịKịrayịsị ịla iFilipayị ya du ẹrụ kịlọọ. (Filip. 4:18) ITikikọsị ọwa tị kaa kpa ileta ịlẹ ká ịPọlụ da kịla ọjịra-jịra ịdatị-datị. (Kol. 4:7) Chajị nyọlẹ ká aligu nya ịPọlụ dọọ ụbwọ, ọ jẹ́ ju alọjịra-jịra ọhụ ụka kị dọmwụ tọọ ju ube ẹ-ẹpwa bala ụka ọkịla ọlẹ kị woo ju agba. Ányị ahụ à tị́ ka bwu ri oligu ọlam-ọlam alẹ?

Aanahị alẹng bala anyang ịhyẹ alẹ mẹjẹ jaabwọ ká aligu ka bwu da awụlẹ ụbwọ. Elisabet, ko ri ọngọ ye ịlahị nya ụgbẹyị kpụrụrụ ịị Spain, ya jaabwọ ká ọọnahị ọnyang ọhẹ dọọ ụbwọ lụka olujwo. Ụka ọlẹ ká ịnamwụ jụ́ ẹdụrụ nya ẹbẹ ọgọja, ọọnahị ọọwa da omyi ẹla lụmẹ-lụmẹ ịlẹ kị ka ju Elisabet ọhụ du kịlọọ bwu ịBayịbụụ. Elisabet yẹkẹẹ: “Ụka kam yẹ ụpwụ ọlẹ kọ da du tọm, m̀ chị ọkẹkẹnị nyọka jẹ́ nyori ọngọhẹ kpam i-irya juwa, ọọwa tị jum ọngịrị nyọka họ ang ịlẹ kam baba nyọka họ.”—Etu 18:24.

Ahị ka jẹ́-ẹ ju igu oriri nyahị bala aanahị ọngịrị bwula ọ-daa ụbwọ ẹ-ẹpwụ nya ang nya olegu ọhọhọ. Ọ-chụ pwokwita, à ka jẹ́-ẹ myọnụ nyọka hu ọọnahị ọlẹ kọ ri ọngọgbahị chẹẹ lẹ ka ọjịra-jịra lee kpa ka ẹrụ ọnyịịla ọ-kpa pyẹ myị́. Kori ka họ ịnyị, anụ ka jẹ́-ẹ ju awụlẹ ọhụ. (Rom. 1:12) Tị wẹẹ, aanahị ịhyẹ á jẹ́-ẹ kpehe bwu ẹpwa nyaa myị́ ka. Lẹ, ányị ahị tị́ ka bwu daa ụbwọ?

Aanahị ịhyẹ á jẹ́-ẹ ka ọjịra-jịra ka Ube nya Ịpyị-Adịrahụ myị́ ka, ọọlajị nya ẹdụrụ ọtụka ọlẹ kọ jwaa. Ịnyị iwe-ahụrụ à la ha ọọnahị ọhẹ ká ẹnyị nyamwụ ri David, kọ la ẹdụrụ nya ẹbẹ ọgọja lẹ. Ị họọ utoji nya ẹdụrụ nyamwụ ọwẹ ẹ-ẹpwụ nya ọya ịrwọnyẹ gbẹgbịlẹ. Lụka ọwẹ wuu, David bala Lidia ahụ nyamwụ kaa yẹ jula ọjịra-jịra bwu ọhụ.

Ányị aligu nyaa ịla ọjịra-jịra à tị́ bwu daa ụbwọ? Ụka ká ọjịra-jịra ọnyị myị́ ọnyị á cheju kpá, angịhyẹ ịlẹ kị juwa u-Ube nya Ịpyị-Adịrahụ kaa maga nyọka ya ẹla ta David bala Lidia bwu ang ị-kpa ya ẹla bwu ọhụ. Ịnyịnyị, ụka ká David bala Lidia á wẹ ẹla ọọjịra-jịra, aanahị kaa da ụpwụ ka byaa nyori ẹla ọwẹwẹ nyaa nyị kpịwa ịpyọ ụka ká ọjịra-jịra á tụku kpá. Ányị ọọwa à tị́ laa? Ọ du ká David bala Lidia yẹ nyori aanaa la ọháha ẹ-ẹga nyaa.

 Ọ tị ka chịkpẹẹ myị́ kahị ka hu ụka nọ nyọka kpa ẹrụ ọnyịịla pyẹ bala aanahị ịlẹ kị jẹ́-ẹ kpehe hi ẹpwa nyaa myị́ ka. Ahị ka jẹ́-ẹ nwụ ịngịhyẹ bala ọkịla họ ẹ-ẹpwụ nya ahyẹẹnụ nyọka họ ụkụrwọ balaa myị́. Bwula ọ-họ ịnyị, ahị ka mẹjẹ nyori áhị deeri nyaa ka. (Etu 3:27) Ọhẹka, ahị ka jẹ́-ẹ kpa ẹrụ ọnyịịla pyẹ balaa la ifon lee ileta ọdada myị́. Angịgbahị nya ọjịra-jịra tị ka jẹ́-ẹ maga ká angịlịnyị ka yẹ jula angịkịla bwu ọhụ ụka nya ọjịra-jịra nya ẹrụ ọnyịịla ọ-kpa pyẹ myị́. Ọ myị David bala Lidia lẹhị nyọlẹ ká ọjịra-jịra nyaa jẹ́ họ ịnyị. David ya nyori, “ọ-yẹ jula angịkịla bala abwọ ọrịrị ọ-lụka nya ọjịra-jịra o-kpii ọwẹ nyị jwịwa ọhụ yẹẹyẹẹ.” Ọ tị ka chịkpẹẹ myị́ nyọka kpa ọngọlẹ á kaa jẹ́ ịBayịbụụ ta ka ẹpwa nya aanahị ịlịnyị nyọka jẹ́ ang balaa ụ-ụwa. Ma, tị tọ ọọnahị ọọwa wo ene, kori ká ọ-họ ịnyị á ka pwoku.

Ụka kahị bịrị ụka bala aanahị ịlẹ kị jẹ́-ẹ kpehe bwu ẹpwa nyaa myị́ ka, ahị kaa jáa gụ ọọwa bala abwẹla ịnyịịla nyaa. Ọọwa tị du kahị kaa tụ ju awụlẹ chwẹẹ lala aligu gụ olene. Ọ-chụ pwokwita, ụka ka yẹ jaabwọ kị ja mẹ ịBayịbụụ jẹ ọngịnyị bala ọ-da ọngọọwa ụbwọ nyọka tụ ju iJihova chwẹẹ gụ ọọwa, ẹla nyaa kaa myịng lẹhị gụ olene. À ka jẹ́-ẹ la aligu inyeewe ụka ka da aanahị ụbwọ ẹ-ẹpwụ nya ang nya olegu.—2 Kọr. 6:13.

ỊPọlụ yé ẹjẹ ọkpụ́kpụ nyọlẹ ká ịTayịtọsị oligu nyamwụ juwa balọọ. (2 Kọr. 7:5-7) Oja ọwẹ kpụhị ịtịya nyori ẹ-ẹla oyaya nyahị kem ahị ka jẹ́-ẹ kpa kpụ́ angịlẹ kị la ọbaba ẹjẹ ka, ma ahị ka jẹ́-ẹ họ ịnyị ịnyịnyị bwula o-juwa balaa bala ọ-họ ang myị́ ang ọlẹ kahị ka jụ́ họ myị́ nyọka daa ụbwọ.—1 Jọn. 3:18.

Aanahị ịla Russia ya ọgụ-ẹpẹtẹ ọnyịịla-ọnyịịla deeji ẹ-ẹga nya ọ-da awụlẹ ụbwọ. Kụ ẹhị yẹ oja nya Sergey bala Tatyana, ahụ nyamwụ wẹẹ. Ala idangeri wụlẹ ẹpwa nyaa yẹ kpete-kpete bala ọ-kpaa ka ofisi nyaa. Ị gba ahụ nyamwụ kpehe jene, ọọwa ọ rụ ka ẹpwa ẹẹ. Sergey yẹkẹẹ: “Jaabwọ ká ahụ nyam pwụ ẹpwa bwaa, ọọnahị ọnyang o-ju ugbodu ọhẹ warị kaka yọọ ahyaahị. Ọ ka nọ pyịnyẹng, aanahị ịkịla wẹ kaka dahị ụbwọ nwụ ang guru kẹm-kẹm ẹ-ẹpwa nyahị nyọlẹ kị nyọo epepe kpá.”

Sergey myị́myị́ yẹkẹẹ: “Ẹla ọla ụpwụ nya Etu 17:17 kaa hám ụka myị́ ụka. Ụwa yẹkẹẹ: ‘Aligu kaa há awụlẹ ụka wuu, aanịna-à yẹrwa nya awụlẹ lụka nya ọbaba.’ Ẹlẹwẹ họ jịra ẹ-ẹga nyam yẹẹyẹẹ lụka nya ọtụpyịpyị ọlẹ kọ lujwo ham nyọka bọhụ la ịlọm myị́. IJihova ya aligu ịlẹ kị juhi ka ham nyọka dam ụbwọ.” a

Jaabwọ kahị wẹẹ jahị da akama ịlẹ kị ka lujwo gụ́ olene, ahị baba nya aligu ịlẹ kahị ka jẹ́-ẹ kpụnịrọ. Ahị tị dọmwụ ka baba nyaa gụ́ lụka nya akama ọtụka okpelego wẹẹ. Lẹ ahị maga nyọka ri oligu ọlam lẹẹlẹẹ mẹ!—1 Pit. 4:7, 8.