Nanana nyori à la ọháha ẹ-ẹga nya iJihova yẹẹyẹẹ bala ọ-kaa maga nya ịlẹhị-ịlẹhị nyọka cheji ba hi ọ-ka họ ịngịngịhyẹ ọlẹ kọ ka wọ́ọ eje, à ka họ ẹla abyị ụka ọhẹ bala ụka ọkịla myị́. Ma, ọhọbịrị ịhyẹ tịpyọ gụ ịkịla. (1 Ala ịKọrịntị 6:9, 10) Kori ká họ ọhọbịrị ọtụka, kpịtịya nyori iJihova á hwabwọ la ọ-la ọháha ẹ-ẹga nyang ka; ọ nwụlanọ nyọka hịnyọhi hang bala ọ-dang ụbwọ.

1. Ịyẹ ahị tị́ ka họ ká iJihova ka hịnyọhi hahị?

Ọ kaa tọ angịlẹ kị la ọháha ẹ-ẹga nya iJihova olujwo nya ịlẹhị-ịlẹhị ụka kị wẹ ka jẹ́ nyori ị họ ọhọbịrị ọtụka. Ma ị kaa yé ẹjẹ ọkpụkpụ bwu ehe ọlẹ ká iJihova chị angịnyị nyamwụ: “Ó-ri ká [ọhọbịrị-ị́] chịnụ ịrị jaabwọ ká ịwọ kaa chị ang ịrị wẹwẹ, m̀ tị ka yịlẹẹnụ kanụ ka la owuru lala owu olewu-lewu.” (Ayịsaya 1:18) Kori kahị yẹda bwu ẹpwụ nya ọkịlẹtụ, iJihova ka hịnyọhi hahị chẹpwụ-chẹpwụ. Ányị ahị tị́ ka bwu yẹda? Ẹla ọlẹ kahị họ ka tọhị olujwo, ọọwa ahị ka hwabwọ la ang ọọwa ọhọhọ bala ọ-raabwọ bịlẹ iJihova kọ ka hịnyọhi hahị lẹlẹ. Ịnyịnyị, ahị ka hwabwọ la irya ọkụkụ ọtịpyọ bala ịhọhọ ịlẹ kị kpahị kaka ju ka ẹpwụ nya ọhọbịrị ọọwa, ọọwa lẹ ahị ka maga nya ịlẹhị-ịlẹhị nyọka hịhị ba ehile icheri-cheri nya iJihova jẹ lẹlẹ.—Wa Ayịsaya 55:6, 7.

2. Ányị iJihova à tị́ kaa kpa angịgbahị nya ọjịra-jịra dahị ụbwọ ụka kahị họ ọhọbịrị?

Ụka kahị họ ọhọbịrị, iJihova byihi nyori ahị nyị “be ẹkọ wụrụ” angịgbahị nya ọjịra-jịra. (Wa iJemsi 5:14, 15.) Angịgbahị ịwẹ la ọháha ẹ-ẹga nya iJihova bala ịkpịlọ nyamwụ. Ị mẹjáa jaabwọ kị ka bwu dahị ụbwọ nwụla igu oriri nyahị bala iJihova.—Ala ịGaletiya 6:1.

Ányị angịgbahị nya ọjịra-jịra à tị́ kaa dahị ụbwọ kori kahị họ ọhọbịrị? Angịgbahị imiiye lee angị ịta ka kpa ụpwụ ịgọgọ nwụhị rịrị. Ịnyịnyị ị ka juhi ọhụ bala o-ya ang ịlẹ kahị ka jẹ́-ẹ họ chajị kahị ka ma ọhọbịrị ọọwa họ myịmyị kaka jehi. Kori ká ọngọlẹ kọ họ ọhọbịrị ọtụka á myị yẹda ka, angịgbahị nya ọjịra-jịra ka gbọọ kpehe hi ọjịra-jịra chajị ká ọhọbịrị nyamwụ ka chị wu angịkịla ka.

 JẸ́ GỤ ỌỌWA

3. Ọhọbịrị nyahị o-ya dodehe kaa họhị uda

Ọhọbịrị ọnyị myị́ ọnyị ọlẹ kahị họ kaa jụ iJihova, lẹ ahị kaa ya ịhọbịrị nyahị joo. Wa Eje Ọnyịịla 32:1-5, kanụ ya ẹla u-uhye nya ịtọ ẹla ọlẹ:

• Ịyẹ tị́ du kahị ka ya ịhọbịrị nyahị je iJihova ọkọkọ nyọka maga nya ọ-taa kpịbaa?

 4. IJihova kaa yẹ alịhọbịrị ahyẹẹrwẹrwa

Kori ká ọngọlẹ kọ họ ọhọbịrị ọtụka á pwa la ọ-ka ba ehile nya iJihova jẹ, ị ka gbọọ kpehe hi ọjịra-jịra, áhị tị ka yẹ julọọ kaka. Wa 1 Ala ịKọrịntị 5:6, 11, kanụ ya ẹla u-uhye nya ịtọ ẹla ọlẹ:

• Jaabwọ ká ịjọnwa kaa kpa ẹbẹ nya ịkaa mịrị, ányị ọ-yẹ jula ọlọhọbịrị ọlẹ kọ myị yẹda ka à tị́ ka jẹ́-ẹ gu alọjịra-jịra?

Ányị ụgbẹyị ọlẹ ká iJihova kaa họ ẹla ẹ-ẹga nya alịhọbịrị à tị́ mẹjẹ nyori eje ọchịchị nyamwụ la kpẹẹkpẹẹ bala o-ri o ri Ohe nya ahyẹẹrwẹrwa bala ọháha?

 ẸLỊYẸ A TỊ́ JẸ́?

Kori kahị họ ọhọbịrị ọtụka, ká ẹla ọọwa á tọhị olujwo bwu ẹpwụ nya ọkịlẹtụ, kahị maga nyọka hwabwọ la ang ọtịpyọ ọhọhọ, iJihova ka hịnyọhi hahị.

Ẹlịyẹ A Tị́ Yụbwọ Chị?

• Ịyẹ tị́ du kọ há nyahị ọ-ka ya ịhọbịrị nyahị dodehe je iJihova?

• Ịyẹ ahị tị́ ka họ nya iJihova ọ-ka hịnyọhi hahị?

• Kori kahị họ ọhọbịrị ọtụka, ịyẹ tị́ du kahị ka tịtọ nya ụbwọ ọdada ka ẹga nya angịgbahị nya ọjịra-jịra?