Ụka ọlẹ ká iJihova họhị, ọ ya āhị ọnyịịla ọhẹ hahị—āhị nya ẹla oyaya. Abwọlẹ kahị kpa āhị ọwẹ họ ụkụrwọ kaa roo ẹla? Ịnọọ! (Wa iJemsi 1:26.) Lẹ ányị ahị tị́ ka kpa āhị nya ẹla oyaya nyahị họ ụkụrwọ kọ ka kpụ iJihova ịpyọ?

1. Ányị ahị tị́ ka kpa āhị nya ẹla oyaya họ ụkụrwọ?

ỊBayịbụụ byihi nyori ahị nyị “ju awụlẹ ọhụ kịlahị-ịlahị bala o-juwa kpa ọmyịmyị nya awụlẹ wule.” (1 Ala ịTẹsalonika 5:11) À jẹ́ angịhyẹ ịlẹ kị baba nya ọhụ ojuju? Ịyẹ a tị́ ka jẹ́-ẹ họ nyọka jwaa ọhụ? Họ kị jẹ́ nyori à kpahị jwaa. À ka jẹ́-ẹ ya ẹla nyaa ọlẹ kọ kpụng ịpyọ jaa. À kpịtịya nya ụpwụ ịgọgọ ọlẹ kọ ka jẹ́-ẹ ju ọngọhẹ ọlẹ ká jẹ́ ọhụ? Ị lụmẹ ká ka jẹ́-ẹ chụ bwu. Kpịtịya nyori abwọlẹ ká ya ọnụ nọ ya ẹla, ka jẹ́-ẹ ju ọngịnyị ọhụ yẹẹyẹẹ ịnyịnyị. Lẹ maga nyọka ya ẹla kpẹnẹẹ ụka myị́ ụka.—Etu 15:1.

2. Ẹla oyaya ọlanyị ahị tị́ ka cheji ba hi?

ỊBayịbụụ yẹkẹẹ: “Anụ myị ká ẹla onyobyi oyaya ọhẹ-lọhẹ á bwu ọnụ nyanụ kpong-kpong kokoo!” (Wa Ala Efesọsị 4:29.) Etu nya ẹlẹwẹ ri, áhị kaa ya achị-ala lee ọ-la ọnụ ọwọọwọọ bala o-ya ẹla o-gu ọngịnyị chọọchọọ ka. Ahị ka cheji ba hi ọngịnyị ọ-kpa kụ lee ẹnyị nya ọngịnyị ọ-kpa bịrị pyii ịnyịnyị.—Wa Etu 16:28.

3. Ụgbẹyị oyina ahị tị́ ka jẹ́-ẹ ya ẹla o-ju angịkịla ọhụ?

Ụka lụmẹ-lụmẹ, ẹla ọlẹ kahị kaa ya kaa chị ẹla ọlọkịlẹtụ nyahị bala ẹla ọlẹ kahị kaa kụ irya ju ehe. (ILuku 6:45) Lẹ ahị baba nyọka mẹjẹ ịlọhị nyọka ya irya nọ u-uhye nya ang ịnyịịla, ang ocheri-cheri, ang ohiigu, bala ang ị-ka ya ogbo ha Ohe. (Ala iFilipayị 4:8) Kori kahị tịtọ nyọka kụ irya nya ang ịwẹ aalẹ, ahị baba nyọka kpa ẹla ọjẹ́jẹ chụ ụya ọyaya bala aligu nyahị. (Etu 13:20) Ịyẹ à tị́ ka dang ụbwọ? Ene kahị ka ya ẹla, ọ ka há kori kahị kụ irya kpori-kpori ju ẹla ọlẹ kahị wẹẹ ka ya bala ụgbẹyị ọlẹ kahị ka bwu yoo. Kụ irya nya abwọlẹ ká ẹla ọlẹ ká wẹẹ ka ya ka la angịkịla. ỊBayịbụụ yẹkẹẹ: “Ẹla ọlọnụ nya angịhyẹ kaa gu angịnyị chọọchọọ lala ịcha, ẹla ọgẹnẹ-gẹnẹ nya ọngọ jẹ ẹla tị kaa myị̀ ẹbẹ.”—Etu 12:18.

 JẸ́ GỤ ỌỌWA

4. Gbe ẹlẹlẹ nyang

Ụka ọhẹ, ahị wuu kaa ya ẹla ọlẹ kahị kaa chị ijẹma ụka ohyẹẹkpẹ. (IJemsi 3:2) Wa Ala ịGaletiya 5:22, 23, kanụ ya ẹla u-uhye nya ịtọ ẹla ịlẹ:

• Abwẹla iyina bwu ẹpwụ nya ịwẹ a tị́ ka raabwọ ká iJihova ka ya hang chajị ká ka jẹ́-ẹ gbe ẹlẹlẹ nyang? Ányị abwẹla ịwẹ à tị́ ka jẹ́-ẹ dang ụbwọ?

Wa 1 Ala ịKọrịntị 15:33, kanụ ya ẹla u-uhye nya ịtọ ẹla ọlẹ:

• Ányị ụya ọyaya bala aligu ịlẹ ká chụ à tị́ ka jẹ́-ẹ gu abwọlẹ ká kaa ya ẹla?

Wa Ọngọlirya 3:1, 7, kanụ ya ẹla u-uhye nya ịtọ ẹla ọlẹ:

• Ụka oyina ọ tị́ ka pwoku nyọka hujiji lee o-godayị gbe ụka ọkịla ene kahị ka ya ẹla?

 5. Ya ẹla ọnyịịla nya angịkịla

6. Ya ẹla kpẹnẹẹ ta ugbiyegu nyang

 ẸLỊYẸ A TỊ́ JẸ́?

Omyi ẹla la ọngịrị. Ahị baba nyọka kụ irya kpori-kpori u-uhye nya ẹla ọlẹ kahị ka ya, ụka kahị ka yoo, bala abwọlẹ kahị ka ya ọnụ nọ yoo.

Ẹlịyẹ A Tị́ Yụbwọ Chị?

• Agbẹyị iyina a tị́ ka jẹ́-ẹ kpa ẹla oyaya nyang da angịkịla ụbwọ?

• Ẹla oyaya ụma oyina a tị́ ka cheji ba hi?

• Ịyẹ à tị́ ka dahị ụbwọ nyọka ya ẹla la omyi ọkpẹnẹẹ bala ọ-ka ya ẹla ọ-kpa angịkịla wule?