Aligu kaa du kahị kaa chị ọkẹkẹnị gụ ọwọwa lụka ọnyịịla bala o-juhi ọhụ lụka olujwo. ỊBayịbụụ tị gbileehi ụbwọ ụ-ụrụ nyori ọ-ọng myị́ ọng nya-à ri oligu ọnyịịla ka. Lẹ ányị a tị́ ka bwu chụ aligu ịnyịịla? Kụ ẹhị yẹ ịtọ ẹla ịlẹ wẹẹ.

1. Ányị aligu ịlẹ ká chụ à tị́ ka gu ọhịhị nyang?

Ahị kaa kụ irya lala angịlẹ kahị bịrị ụka bala. Irya ọkụkụ ọlịnyị ka há lee ọ-tịpyọ myị́. Ọ tị ka lịnyị kori kahị kaa bịrị ụka bala angịịwa a-ahịchịng lee ẹpwụ nya intanẹtị. ỊBayịbụụ yẹkẹẹ: “Á ju ogu ta angị jẹ ẹla, à ka jẹ ẹla, á tị dịrẹ aluchi [angịlẹ ká iJihova há ka] aalẹ, a họ ịlọng elego lẹ.” (Etu 13:20) Aligu ịlẹ kị la ọháha ẹ-ẹga nya iJihova bala ọ-kaa gbịgba họọ ka jẹ́-ẹ dang ụbwọ nyọka tụ́ jwoo chwẹẹ bala ọ-ka cheje ịnyịịla. Ma aligu ịlẹ kị la ọháha ẹ-ẹga nya iJihova ka, ka gbileng rụ hyoo myị́. Ọ́ la ẹbyẹbyị ka, ịBayịbụụ juhi ọhụ nyọka chụ aligu nyahị la ẹla ọjẹ́jẹ! Kori ká aligu nyahị á la ọháha ẹ-ẹga nya Ohe, ahị bala ịwa kaa yé apyobwuna. Ahị jẹ́-ẹ “ju awụlẹ ọhụ kịlahị-ịlahị bala o-juwa kpa ọmyịmyị nya awụlẹ wule.”—1 Ala ịTẹsalonika 5:11.

2. Ányị aligu ịlẹ ká chụ à tị́ kaa la iJihova?

IJihova kaa kpẹhị chịng chụ aligu nyamwụ. Ọ kaa “ri igu ta angị họ ang ọnyịịla.” (Etu 3:32) Ányị ọ tị́ ka la iJihova kori kahị chụ aligu ịlẹ kị la ọháha ẹ-ẹga nyamwụ ka? Ọ ka jwọọ ka kpoye! (Wa iJemsi 4:4.) Ma, ẹla nyahị ka kpụ iJihova ịpyọ, ọ tị ka chụhị nyọka ri aligu nyamwụ kori kahị pwa ogu ọtịpyọ, kahị myịmyị cheje nyọka tụ́ jwoo ọwa bala angịlẹ kị la ọháha ẹ-ẹga nyamwụ chwẹẹ.—Eje Ọnyịịla 15:1-4.

 JẸ́ GỤ ỌỌWA

4. Angịnyị ịlẹ kị datị hiihi ka jẹ́-ẹ ri aligu ịlịkẹjẹ nyahị myị́

ỊBayịbụụ ya ẹla u-uhye nya iDevidi bala iJonatan, kị ri alẹng imiiye ịhyẹ bwu ẹpwụma nya Isirẹlụ. IJonatan ri ọgbahị nya iDevidi yẹẹyẹẹ, ọ myịmyị ri ọnyị nya Adịrahụ; ọ tị lịnyị odu lẹ, ị ri aligu la apatabwọ kiwa ka. Wa 1 ịSamwẹlụ 18:1, kanụ ya ẹla u-uhye nya ịtọ ẹla ọlẹ:

• Ịyẹ tị́ du ká aligu nyahị ka ri alịkpa nyahị lee o-ji iwe-ahụrụ ụma ookpokpo balahị pyiipyii ka?

Wa Ala iRom 1:11, 12, kanụ ya ẹla u-uhye nya ịtọ ẹla ọlẹ:

• Ányị aligu ịlẹ ká iJihova há à tị́ ka jẹ́-ẹ ju awụlẹ ọhụ?

Ẹ-ẹpwụ nya ifim ọwẹ, yẹ jaabwọ ká ọọnahị okolobya ọhẹ bwu yé oligu ẹ-ẹga ọlẹ kọ yahị me ka. Yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.

• Ẹ-ẹpwụ nya ifim ọwẹ, ịyẹ tị́ du ká ayịda Akil bala ịnamwụ chuko u-uhye nya angịlẹ kọọ ju ogu bala u-ube-ụpwụ?

• Ịyẹ tị́ du ká aligu nyamwụ ịwẹ họ́ọ ụka nya ọgbanyẹ?

• Ịyẹ à tị́ dọọ ụbwọ nyọka lịlọmwụ nwee kaka?

 5. Jaabwọ á ka bwu la aligu ịnyịịla

 ẸLỊYẸ A TỊ́ JẸ́?

Kori kahị chụ aligu nyahị la ẹla ọjẹ́jẹ, ọ kaa kpụ iJihova ịpyọ, ahị tị myịmyị kaa yé apyobwuna lịlọhị.

Ẹlịyẹ A Tị́ Yụbwọ Chị?

• Ịyẹ tị́ du ká aligu ịlẹ kahị chụ kaa ri iJihova ẹla?

• Angịnyị ụma iyina ahị tị́ ka ju ogu bala ka?

• Ányị a tị́ ka bwu ri igu ta angịlẹ kị pwoku?