ANG ỌJẸ́JẸ 41
Ẹla Ọlẹ ká ỊBayịbụụ Ya u-Uhye nya Ẹga nya Awụlẹ Ọkaka
Ọ kaa gbu iru nya angịnyị ịnyịrọ wọọ nyọka ya ẹla u-uhye nya ẹga nya awụlẹ ọkaka. Ma, ụka ká ịBayịbụụ-ụ́ ya ẹla nya ẹga nya awụlẹ ọkaka, ọ kaa họ ịnyị ụ-ụgbẹyị ọlẹ kọ la kpụrụrụ bala ọ-la ihi. Ahị kaa yé apyobwuna bwu ẹla ọlẹ kọ ya. Ọ jẹ́ lịnyị chajị ịBayịbụụ bwu ẹga nya iJihova, Ọngọlẹ kọ Họhị. Lẹ ọ jẹ́ ang ọlẹ kọ ka há hahị. O ya ang ọlẹ kahị ka họ chajị ká ẹla nyahị ka kpọọ ịpyọ, bala ang ọlẹ kọ ka dahị ụbwọ nyọka chị ọkẹkẹnị gboyi myị́ oyi.
1. Ányị iJihova à tị́ yẹ ẹga nya awụlẹ ọkaka?
Ẹga nya awụlẹ ọkaka ri āhị bwu ẹga nya iJihova. Ọ tịtọ ká ẹga nya awụlẹ ọkaka ka kpa ọkẹkẹnị wẹ ọlẹng bala ọnyang ịlẹ kị ye awụlẹ. Āhị ọwẹ á ri ụgbẹyị ọlẹ ká ahụ bala ọrụ kaa kpa ma anyị kem ka, ma ọ ri ụgbẹyị ọlẹ kị kaa kpa mẹ ọháha jẹ ẹ-ẹga nya awụlẹ ịnyịnyị. Ịnyị à du ká Omyi Ẹla nya Ohe yẹkẹẹ: “Chị ọkẹkẹnị ju ahụ nya okolobya nyang” lẹ. (Etu 5:18, 19) IJihova tịtọ ká ahụ bala ọrụ ịlẹ kị ri Angịnyị nya ịKịrayịsị ka godayị kpẹẹkpẹẹ ha awụlẹ, lẹ ị́ ka yọyị ka odehe nyọka họ ụya ka.—Wa Ala iHiburu 13:4.
2. Ịyẹ tị́ ri ụya ọhọhọ?
ỊBayịbụụ byihi nyori ‘angị juwa họ ụya wuu nyị́ ka ri ugu nya ịpyị Adịrahụ nya Ohe Oluhye kpong-kpong ka.’ (1 Ala ịKọrịntị 6:9, 10) Angịlẹ kị da ịBayịbụụ la òja nya iGiriki kpa omyi ẹla ọlẹ kọ ri por·neiʹa chabwọ nya ụya ọhọhọ. Etu nya omyi ẹla ọwẹ ri (1) ọlẹng bala ọnyang ịlẹ kị ye awụlẹ ka ọ-ka ẹga nya awụlẹ, a (2) alẹng-alẹng lee anyang-anyang ọ-họ ụya ta awụlẹ, bala (3) ọngịnyị ehe ọ-nọ ta iyo ileji. Ụka kahị “cheji ba hwẹẹ hi ụya ọhọhọ,” ẹla nyahị kaa kpụ iJihova ịpyọ, ahị tị kaa yé apyobwuna ịnyịnyị.—1 Ala ịTẹsalonika 4:3.
JẸ́ GỤ ỌỌWA
Kụ ẹhị yẹ abwọlẹ á ka bwu cheji ba hi ụya ọhọhọ bala abwọlẹ á ka yé apyobwuna bwula ọ-kịnyaa la abwẹla nya ocheri-cheri ọlala.
3. Rụnyẹ rụ hi ụya ọhọhọ
IJosẹfụ ma uya nyọka kịnyaa ẹ-ẹpwụ nya ocheri-cheri ọlala a-abwẹla. Wa Ọmwụ Ọdada 39:1-12, kanụ ya ẹla u-uhye nya ịtọ ẹla ịlẹ:
-
Ịyẹ à tị́ gu iJosẹfụ gbịla nyọka rụnyẹ rụ?—Yẹ ọgba 9.
-
À me irya nyori iJosẹfụ cheje ọnyịịla? Ịyẹ tị́ du ká ya ịnyị?
Ányị anjwo ikolobya bala ịyẹẹnọ à tị́ ka bwu gbịla iJosẹfụ bala ọ-ka rụnyẹ rụ hi ụya ọhọhọ alẹ? Yẹ IFIM ọwẹ.
IJihova tịtọ kahị ka cheji ba hi ụya ọhọhọ. Wa 1 Ala ịKọrịntị 6:18, kanụ ya ẹla u-uhye nya ịtọ ẹla ịlẹ:
-
Iwe-ahụrụ iyina à tị́ ka kpa ọngịnyị ju ka ẹpwụ nya ụya ọhọhọ myị́?
-
Ányị a tị́ ka bwu chị ịgọ hi ụya ọhọhọ?
4. À ka jẹ́-ẹ kụrụ ọmayẹ myị́
Ịyẹ tị́ du kọ ka lujwo nyọka pwa ịmayẹ nya ụya ọhọhọ myị́? Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Ányị ọọnahị ọlẹng ọla ifim ọwẹ à tị́ họ ụka kọ yẹ nyori irya ọkụkụ bala abwẹla nyamwụ ka du kọ ka dayị kpẹẹkpẹẹ ha ahụ nyamwụ ka myị́?
Ụka ọhẹ, Angịnyị nya ịKịrayịsị ị-chịla o-hu ọkịlẹtụ ha dọmwụ kaa ma uya ta irya ịtịpyọ. Ányị a tị́ ka bwu cheji ba hi ọ-kịnyaa la ọ-ka kụ irya u-uhye nya ẹla nya ụya? Wa Ala iFilipayị 4:8, kanụ ya ẹla u-uhye nya ịtọ ẹla ịlẹ:
-
Ụma nya ang ịlanyị ahị tị́ ka me irya ju?
-
Ányị ịBayịbụụ ọwawa bala ahị ọ-kịnyaa ẹ-ẹpwụ nya ụkụrwọ nya iJihova ọhọhọ ọgwọgụ à tị́ ka jẹ́-ẹ dahị ụbwọ cheji ba hi ọhọbịrị ọhọhọ?
5. Ahị kaa yé apyobwuna bwula ọ-kpa ehile nya iJihova
IJihova jẹ́ ang ọlẹ kọ há hahị. O ya jehi jaabwọ ọlẹ kahị ka bwu kịnyaa la ocheri-cheri ọlala ẹ-ẹpwụ nya abwẹla bala apyobwuna ịlẹ kahị ka yé kori kahị họ ịnyị. Wa Etu 7:7-27 lee yẹ IFIM ọwẹ, kanụ ya ẹla u-uhye nya ịtọ ẹla ịlẹ kị tọọ da.
-
Ányị ọlẹng ọwẹ à tị́ kpa ịlọmwụ kaka ju ka ẹpwụ nya ọmayẹ?—Yẹ Etu 7:8, 9.
-
Jaabwọ ká ụpwụ nya Etu 7:23, 26 mẹjẹ, ụya ọhọhọ ka jẹ́-ẹ ju ọmwụ nya akama onyobyi-obyi ha ọngịnyị myị́. Kori kahị kịnyaa la ocheri-cheri ọlala ẹ-ẹpwụ nya abwẹla, akama iyina ahị tị́ ka jẹ́-ẹ cheji ba hi myị́?
-
Ányị ahị ọ-la cheri-cheri a-abwẹla à tị́ ka jẹ́-ẹ dahị ụbwọ nyọka chị ọkẹkẹnị ẹ-ẹpwụ nya ọhịhị gboyi myị́ oyi?
Angịhyẹ kaa kụ irya nyori ẹla ọlẹ ká ịBayịbụụ ya u-uhye nya alẹng-alẹng lee anyang-anyang ọ-họ ụya ta awụlẹ nyị́ mẹ ọháha jẹ ka. Ma iJihova, Ohe nya ọháha tịtọ kahị ka yé ọkẹkẹnị ẹ-ẹpwụ nya ọhịhị gboyi myí oyi. Nyọka jẹ́-ẹ lịnyị hahị, ahị ka hịhị ba ehile nyamwụ jẹ pyii lẹ. Wa 1 Ala ịKọrịntị 6:9-11, kanụ ya ẹla u-uhye nya ịtọ ẹla ọlẹ:
-
Irya nya alẹng-alẹng lee anyang-anyang ọ-họ ụya ta awụlẹ, Ohe à tịtọ kahị ka ma uya ta kem lẹ?
Nyọka họ ẹla kpụ Ohe Oluhye ịpyọ, ahị wuu baba nyọka nwụ họ. Apyobwuna ọhẹ ji ẹpwụ nya ọọwa? Wa Eje Ọnyịịla 19:8, 11, kanụ ya ẹla u-uhye nya ịtọ ẹla ịlẹ:
-
À me irya nyori ehile nya iJihova u-uhye nya abwẹla ocheri-cheri hiigu? Ịyẹ tị́ du ká ya ịnyị?
IJihova da iru nya angịnyị lụmẹ-lụmẹ ụbwọ nyọka ju ihi nya ehile nyamwụ u-uhye nya abwẹla ocheri-cheri. Ọ ka jẹ́-ẹ dang ụbwọ ịnyịnyị
ANGỊHYẸ KAA YẸKẸẸ: “Kori ká ọlẹng bala ọnyang á há awụlẹ lẹ aalẹ, ọ́ tịpyọ kori kị nọ ta awụlẹ ka.”
-
Ányị a tị́ ka ya?
ẸLỊYẸ A TỊ́ JẸ́?
Ẹga nya awụlẹ ọkaka ri āhị o-bwu ẹga nya iJihova ha ahụ bala ọrụ. Ọ ya haa kọ ka kpa ọkẹkẹnị waa.
Ẹlịyẹ A Tị́ Yụbwọ Chị?
-
Ịyẹ ụya ọhọhọ à tị́ ri?
-
Ịyẹ à tị́ ka dahị ụbwọ nyọka cheji ba hi ụya ọhọhọ?
-
Ányị ahị tị́ kaa yé apyobwuna ụka kahị ba ehile nya iJihova jẹ u-uhye nya abwẹla ocheri-cheri?
JẸ́ ANG ỊLẸ DỌỌ U-UHYE
Jẹ́ ang odudu ọlẹ ká Ohe Oluhye tịtọ ká ọlẹng bala ọnyang ka ye awụlẹ ene kị ka kụ lawụlẹ.
Jẹ́ ang odudu ká ehile ọlẹpwụ nya ịBayịbụụ u-uhye alẹng-alẹng lee anyang-anyang ọ-họ ụya ta awụlẹ á mẹjẹ nyori ahị ka ba angịịwa ẹtẹ ka.
“Alẹng-alẹng lee Anyang-anyang ọ-Họ Ụya Ta Awụlẹ Tịpyọ?” (Ụpwụ ọla intanẹtị)
Jẹ́ abwọlẹ ká ehile nya Ohe Oluhye u-uhye nya ẹga nya awụlẹ ọkaka ụma ọnyị myị́ ọnyị kaa chewu keehi.
“Ọ-Pịlẹ Alẹng lee Anyang nya Ọngịnyị Nẹ Ri Ẹga nya Awụlẹ Ọkaka Ịnyịlẹhị?” (Ụpwụ ọla intanẹtị)
O-oja ọlẹ kọ ri, “Ị kpam ụ-Ụgbẹyị Ọlẹ kọ Lihi,” yẹ ang ọlẹ kọ gu ọlẹng ọhẹ kọ kaa họ ụya ta alẹng ịkịla, gbịla nyọka yẹ ọhịhị nyamwụ da chajị kọ ka kpụ Ohe Oluhye ịpyọ.
“ỊBayịbụụ Kaa Yẹ Ọhịhị Da” (Ẹpwang ọ-Kụ Gbeji nya ahyẹẹnụ 1 nya Ọya Ohene, 2011)
a Ụma nya ẹga nya awụlẹ ọkaka ọlẹ kị wẹẹ ya ẹla rụ́ ri ọhọhọ lala ọlẹng bala ọnyang ọ-nọ ta awụlẹ, ọ-pịlẹ alẹng lee anyang nya ọngịnyị nẹ, ọ-nọ ta awụlẹ bwu ọmwụ, bala ọ-kpa ụbwọ tudu anyang lee alẹng lee ẹmẹ nya ọngịnyị.
