ANG ỌJẸ́JẸ 38
Āhị nya Ọhịhị a Myịng Lẹhị
Ọhịhị myị̀ la ang ịdatị-ịdatị ịlẹ kị kaa ya ọkẹkẹnị hahị. Kori kahị dọmwụ la akama wẹwẹ, ang ịhyẹ ji ịlẹ kahị ka jẹ́-ẹ họ kị ka ya ọkẹkẹnị hahị. Ányị ahị tị́ ka mẹjẹ nyori āhị nya ọhịhị myịhị lẹhị? Ịyẹ à tị́ ri ang ọkpọnchị ọlẹ kọ du kahị ka họ ịnyị?
1. Ịyẹ tị́ du ká ọhịhị ka myịhị lẹhị?
Ọhịhị chịla kọ ka myịhị lẹhị chajị ọ ri āhị o-bwu ẹga nya iJihova Adahị. Ọwa à ri “ẹmwụ-enyi nya ọhịhị lẹ.” Ọọwa ri, ọwa à họ ọhịhị wuu lẹ. (Eje Ọnyịịla 36:9) “Ohe Oluhye a hu ọhịhị hahị . . . bala ang myị́ ang ịlẹ wuu kahị la lẹ.” (Ụkụrwọ nya Alẹrụ 17:25, 28) IJihova ya ang ịlẹ kahị baba nyọka kịnyaa la ọhịhị hahị. Ịnyịnyị, ọ họ chịkpẹẹ chajị kahị ka jẹ́-ẹ yé ọkẹkẹnị ẹ-ẹpwụ nya ọhịhị.—Wa Ụkụrwọ nya Alẹrụ 14:17.
2. Ányị ahị tị́ ka mẹjẹ iJihova nyori āhị ny ọhịhị myịhị lẹhị?
Bwu ụka-ụka ọlẹ kị kpẹnyị nyang, iJihova kaa kpahị jung. Ẹ-ẹpwụ nya abwọ ọrịrị ọhẹ ọlẹ kị da ju ị-ịBayịbụụ, ọnchẹ nya iJihova ọhẹ byoo yẹkẹẹ: “À yẹm ene kịị mam.” (Eje Ọnyịịla 139:16) Ọhịhị nyahị kpịnya ẹ-ẹhị nya iJihova. (Wa ịMatiyu 10:29-31.) Ọ ka tọọ olujwo nya ịlẹhị-ịlẹhị kori ká ọngọngọhẹ-ẹ́ tọchị-tọchị hu ọhịhị nya ọngọkịla, dọmwụ tụ́ ọhịhị nyịlọmwụ ayịdang. a (Ehe Ọkpụkpụ 20:13) Ọ ka jụ́ iJihova kori kahị họ ịngịngịhyẹ ọlẹ kọ ka ju ọmwụ igu nyahị. Ọ ka jwọọ ịnyịnyị kori kahị maga nyọka chewu ke ọhịhị nya angịkịla ka. Kori kahị kpahị ju ọhịhị nyahị bala ọ-chị ihi ju ọhịhị nya angịkịla, ahị mẹjẹ nyori āhị nya ọhịhị myịhị lẹhị..
JẸ́ GỤ ỌỌWA
Kụ ẹhị yẹ agbẹyị ịhyẹ ịlẹ á ka bwu mẹjẹ nyori āhị nya ọhịhị myịng lẹhị.
3. Kpahị ju ịnyịrọ nyang
Chajị nyọlẹ kahị hu ịlọhị ju iJihova ụ-ụbwọ nyọka họ irya nyamwụ wẹẹ, ahị kaa kpa ọhịhị nyahị wuu gbịgba họọ. Ọ lala o-ri ahị hu ugbinyịrọ nyahị wuu kiliya ha Ohe Oluhye lẹ. Wa Ala iRom 12:1, 2, kanụ ya ẹla u-uhye nya ịtọ ẹla ịlẹ:
-
Ịyẹ à tị́ ka gung gbịla nyọka kpahị ju ịnyịrọ nyang?
-
Agbẹyị iyina a tị́ ka bwu họ ịnyị?
4. Dụmwọ-dụmwọ ká họ ọngịnyị ang lee o-ju ọmwụ igu ka
ỊBayịbụụ juhi ọhụ nyọka hwabwọ la ọ-ka họ ang ịlẹ kị ka kpa akama wahị myị́. Yẹ IFIM ọwẹ nyọka jẹ́ ang ịlẹ á ka họ nyọka chewu ke ịlọng.
Wa Etu 22:3, kanụ ya ẹla u-uhye nya ang ịlẹ ká ọngịnyị ka họ nyọka chewu ke ịlọmwụ bala angịkịla ụka . . .
-
kọ juwa ẹ-ẹpwa.
-
kọ juwa họ ụkụrwọ.
-
kọ juwa kọ ayịlọ.
-
kọ juwa kụ ang ọrụnyẹ lee ụka kị hwoo ụ-ụwa.
5. Chị ihi ju ọhịhị nya ọnyị ọlẹ kị ma lẹka
IDevidi ya nyori iJihova nyị lirya ẹ-ẹga nya ọhịhị bala ọnwànwa nya ọnyị ọlẹ kọ juwa ẹ-ẹpwụ nya ịnamwụ. Wa Eje Ọnyịịla 139:13-17, kanụ ya ẹla u-uhye nya ịtọ ẹla ọlẹ:
-
Ẹ-ẹhị nya iJihova, ụka oyina ọhịhị nya ọngịnyị à tị́ dọmwụ? Ụka kị kpẹnyị nyamwụ lee ụka kị mọọ kpá tị́?
Ehile ịlẹ ká iJihova ya ha ala Isirẹlụ chewu ke ịnịna bala anyị nyaa. Wa Ehe Ọkpụkpụ 21:22, 23, kanụ ya ẹla u-uhye nya ịtọ ẹla ịlẹ:
-
Ányị iJihova à tị́ kaa yẹ ọngọlẹ kọ hu ọhịhị nya ọnyị ọlẹ kị ma lẹka la ọ-mamachịng ka?
-
Ányị a tị́ me irya kọ ka lọọ kori ká ọngịnyị á mamachịng họ ịnyị? b
-
Ányị a tị́ yẹ irya nya Ohe ọwẹ?
Ọnyang ọlẹ kọ dọmwụ jẹ́ apyobwuna nya ọhịhị yẹẹyẹẹ, ka lirya myị́ nyori ẹnyị ọbịrịị-bịrị à ri ang ọlẹ kọ ka jẹ́-ẹ họ kẹnẹ-kẹnẹ ẹẹ. Wa Ayịsaya 41:10, kanụ ya ẹla u-uhye nya ịtọ ẹla ịlẹ:
-
Kori kị juwa tụ́ ọnyang tutu nyọka bịrị ẹnyị, owo ọ tị́ ka towo nya ụbwọ ọdada? Ịyẹ tị́ du?
ANGỊHYẸ KAA YẸKẸẸ: “Ọnyang la ọngịrị nyọka bịrị ẹnyị kori kọ họ́ọ, chajị ọwa à kpa ọnyị ọọwa ẹ-ẹpwụ nyamwụ lẹ.”
-
Ẹlịyẹ à tị́ ya ọ-jẹ́ myị̀myị̀ hang nyori ọhịhị nya ịnịna, tụ́ ọnyị ọlẹpwụ, ju apyobwuna ha iJihova?
ẸLỊYẸ A TỊ́ JẸ́?
ỊBayịbụụ mẹjẹ́ẹhị nyori ọhịhị, ko ri āhị bwu ẹga nya iJihova, nyị ka háahị, ahị nyị ka chị ihi jwoo, bala o-chewu koo. Ọọwa gu ọhịhị nyahị, tụ́ ịnya angịkịla.
Ẹlịyẹ A Tị́ Yụbwọ Chị?
-
Ịyẹ tị́ du ká ọhịhị nya ọngịnyị ehe ju apyobwuna ha iJihova?
-
Ányị ọ tị́ kaa la iJihova ụka ká ọngịnyị ehe ọhẹ á tọchị-tọchị nwụ ọngịnyị ehe ọkịla?
-
Ẹlịyẹ à tị́ myịng lẹhị wuu u-uhye nya āhị nya ọhịhị?
JẸ́ ANG ỊLẸ DỌỌ U-UHYE
Ányị ahị tị́ ka ji iJihova obe chajị nya āhị nya ọhịhị?
Ohe Oluhye ka myị-ị̀ hịnyọhi ha ọnyang ọlẹ kọ bịrị ẹnyị? Mwahị nya ọwẹwẹ nya ịtọ ẹla ọwẹ.
“Ẹla Ọlẹ ká ỊBayịbụụ Ya u-Uhye nya Ẹnyị Ọbịrịị-bịrị” (Ụpwụ ọla intanẹtị)
Jẹ́ ang u-uhye nya abwọlẹ ká Ohe kaa yẹ ọhịhị, nyọka dang ụbwọ cheji ba hi ụma nya ayịlọ ọkọkọ ịlẹ kị ka kpa ọhịhị nyang ụ-ụbwọ myị́.
“Ọ Chịla Kahị ka Kọ Ayịlọ i-Kpoye nya Oyi?” (Awake! nya ahyẹẹnụ 8 nya Ọya Okiriwo, 2000)
Kori ká ọngịnyị á lirya nyọka ju orinwa bẹẹ? Kụ ẹhị yẹ abwọlẹ ká ịBayịbụụ ka jẹ́-ẹ dụbwọ.
“M̀ Tịtọ Nyọka Gbu—ỊBayịbụụ ka Jẹ́-ẹ Dam Ụbwọ Ụka Kam Lirya Nyọka Ju Orinwa?” (Ụpwụ ọla intanẹtị)
a IJihova kpahị ju angị la ọkịlẹtụ ọ-kpụ enyi yẹẹyẹẹ. (Eje Ọnyịịla 34:18) Ọ jẹ́ ọjụjụ ọlẹpwụ nyaa ọlẹ kọ du kị kaa tịtọ nyọka ju orinwa, ọ tị tịtọ nyọka daa ụbwọ. Nyọka yẹ jaabwọ ọlẹ kọ kaa ya ọngịrị ha ọngịnyị nyọka hwabwọ la o-ju orinwa, yẹ egbeju ẹla ọlẹ ko ri, “M̀ Tịtọ Nyọka Gbu—ỊBayịbụụ ka Jẹ́-ẹ Dam Ụbwọ Ụka Kam Lirya Nyọka Ju Orinwa?” ọlụpa nya Jẹ́ Ang Ịlẹ Dọọ U-Uhye, ẹ-ẹpwụ nya ang ọjẹ́jẹ ọlẹ.
b Angịlẹ kị bịrị ẹnyị lụka ọkẹkpẹ á baba nyọka nwụ ịlaa la abyị ka. IJihova ka jẹ́-ẹ hịnyọhi haa. Nyọka jẹ́ gụ ọọwa, yẹ egbeju nya ẹla ọlẹ kọ ri “Ẹla Ọlẹ ká ỊBayịbụụ Ya u-Uhye nya Ẹnyị Ọbịrịị-bịrị?” ọlụpa nya Jẹ́ Ang Ịlẹ Dọọ u-Uhye, ẹ-ẹpwụ nya ang ọjẹ́jẹ ọlẹ.
