Igu kaa kpa ajụjụ bala ọkịlẹtụ okpenyi wahị. Ịnyị à du ká ịBayịbụụ wụrọọ nya oluji nyahị lẹ. (1 Ala ịKọrịntị 15:26) À jẹ́ a-ang ọjẹ́jẹ 27 nyori iJihova ka kụrụ oluji ọwẹ. Ma, angịlẹ kị tị gbu ene lẹ bẹẹ? Ịyẹ à tị́ ka họ taa ịwa? A-ang ọjẹ́jẹ ọlẹ, à ka jẹ́ ang gụ ọọwa u-uhye nya ehe ọnyịịla-ọnyịịla ọlẹ ká iJihova chị nyọka tịrị uku-uku nya angịnyị ẹkpẹ wẹ ka la ọhịhị o-gboyi myị́ oyi. Ọ ka wulaa eji bwula igu! Ọ ka jẹ́-ẹ lịnyị myị́? Ị ka wuleji bwula igu kaka hịhị e-epwoohe lee ám̀ odehe tị́?

1. Ịyẹ iJihova à tị́ tịtọ nyọka họ ha angị háahị há ịlẹ kị gbu?

IJihova tịtọ nyọka tịrị angịlẹ kị gbu ẹkpẹ wẹ ka la ọhịhị myịmyị. IJobu la ahị ọdahile nyori Ohe Oluhye-é ka deeri hyoo kori kọ gbu ka. Ọ byi Ohe yẹkẹẹ: “Á be ẹkọ wụrụm, m̀ ka myị [bwu ẹpwụ nya iworu].”—Wa iJobu 14:13-15.

2. Ányị ahị tị́ họ kahị jẹ́ nyori angịlẹ kị gbu ka wuleji bwula igu?

Ụka ọlẹ ká iJisọsị jam odehe, Ohe Oluhye ya ọngịrị họọ nyọka wule egu eji. IJisọsị wule ọnyị ọnyang ọlẹ kọ gu ẹka 12 bala ọnyị ọlẹng nya ahụ ogu, eji bwula igu ka la ọhịhị. (ỊMakị 5:41, 42; iLuku 7:12-15) Ụka ọkịla, ịLasarọsị oligu nya iJisọsị gbu. Nanana nyori o gbu kpụ ị jwoo eji ri ẹnụtụrụ ine lẹ, iJisọsị tịrọọ ẹkpẹ ka la ọhịhị myịmyị. Nyọlẹ ká iJisọsị raabwọ ha Ohe Oluhye kpá, ọ jahị da ka ẹga nya iworu nyamwụ, lẹ ọ be ẹkọ yẹkẹẹ: “ỊLasarọsị! Gba kpehe warị lẹẹlẹẹ mẹ.” Ọọwa lẹ, “ogu ịLasarọsị . . . a gba kpehe” lẹlẹ! (ỊJọn 11:43, 44) Kụ irya jaabwọ ọlẹ ọ́ ka kpa ugbiyegu bala aligu nya ịLasarọsị ịpyọ kaka ba wẹẹ!

3. Ẹhị ọrịrịị-rịrị oyina à tị́ juwa ha angị háng há ịlẹ kị gbu?

ỊBayịbụụ chị ehe yẹkẹẹ: “Owuleji bwula igu ka juwa.” (Ụkụrwọ nya Alẹrụ 24:15) Angịlẹ ká iJisọsị wuleji bwula igu lụka ọkẹkpẹ á rụ ka epwoohe ka. (ỊJọn 3:13) Ọ kpaa ịpyọ nyọlẹ kị wulaa eji bwula igu kaka hịhị odehe. Ịnyịnyị lụka ọ-kpii, iJisọsị ka wule uku-uku nya angịnyị eji bwula igu nyọka hịhị gboyi myí oyi ám̀ odehe la ọkẹkẹnị. O ya nyori “angịlẹ kị gbugbu juwa i-iworu nyaa wuu” nyị ka wuleji bwula igu, tụ́ angịlẹ kọ lala o-ri nyị deeri hyaa lẹ, kị tị juwa ị-ịtịya ọkpụkpụ nya Ohe Oluhye wẹẹ.—ỊJọn 5:28, 29.

 JẸ́ GỤ ỌỌWA

4. IJisọsị mẹjẹ nyori ọ la ọngịrị nyọka wule egu eji

Jẹ́ ang gụ ọọwa u-uhye nya ang ọlẹ ká iJisọsị họ ha ịLasarọsị oligu nyamwụ. Wa ịJọn 11:14, 38-44, kanụ ya ẹla u-uhye nya ịtọ ẹla ịlẹ:

• Ányị ahị tị́ họ kahị jẹ́ nyori ịLasarọsị wuleji bwula igu ịlẹhị?—Yẹ ọgba 39.

• Kori ká iLasarọsị á rụ ka epwoohe, à me irya ká iJisọsị ka tịrọọ ẹkpẹ kaka hịhị odehe?

Yẹ IFIM ọwẹ.

5. Iru nya angịnyị ka wuleji bwula igu!

Wa Eje Ọnyịịla 37:29, kanụ ya ẹla u-uhye nya ịtọ ẹla ọlẹ:

• Ale uku-uku nya angịnyị ịlẹ kị ka wuleji bwula igu à tị́ ka ji?

IJisọsị ka wule iru nya angịnyị eji bwula igu datị hi angịlẹ kị kaa gbịgba ha iJihova. Wa Ụkụrwọ nya Alẹrụ 24:15, kanụ ya ẹla u-uhye nya ịtọ ẹla ọlẹ:

• Owo à tị́ háng kọ ka wuleji bwula igu?

• Ányị ẹhị ọrịrịị-rịrị nya owuleji bwula igu à tị́ ya ẹjẹ ọkpụkpụ ha ayịda Phelicity bala ịnamwụ?

 ẸLỊYẸ A TỊ́ JẸ́?

ỊBayịbụụ chị ehe nyori uku-uku nya angịnyị ịlẹ kị gbu nyị ka wuleji bwula igu. IJihova tịtọ kị ka hịhị myịmyị, ọ tị ya ọngịrị ha iJisọsị nyọka wulaa eji bwula igu.

Ẹlịyẹ A Tị́ Yụbwọ Chị?

• Ahị tị́ họ ányị kahị jẹ́ nyori iJihova bala iJisọsị wẹẹ charịnya nyọka wule angịlẹ kị gbu eji?

• Ale uku-uku nya angịnyị ịlẹ kị ka wuleji bwula igu à tị́ ka ji—epwoohe lee odehe tị́? Ịyẹ tị́ du ká ya ịnyị?

• Ịyẹ tị́ du ká jẹ́ myị̀myị̀ nyori angị háng há ịlẹ kị gbu ka hịhị myịmyị wẹẹ?