Oja ọnyịịla nya angịnyị ọ-ka hịhị gbe oyi myị́ oyi ám̀ odehe ọlẹ juwa ẹ-ẹpwụ nya ịBayịbụụ. (Eje Ọnyịịla 37:29) ỊBayịbụụ la ẹnyị nya apwụ iwo ịrwọnyẹ kụrụ ịrwọnyẹ (66). Angịnyị angị iwo ine (40) Ohe Oluhye á kpa da ịBayịbụụ lẹ. IMosisi à da apwụ ịrụ nya ọgbanyẹ-ọgbanyẹ lala ẹka ụnọ ịta da ohu ịrụ (3,500) kam kẹkpẹ lẹ. ỊJọn ọngọjụgbẹyị nya ịKịrayịsị à tị da ụpwụ ọhyẹẹkpẹ, gụ ẹka ụnọ da ohu ihikichu (1,900) kam kẹkpẹ lẹ. Omyi ẹla nya owo angịwẹ à tị da? Ohe Oluhye ya ẹla taa bwula olegu ịgọgọ nyamwụ. (2 ỊSamwẹlụ 23:2) Ẹla ọla irya nya Ohe Oluhye ị da lẹ, ẹ-ẹla ọla irya nyịlaa ka. Lẹ, omyi ẹla nya iJihova à juwa ịBayịbụụ lẹ.—Wa 2 ITimoti 3:16; 2 IPita 1:20, 21.

Yẹ ifim Who Is the Author of the Bible?

Ahị jẹ́ nyori ịBayịbụụ bwu ẹga nya Ohe Oluhye, chajị ẹla ịlẹ kị da neeji ụ-ụwa wuu kaa họ jịra. Ọngịnyị ehe ọhẹ-lọhẹ á ka jẹ́-ẹ họ ịnyị myị́ ka. (IJochuwa 23:14) Ohe Oluhye Agụgụ kẹnẹ-kẹnẹ à jẹ́ jaabwọ ká ijuju nya angịnyị ehe ka la lẹ.—Wa Ayịsaya 42:9; 46:10.

Ụpwụ ọlẹ kọ bwu ẹga nya Ohe Oluhye chịla ọ ka datị hi apwụ ịkịla wuu, ịnyị ịBayịbụụ à tị la lẹ. Uku-uku nya ịBayịbụụ ji la oja ịdatị-datị gụ ohu ine da iwo ịrụ [450]. Nanana nyori ịBayịbụụ ri ụpwụ onyogo, iru nya ang ịlẹ ká angịnyị juwa chị ehe alẹ ri ịlẹ kọ ya neeji ene-ene lẹ. Ẹla ịlẹ ká angị iwo ine (40) ịwẹ da, á datị hi awụlẹ ka. * Myịmyị, ịBayịbụụ jẹ́ chabwọ nya ọháha yẹẹyẹẹ chajị Ohe Oluhye ri ọháha, ọ tị la ọngịrị nyọka yẹ ọhịhị nya angịnyị da bwu ọtịpyọ ka ọnyịịla. Ang ẹjẹẹ ịwẹ, dudu ká angịnyị jẹ́ nyori, ịBayịbụụ bwu ẹga nya Ohe Oluhye ịnyịlẹhị.—Wa 1 Ala ịTẹsalonika 2:13.

Yẹ ifim How Can We Be Sure the Bible Is True?

Egbeju nya ẹla ọkpọngchị ọlẹ kọ́ ju ị-ịBayịbụụ ri ijuju ọnyịịla ọlẹ ká Ohe Oluhye nwụlanọ gbe angịnyị ehe. Ụpwụ Ịgọgọ ya jehi jaabwọ ká iwe ọlẹ ká angịnyị la nyọka hịhị ị-ịparadayịsị ám̀ odehe gwaa byi bwu ọmwụ ọdada, bala abwọlẹ ká Ohe ka bwu tịrị ịparadayịsị ọọwa ẹkpẹ myịmyị.—Wa Ọwụrụụ-wụrụ 21:4, 5.

Ehile bala ẹla ịmẹjẹ ịlẹ kị́ ka jẹ́-ẹ ya ọkẹkẹnị hahị juwa ị-ịBayịbụụ ịnyịnyị. Ọ myịmyị ya jaabwọ ká Ohe Oluhye họ ẹ-ẹga nya angịnyị ịlụka onyogo, ọọwa dahị ụbwọ nyọka jẹ́ abwụma nyamwụ yẹẹyẹẹ. Lẹ, ịBayịbụụ ka dang ụbwọ jẹ́ Ohe Oluhye myị́ bala ọ-ka mẹjẹng jaabwọ á ka bwu ri oligu nyamwụ.—Wa Eje Ọnyịịla 19:7, 11; IJemsi 2:23; 4:8.

Ụpwụ ọlẹ ka dang ụbwọ jẹ́ ẹla ọla ịBayịbụụ bwula ọ-ka dịrẹ ụgbẹyị ọlẹ ká iJisọsị kpa mẹ ang jẹ. Ọọ da angịnyị ụbwọ ka Ụpwụ Ịgọgọ ọhẹ bala ọkịla bala ọ mẹjaa “kị ka . . . jẹ́ etu nya ala ịlẹ kị da wuu ẹ-ẹpwụ” nyamwụ.—Wa ILuku 24:27, 45.

Oja Ọnyịịla ọlẹ kọ bwu ẹga nya Ohe Oluhye à baba ọọhịhị gu ang ịkịla wuu lẹ. Ma, angịhyẹ á tị kaa yọọ ịnyị ka, ọ dọmwụ kaa wụ angịkịla ẹjẹ pwuu nyọka wo oja ọwẹ. Ọkịlẹtụ à kpụng enyi kpong-kpong ka. Ahị ọdahile nyang nyọka ye ọhịhị ọmyịmyị-ka, kpụnịrọ ọ-ka jẹ́ Ohe Oluhye yẹẹyẹẹ.—Wa ỊJọn 17:3.