Olee Otú Ndịàmà Jehova Si Ewere Ịgba Alụkwaghịm?

KPỌWA

Anyị ji ihe Baịbụl kwuru gbasara alụmdi na nwunye na ịgba alụkwaghịm kpọrọ ihe. Mgbe Chineke malitere alụmdi na nwunye, ọ chọrọ ka a ghara inwe mgbe di na nwunye ga-ahapụ ibe ha. Naanị ihe Baịbụl kwuru nwere ike ime ka mmadụ gbaa alụkwaghịm bụ ma di ya ma ọ bụ nwunye ya kwaa iko.—Matiu 19:5, 6, 9.

Ndịàmà Jehova, hà na-enyere ndị alụmdi na nwunye ha chọrọ itisa aka?

Ee, n’ọtụtụ ụzọ:

Akwụkwọ Anyị. A na-ebipụta isiokwu ndị nwere ike inyere di na nwunye aka ka alụmdi na nwunye ha ghara itisa ma ndị nke o yiri ka ọ bụ na ha agaghị edozili nsogbu ha. Dị ka ihe atụ, lee ụfọdụ isiokwu ndị a “Ime Ka Obi Gị Dum Dịgide n’Ebe Nwunye Gị Ma Ọ Bụ Di Gị Nọ,” “Ihe Ga-enyere Di na Nwunye Aka Ịna-agbaghara Ibe Ha,” nakwa “Otú Ị Ga-esi Maliteghachi Ịtụkwasị Di Gị Ma Ọ Bụ Nwunye Gị Obi.”
Ọmụmụ Ihe. N’ọmụmụ ihe anyị nakwa ná mgbakọ anyị dị iche iche, a na-akụziri anyị ndụmọdụ ndị dị na Baịbụl ga-abara ndị lụrụ dị na nwunye uru.
Ndị Okenye. Ndị okenye ọgbakọ na-eji ihe ndị e dere na Baịbụl enyere ndị lụrụ di na nwunye aka. Ụfọdụ ebe ha na-agụrụ ha bụ ihe dị na Ndị Efesọs 5:22-25.

Ndị okenye ọgbakọ, hà ga-akwado Onyeàmà Jehova chọrọ ịgba alụkwaghịm?

Mba. Ọ bụrụ na ndị okenye chọrọ inyere ndị nwere nsogbu na alụmdi na nwunye ha aka, ọ bụghị ndị okenye ga-ekpebiri ha ihe ha ga-eme. (Ndị Galeshia 6:5) Mana, ọ bụrụ na mmadụ ekpebie ịgba alụkwaghịm nke Akwụkwọ Nsọ na-akwadoghị, ọ gaghịzi enwe ihe ùgwù ọ bụla n’ọgbakọ. N’ihi ihe Akwụkwọ Nsọ kwuru, onye ahụ agaghị aga lụọ onye ọzọ.—1 Timoti 3:1, 5, 12.

Olee otú Ndịàmà Jehova si ewere nkewa?

Baịbụl kwuru na di na nwunye ekwesịghị ịhapụ ibe ha ma ọ bụrụgodị na ihe agaghị otú ha tụrụ anya ya. (1 Ndị Kọrịnt 7:10-16) Ọ bụrụ na di na nwunye ana-ekpekọ ekpere ọnụ, na-eme ihe ndị Baịbụl kwuru ma hụ ibe ha n’anya, ọ ga-adịrị ha mfe idozi nsogbu ọ bụla ha nwere.—1 Ndị Kọrịnt 13:4-8; Ndị Galeshia 5:22.

Mana, ụfọdụ Ndị Kraịst ekpebiela ịhapụ dị ma ọ bụ nwunye ha n’ihi ihe ndị a:

Di kpachaara anya jụ ilekọta ezinụlọ ya.—1 Timoti 5:8.
Di ma ọ bụ nwunye na-akụ ibe ya isi aba okpu.—Abụ Ọma 11:5.
Ekweghị di ma ọ bụ nwunye fee Chineke. Dị ka ihe atụ, di ma ọ bụ nwunye nwere ike chọọ ịmanye di ya ma ọ bụ nwunye ya bụ Onyeàmà Jehova ka o nupụrụ Chineke isi. Onyeàmà ahụ a na-amanye imebi Iwu Chineke nwere ike kpebie na nkewa bụ naanị ihe ọ ga-eme ka o nwee ike “irubere Chineke isi dị ka onye na-achị achị karịa mmadụ.”—Ọrụ Ndịozi 5:29.