Ịba jide mmadụ, ahụ́ ọkụ ga na-ere ya, oyi ga na-ama ya, ọsụsọ ana-agbakwa ya. Isi ga na-awa ya, ahụ́ ana-egbukwa ya mgbu. O nwekwara ike ịna-agbọ agbọ. Mgbe ụfọdụ, ihe ndị a nwere ike ịna-eme ha metụ, ha akwụsị. Ihe dị ka ụbọchị abụọ ma ọ bụ atọ gafee, ha amalitekwa. Ọ bụ ụdị ịba ji onye ahụ ma ọ bụ ụbọchị ole ịba ahụ nọrọla ya n’ahụ́ nwere ike ime ka ọ na-eme ya otú ahụ.

1. O nwere ụdị anwụnta na-atanye mmadụ nje na-akpata ịba n’ahụ́.

2. Nje ndị ahụ ga-agazi n’imeju onye ahụ nọrọ mụbawa.

3. Ha ga-esi ebe ahụ gawa n’ọbara onye ahụ, nọrọkwa ebe ahụ na-amụba.

4. Ha ga-ejizi nwayọọ nwayọọ banye n’ọbara niile dị onye ahụ n’ahụ́.

5. Ọ bụ otú a ka nje ndị ahụ ga-esi jezuo onye ahụ ahụ́. Mgbe ahụ nje ndị ahụ na-amụba ka ihe ndị na-egosi na ịba ji onye ahụ ga na-eme ya.

Ihe ị ga-eme ma ọ bụrụ na i bi n’ebe ndị mmadụ na-arịakarị ịba:

• Zụta net anwụnta. O kwesịrị ịbụ

  • nke ndị rụrụ ya gbara ọgwụ anwụnta.

  • nke na-adọkaghị adọka.

  • nke ga-ekpuchi ebe mmadụ dina.

• Na-agba ọgwụ anwụnta n’ụlọ gị.

• I nwere ike ịrụnye net n’ọnụ ụzọ gị nakwa na windo gị. I nwekwara ike ịgbanye fan ma ọ bụ ntụoyi n’ihi na ha agaghị ekwe anwụnta besa ebe ọ bụla.

• Na-eyi ákwà ga-ekpuchi ahụ́ gị nke ọma.

• Ebila ọhịa nso, ekwekwala ka mmiri dọrọ otu ebe n’akụkụ ụlọ gị n’ihi na ha abụọ na-amụ anwụnta.

• Ọ bụrụ na ịba abịa gị, gwọọ ya ozugbo.

Ihe ị ga-eme ma ọ bụrụ na ị chọrọ ịga ebe ndị mmadụ na-arịakarị ịba:

• Jụọ ase tupu gị agawa. Ụdị nje na-akpata ịba n’otu ebe nwere ike ịdị iche na nke na-akpata ya n’ebe ọzọ. Ihe a nwere ike ime ka mmadụ nweta ọgwụ ga-aka arụ ọrụ n’ebe ahụ ọ na-aga. Ọ ga-adịkwa mma ka ị hụ dọkịta ka ọ gwa gị ihe ụfọdụ gbasara ahụ́ gị ị ga-akpachapụrụ anya tupu gị agawa.

• I ruo ebe ahụ, mee ihe ndị e kwuru n’isiokwu a gbasara ihe ndị bi n’ebe ndị mmadụ na-arịakarị ịba kwesịrị ịna-eme.

• Ọ bụrụ na ịba abịa gị, gaa ụlọ ọgwụ n’egbughị oge. Buru n’obi na mgbe ị ga-amalite hụwa ihe ndị na-egosi na ị na-arịa ịba nwere ike ịbụ n’agbata otu izu na otu ọnwa.