Ayinɛ Alɔ Nōo He Alɔ Ɔtu:

Ihɔtu nɛ alɔ lɛ lɛ Ɔwɔico mla ācɛ a gē lɛ abɔ kwu alɔ ɔtu ku alɔ yɛce ɛlā nɛ Ubáyíbu ka nōo kahinii: “Aá nyɔ̄ ga ɛgiyí ācɛ kú éwo dóódu, kú aá yá kéē le pīya ayíkpó kú um. Aá yá uwā ubatísim.” (Umát. 28:​19, 20; Umák. 12:​28-31) Ihɔtu ɔkwɛyi lɔfu nɛhi. Ó lɔfu lɛ abɔ kwu ɔtu ku “ācɛ nēé fu kéē lɛ oyēeyī opiyóó ā.”—Ācot. 13:48.

Ŋma igbihi a, ɔtu ku alɔ gē kwu ɛgɛ nɛ alɔ géē lɛ ocabɔ ku ɔka ō ka kpo tu ɛyi mla ō je ɔkpá ku alɔ lɛ ācɛ. Babanya, alɔ cɛgbá ō ya lɔhi fiyɛ ipu ɔwɛ nɛ alɔ gē kɔka mɛmla ācɛ a. Alɔ dɔka ō mafu ihɔtu lɛ ācɛ ɔhá ŋma lɛ ō kɛla lɛyikwu aikpɛyi ɛlā nōo he uwa ɔtu. Ɔɔma kē wɛ ō piya ɔwɛ nɛ alɔ gē tɔɔna a abɔ mla ō leyi taajɛ ku ɔdā nōo he eyeeye ku ācɛ a ɔtu a. Ɛgɛnyá nɛ ubrociɔ nyā géē ta alɔ abɔ ya ɛnyā a?

Ubrociɔ nyā lɛ aɛlā ō nwu 12 nōo gē nwu alɔ auce ō ya nɛ alɔ cɛgbá ō lɛ o ya ɛɛ ku alɔ mafu ihɔtu klla lɛ ācɛ piya ayikpo. Eyeeye ku ɛlā ō nwu a kɛla lɛyikwu ɔka ku Ubáyíbu, ku ɛgɛ nɛ Ujisɔsi amāŋ Ācɛ O Yɛce Ukraist ku eko aflɛyi a mafu uce olɔhi ipu uklɔ ku ɔna ō ta. Ɔdā nōo ya néē ya ɔkpá nyā i wɛ ō yɔ i jé ocabɔ ku ɔka ō ka a tu ɛyi ŋ, amáŋ ō yɔ i dɔka ɔwɛ nɛ alɔ géē mafu ihɔtu lɛ ācɛ. Naana nɛ eyeeye ku auce ō ya a cɛgbá ipu ɛjɛɛji aya ku uklɔ ku ɔna ō ta ku alɔ a, alɔ géē leyi yɛ ɛgɛ nɛ auce ō ya ōhī cɛgbá nɛɛnɛhi eko nɛ alɔ yɔ i gbɔɔ ɔka ō ka, eko nɛ alɔ yɔ i ya ōcigbihi nyɔ amāŋ oklɔcɛ ku Ubáyíbu.

Abɔ a yɔ i leyi yɛ eyeeye ku aɛlā ō nwu a, gbɛla lɔɔlɔhi lɛyikwu ɛgɛ nɛ a géē mafu uce ō ya ɔɔma eko nɛ a yɔ i kɛla lɛ ācɛ nōo yɔ ɔwɛ ɛgā nɛ a lā a. Ceyitikwu ku a lɔfu tu ihɔtu nɛ a lɛ lɛ Ujehofa mla ācɛ ɔhá a iyē. Ihɔtu ɔɔma nōo fiyɛ ɔwɛ doodu ō bi le tɔɔna a, géē ta uwɔ abɔ ō lɛ ācɛ piya ayikpo.

Ɛnɛɛnɛ ɛga nɛ alɔ lɛ ō yuklɔ ŋma ɔtu ekponu mla uwɔ a jɛ alɔ eyī nɛhi. (Usɛf. 3:9) Ujehofa kóō hɔha ce uwɔ nɛɛnɛhi, abɔ a gɔbu yɔ i yihɔtu ācɛ klla lɛ ācɛ piya ayikpo a!