1-2. Ɔhā nyá nɛ ɔcɛ gē jɔɔnyɛ nu igbihi nɛ ó lɛ ubatisim ya a?

 ALƆ gweeye nɛhi ɛ̄cī nɛ alɔ ya ubatisim klla je piya ɔcɛ éyi ipu apɔlɛ ku Ujehofa a. Ó wɛ ɔdā ojilima nɛhi ō lɛ ɛnɛɛnɛ ɛma ɛgɛnyā mla Ujehofa. Alɔ cɛ mla Udefidi nōo wɛ ɔcɛ éyi nōo ta ɔkpá ku Aíjē Kú Ɛ̄gbā nōo kahinii: ‘Eeye nɛhi yɔ lɛ ɔcɛ duuma nɛ awɔ Ujehofa fu, nɛ a klla pi bla iyi uwɔ ajaajɛ kóō yɔ ipu agblīihɔ-nɛ̄hi kú uwɔ a.’—Aíjē 65:4.

² Ɛdɔ anyɛ nɛ Ujehofa gē jɛga lɛ uwa kéē yɔ ipu agbliihɔ nɛhi ku nu a? Ɛgɛ nɛ alɔ ka ipu ikpɛyi ɛlā nōo gáā yɛ a, ó gē miya ō tubla ācɛ nōo mafu ka é dɔka ō lɛ ɛnɛɛnɛ ɛma mla ɔ a. (Ujɛ́m. 4:8) Ɔdaŋ ku a kwu iyi uwɔ i gwɛɛya lɛ Ujehofa klla lɛ ubatisim ya, a géē pi bla Ujehofa ajaajɛ ɔwɛ nōó lɛ ɛdɔ ŋ. A kē lɔfu lɔtuce kpɔcii ka igbihi nɛ a lɛ ubatisim ya a, ó géē ‘cē ɛhi mɛ́mla ɔhā kú nu klá uwɔ cabácabá.’—Umál. 3:10; Ujɛr. 17:​7, 8.

3. Uklɔ ocɛgbá nyá nɛ Ācɛ O Yɛce Ukraist nōo kwu iyi uwa i gwɛɛya klla lɛ ubatisim ya a lɛ ō ya a? (Ɔ̄cokóītá 5:​4, 5)

³ Ubatisim wɛ ō gbɔɔ ŋmaajɛ ku oyeeyi ku uwɔ ipu ɛ̄gbā ō gba ku Ujehofa a. Igbihi nɛ a lɛ ikpo ɔɔma fu a, a géē ya ɔdā duuma nɛ a ya gla ō lɛ okonu nɛ a ce lɛ Ujehofa a tu klla hayi kpaakpa lɛ ɔ, ɔdaŋ nɛ a kóō yɔ i má ojama amāŋ yɔ i má unwalu ɛyɛɛyɛyi naana. (Jé Ɔ̄cokóītá 5:​4, 5.) Abɔ a kwu piya éyi ku ayikpo ku Ujisɔsi ɛ ma, a géē yɛce ocabɔ ku Ujisɔsi mla ɔ́da ku nu lɔɔlɔhi. (Umát. 28:​19, 20; 1 Upít. 2:21) Ikpɛyi ɛlā oklɔcɛ nyā géē ta uwɔ abɔ ō ya ɔɔma.

 GƆBU KU A YƆ I YƐCE UJISƆSI ƆDAŊ NƐ A KÓŌ YƆ I MÁ UNWALU AMĀŊ OJAMA

4. Ō je ‘ɔcí ku owe’ a, ɔdi wɛ ɛyi nu lɛ ayikpo ku Ujisɔsi a? (Ulúku 9:23)

⁴ A hii gbɛla ka igbihi nɛ a lɛ ubatisim ya, ku á gáā lɛ unwalu duuma ŋ. Ku ɛlā ɔkwɛyi a, Ujisɔsi lɛ ɔ teyi peee ka ayikpo ku nu géē je ‘ɔcí ku owe.’ Ɔkwɛyi a wɛ kahinii, é géē ya ɛnyā “ɛ̄cī dóódu.” (Jé Ulúku 9:23.) Ujisɔsi ya i ka ka ayikpo ku nu géē yɔ i má owe ɛ̄cī doodu nɛɛ? Ehee. Ikɔkɔ ɔɔma, ó yɔ i ka ka naana nɛ Ɔwɔico géē hɔha ce uwa a, é géē má unwalu ōhī ipu oyeeyi ku uwa. Ōhī ku aunwalu néē lɔfu má a kóō géē lɔnɔ nɛhi.—2 Utím. 3:12.

5. Ɔhā nyá nɛ Ujisɔsi cokonu ka ācɛ nōo leyi gwu aɔdā ōhī bonu géē jɔɔnyɛ nu a?

⁵ Á jé ŋ, ācɛ apɔlɛ ku uwɔ lɔfu ya uwɔ ŋmo ɛ, amāŋ a leyi gwu ō lɛ aɔdā agbenu alɛwa bonu o ya ɛɛ ku a lɛ ɛlā ku Ajɔɔcɛ a ta aflɛyi ipu oyeeyi ku uwɔ. (Umát. 6:33) Ɔdaŋ ka ó lɛ a, le jé kpɔcii ka Ujehofa jé ɛjɛɛji ɔdā nɛ a ya lɛ ɔ a. (Uhíb. 6:10) Á jé ŋ, a lɔfu lɛ ɔkwɛyi ku ɛlā ku Ujisɔsi nyā má ɛ. Ó kahinii: “Ɔ̄cɛ dúúmā nōó habɔ̄ ɔlɛ́ nū tá ámāŋ ka ɛ́nɛ́ nū ámāŋ ka ádā nū ámāŋ ka ɛhɔ̄ kú nū tá ohígbū um mɛ́mla ohígbū ɔna kú ɔkōōlɔhi ō tá ā géē mīyɛ ɔ́ nwuné cabá eko nōo yɔ̄ nyā. Ó géē mīyɛ ayínɛ́ nɔ̄nyīlɔ, ayínɛ́ nɔ̄nyā, aɛ́nɛ́, ayí mɛ́mla ajɛ nōó ī bī le hɛ́hɔ̄, ɛga ofɛhɔ̄ fíyɛ́. É géē yá ɔ̄ ŋmó dúú, amáŋ ó klla géē mīyɛ oyēeyī opiyóó ipú ɛcɛ nōo géē wā ā.” (Umák. 10:​29, 30) Aɔhā nɛ a miyɛ ŋma ɛgiyi Ujehofa ɛ ma, fiyɛ ɔdā duuma nɛ a lɔfu leyi gwu uwa bonu a.—Aíjē 37:4.

6. Ɔdiya nɛ a géē cɛgbá ō ceyitikwu ō ya unwu ku “ɛgbá obɔ̄bí nɛ̄ ɔkpíyē ī dɔɔ̄kā ā” lé igbihi nɛ a lɛ ubatisim ya a?

⁶ A klla géē cɛgbá ō ceyitikwu lɔfu lɔfu ō ya unwu ku “ɛgbá obɔ̄bí nɛ̄ ɔkpíyē ī dɔɔ̄kā ā” lé igbihi nɛ a lɛ ubatisim ya a. (1 Ujɔ́n. 2:16) Ɛnyā lɛ a ohigbu ku a wɛ ɔcɛ nōó jila iyē ŋ kpɔ. Ekoohi, ɔtu lɔfu ya uwɔ ɛgɛ nōó ya ɔyikpo Upɔlu a. Ó ta ɔkpá kahinii: “Ipú ɔtū kú um íne kú Ɔwɔicō he um ɔtū. Amáŋ n gē má íne ɔhá ipú ɔkpíyē kú um, nōo gē nuunu tá íne kú ɔtū kú um ā, nōo kē je um yá alagbá kú ínoōbīya ā, nōo yɔ̄ ipú ɔkpíyē kú um ā.” (Uróm 7:​22, 23) Ɔtu lɔfu gbenyi gā uwɔ ohigbu ku a géē cɛgbá ō ceyitikwu lɔfu lɔfu ō ta unwu obɔbi. Amáŋ, ō gbɛla lɛyikwu okonu nɛ a ce lɛ Ujehofa eko nɛ a je iyi uwɔ gwɛɛya lɛ ɔ a, géē je ɔfu gā uwɔ ō ya ojama duuma nɛ a lɔfu má a lé. Ɔkwɛyi a wɛ ka eko duuma nɛ a yɔ i má ojama, okonu nɛ a ce lɛ Ujehofa a géē ta uwɔ abɔ. Ɛgɛnyá a?

7. Ɛgɛnyá nōo je iyi uwɔ gwɛɛya lɛ Ujehofa géē ta uwɔ abɔ ō hayi kpaakpa lɛ ɔ a?

⁷ Eko nɛ a je iyi uwɔ gwɛɛya lɛ Ujehofa a, a lɛ eyī gwo iyi uwɔ bonu. Ɛnyā wɛ ku a lɛ ɔtu ya ekponu ō ta ɔdā nōo gē he uwɔ ɔtu ō ya, amāŋ ō ya ōmiya ɛ̄nɛ̄ ó he Ujehofa ɔtu ŋ. (Umát. 16:24) Ohigbu ɛnyā, eko duuma nɛ a yɔ i má ojama amāŋ eko nɛ a yɔ ipu āhɔ̄ olɔnɔ, á gáā cɛgbá ō gbɛla lɛyikwu ɔdā nɛ a géē ya a gɛ ŋ. A géē lɛ ɔdā nɛ a cika ō ya a miya taajɛ gbɔbu ɛ, anu kē wɛ ō hayi kpaakpa lɛ Ujehofa a. A géē lɛ ɔtu ku uwɔ ya ekponu ō hayi kpaakpa lɛ Ujehofa gɔbu. A géē lɛbɛɛka Ujobu a. Naana nɛ ó má unwalu bɔbi bɔbi ipu oyeeyi ku nu a, ó lɛ ɔtu ku nu ya ekponu ka kahinii: ‘Ń gáā ma ō gba Ujehofa ɛ̄gbā gboogboo ŋ!’—Ujób. 27:5.

8. Ɛgɛnyá nōo gbɛla tu ɔkɔ nɛ a gba ō je iyi uwɔ gwɛɛya lɛ Ujehofa a lɔfu ta uwɔ abɔ ō ya ojama lé a?

⁸ Ŋma lɛ ō gbɛla tu ɔkɔ nɛ a gba eko nɛ a je iyi uwɔ gwɛɛya lɛ Ujehofa a, a géē lɛ ɔfu nɛ a cɛgbá ō ta ojama duuma. Ocabɔ mafu, a géē gbɔɔ ō lɛ ihɔtu lɛ ɔnyā ɔcɛ ɔhá amāŋ ɔba ɔcɛ ɔhá? Ehee a gáā ya lɛ a ŋ! A lɛ okonu ce lɛ Ujehofa gbɔbu ɛ, ku á gáā ya ɔdā ɛgɔɔma gboogboo ŋ. Ɔdaŋ ku á jɛga lɛ unwu obɔbi kóō jɛ ipu ɔtu ku uwɔ ŋ, a gáā cɛgbá ō ceyitikwu ō fu uwa ŋma ipu ɔtu ku uwɔ igbihaajɛ ŋ. A géē  “kwu” ŋma ō ‘ya ɔdā nɛ ācobɔ̄bíipú ā gē ya ā.’—Aíit. 4:​14, 15.

9. Ɛgɛnyá nōo gbɛla tu ɔkɔ nɛ a gba ō je iyi uwɔ gwɛɛya lɛ Ujehofa klla lɔfu ta uwɔ ō je ɛ̄gbā ō gba ku Ujehofa piya ɔdā aflɛyi ipu oyeeyi ku uwɔ a?

⁹ Ɔdaŋ ku a lɛ uklɔ éyi má nōó gáā jɛga gā uwɔ ō gā ōjila ku ujɔ eko doodu ŋ bɛɛ? A géē lɛ ɔdā nɛ a cika ō ya a jé ɛ. Gbɔbu ɛɛ ku a má uklɔ ɔɔma a, a le miya taajɛ gbɔbu ɛ ku á gáā miyɛ uklɔ duuma nōo géē ci uwɔ ŋma ō gā ōjila ku ujɔ eko doodu ŋ. Ohigbu ɛnyā, ó gáā ja uwɔ ma ō miyɛ uklɔ ɔɔma cɛɛ a klla gbɔɔ ō dɔka ɔwɛ ɔhá nɛ a géē lɛ ɛ̄gbā ō gba ku Ujehofa piya ɔdā aflɛyi ipu oyeeyi ku uwɔ ŋ. Ō gbɛla lɛyikwu ocabɔ ku Ujisɔsi lɔfu ta alɔ abɔ. Ó lɛ ɔtu ku nu ya ekponu ō ya ɔdā nōo géē cɛ lɛ ɔtu he Adā nu. Bɛɛka Ujisɔsi a, lɛ ɔtu ku uwɔ ya ekponu ō hayi kli ku a ta ɔdā duuma nɛ a jé ka ó géē biya Ɔwɔico nɛ a je iyi uwɔ gwɛɛya lɛ ɔ a ɔtu.—Umát. 4:10; Ujɔ́n. 8:29.

10. Ɛgɛnyá nɛ Ujehofa géē ta uwɔ abɔ ku a gɔbu yɔ i yɛce Ujisɔsi igbihi nɛ a lɛ ubatisim ya a?

¹⁰ Ɔdā nɛ a gē ya eko duuma nɛ a yɔ i má unwalu amāŋ yɔ i má ojama ō ya ɔdobɔbi a, géē mafu ɔdaŋ ku a lɛ ɔtu ku uwɔ ya ekponu ō yɛce Ujisɔsi. Abɔ a gē ya lɛ a, a lɔfu lɔtuce kpɔcii ka Ujehofa géē ta uwɔ abɔ. Ubáyíbu kahinii: ‘Ɔwɔicō gē lɛ okónu nōó ce ā tū. Ɔwɔicō í gáā cɛ ku ojama nōo fiyɛ aa ɔfu kóō ya aá ŋ́. Ó géē lɛ ɔfú tū aá iyē kú aá lɔtūlé, ó klla géē ma ɔwɛ nɛ̄ aá géē yɛ bɛ̄cɛ ā fú lɛ aá.’—1 Ukɔ́r. 10:13.

ƐGƐ NƐ A GÉĒ GƆBU YƆ I YƐCE UJISƆSI A

11. Ɔdi wɛ ɔwɛ éyi nōo lɔhi fiyɛ duu nɛ a lɔfu yɔ i yɛce Ujisɔsi igbihi nɛ a lɛ ubatisim ya a? (Má ifoto a.)

¹¹ Ujisɔsi gba Ujehofa ɛ̄gbā ŋma ɔtu ku nu duudu, ó kē yɔ kwu Ujehofa ajaajɛ o bu ipu ɔkɔ ō gba. (Ulúk. 6:12) Ku ɛlā ɔkwɛyi a, ɔwɛ éyi nōo lɔhi fiyɛ duu nɛ a lɔfu gɔbu yɔ i yɛce Ujisɔsi igbihi nɛ a lɛ ubatisim ya a, wɛ ō yɔ i ya  aɔdā nōo géē cɛ gā uwɔ pi bla Ujehofa ajaajɛ. Ubáyíbu kahinii: “Alɔ yɛ gɔbū kú alɔ yɛce ɛdɔ kú íne ékpó nɛ̄ alɔ yɛce jāā kwu abālɔbányā ā.” (Ufíl. 3:16) Ŋma eko teeko, a géē yɔ i po ɔ̄kā lɛyikwu ayinɛ alɔ nōo lɛ ɔ ya ōmiya ku uwa ō ya nwune ipu ɛ̄gbā ō gba ku uwa lɛ Ujehofa. Á jé ŋ, é lɔfu gā inɔkpa ku Ācɛ O Tɔɔna Ku Ajɔɔcɛ Ku Ɔwɔico ɛ, amāŋ le yɛ gā ɛga nɛ ɛgbá ku ācɛ o tɔɔna ɛlā Ɔwɔico yɔ fiyɛ a. Ɔdaŋ ku āhɔ̄ ku uwɔ jɛga gā uwɔ, ō ya ɔɔma wɛ ɛnɛɛnɛ ōmiya gā uwɔ duu. Ācɛ ɔlɛ Ujehofa gē lɛ ɔtu caca eko doodu ō dɔka ɔwɛ ɛyɛɛyɛyi néē lɔfu ya nwune lɛ ɔ fiyɛ. (Ācot. 16:9) Ó lɛ a, ɔdaŋ ku āhɔ̄ ku uwɔ i jɛga gā uwɔ ō ya lɛ a babanya ŋ bɛɛ? A hii gbɛla ku á cɛgbá bɛɛka ācɛ nōo yɔ i ya lɛ a ŋ. Ɔdā nōo cɛgbá fiyɛ duu a wɛ ku a gɔbu yɔ i lɔtu. (Umát. 10:22) A hii je mlanyi ku a gē ya ku ɔtu kóō he Ujehofa eko duuma nɛ a je ofiyɛ duu ku uwɔ lɛ ɔ, ɛgɛ nɛ āhɔ̄ ku uwɔ jɛga gā uwɔ lɛ a ŋ. Ɔɔma wɛ ɔwɛ ocɛgbá nɛhi nɛ a lɔfu yɔ i yɛce Ujisɔsi igbihi nɛ a lɛ ubatisim ya a.—Aíjē 26:1.

12-13. Ɔdi nɛ a lɔfu ya ɔdaŋ ka ɔtu caca ku uwɔ ipu ɛ̄gbā ō gba ku Ujehofa gbɔɔ ō waajɛ a? (1 Ācɛ Ukɔ́rīnti 9:​16, 17) (Má ikpati nyā nōo kahinii:  “Gɔbu Ku A Yɔ I Kwinya Ku Oyeeyi A.”)

¹² Ɔdi nɛ a cɛgbá ō ya, ɔdaŋ ka ɔtu gē ya uwɔ ku á gē gbɔɔkɔ ŋma ɔtu amāŋ gē jɔɔnyɛ uklɔ ku ɔna ō ta a ɛgɛ nɛ a tɛtɛ gē ya a ŋ ma? Ɔdaŋ ku á gē jɔɔnyɛ Ubáyíbu ō jé ku uwɔ ɛgɛ nɛ a tɛtɛ gē ya a ŋ bɛɛ? Ɔdaŋ ka ɔtu gē ya uwɔ lɛ a igbihi nɛ a lɛ ubatisim ya, a hii lɛ ɛlā ŋmɛyi ku á lɛ alelekwu ihɔ ku Ujehofa gɛ ŋ. Abɔ alɔ wɛ alɛɛcɛ nōó jila iyē ŋ ma, ɛgɛ nɛ ɔtu gē ya alɔ lɛ a lɔfu yɔ i piyabɔ ŋma eko teeko. Ɔdaŋ ka ɔtu caca ku uwɔ gbɔɔ ō waajɛ, gbɛla tu ocabɔ ku ɔyikpo Upɔlu. Naana nɛ ó ceyitikwu lɔfu lɔfu ō yɛce ocabɔ ku Ujisɔsi a, Upɔlu jé ka ekoohi ó gáā lɛ ɔtu caca ō ya ɔdā nɛ ó cɛgbá ō ya a ŋ. (Jé 1 Ācɛ Ukɔ́rīnti 9:​16, 17.) Ó kahinii: ‘Ɔdaŋ nɛ ń kóō je ŋma ɔtu ekponu ō yuklɔ nyā  ŋ, n klla gē ya ɔ ohígbū ka Ɔwɔicō abɔ̄yīnū je úklɔ́ nyā tū um abɔ̄ á.’ Abɔ ɔhá ku nu, Upɔlu lɛ ɔtu ku nu ya ekponu ō yuklɔ ku ɔna ō ta a gā ajaajɛ, naana nɛ ó gē lɛ ɔtu caca ō ya lɛ a ekoohi ŋ ma.

¹³ Ɔwɛ ekponu ɔɔma, a hii ya ōmiya oŋma lɛ ɛgɛ nɛ ɔtu gē ya uwɔ lɛ a foofunu ŋ. Lɛ ɔtu ku uwɔ ya ekponu ō ya ɔdā okpaakpa a eko doodu, ɔdaŋ nōó kóō he uwɔ ɔtu ō ya lɛ a ŋ naana. Ɔdaŋ ku a gɔbu yɔ i ya ɔdā okpaakpa a, eko kpii ɛgɛ nɛ ɔtu gē ya uwɔ lɛ a lɔfu piyabɔ. Jaa gbeeko ɔɔma, ō yɛce ōmiya ka oklɔcɛ ku abɔyi uwɔ ō ya, ɔkɔ ō gba, ō gā ōjila ku ujɔ eko doodu, mla uklɔ ku ɔna ō ta géē ta uwɔ abɔ ku a gɔbu yɔ i yɛce Ujisɔsi igbihi nɛ a lɛ ubatisim ya. Ɔdaŋ ka ayinɛ uwɔ ipu ujɔ lɛ ɛgɛ nɛ a yɔ i lɔtu abɔ a yɔ i gba Ujehofa ɛ̄gbā a má, é géē lɛ ɔtu ō ta kwu ɔtu.—1 Utes. 5:11.

‘GƆBU KU A YƆ I JILA IYĪ UWƆ MÁ . . . YƆ I JÁ IYĪ UWƆ MÁ’

14. Ɔdi nɛ a cika ō yɔ i jila má ojigogo a, ɔdi kē ya a? (2 Ācɛ Ukɔ́rīnti 13:5)

¹⁴ Igbihi nɛ a lɛ ubatisim ya, ó cɛgbá nɛhi ku a yɔ i jila uwɔ má ojigogo. (Jé 2 Ācɛ Ukɔ́rīnti 13:5.) Ŋma eko teeko, bēē jila uce ō ya ku uwɔ má ku a má ɔ ɔdaŋ ku a gē gbɔɔkɔ eko doodu, gē jé klla gē klɔcɛ ku Ubáyíbu, gē gā ōjila ku ujɔ, klla gē yuklɔ ku ɔna ō ta. Ceyitikwu ku a dɔka ɔwɛ ɛyɛɛyɛyi nɛ a lɔfu jɔɔnyɛ klla lɛ itene fiyɛ ŋma ō ya aɔdā nōo ba nyā a. Ocabɔ mafu, da iyi uwɔ aɔka nōo ba nyā kahinii: ‘N lɔfu je aɛlā ō nwu okpɔcii ku Ubáyíbu a ta ācɛ ɔhá eyī peee gla? Ó lɛ ɔwɛ duuma nɛ um lɔfu ya ku um jɔɔnyɛ uklɔ ku ɔna ō ta ku um fiyɛ? Ɔdi mla ɔdi nɛ um gē gbɔɔkɔ lɛyikwu uwa a, é mafu ku um gbolo ce Ujehofa duudu? N gē gā ōjila ku ujɔ eko doodu? Ɛgɛnyá nɛ um lɔfu ya lɔhi fiyɛ ɔwɛ nɛ um gē jahɔ ipu ōjila ku ujɔ klla gē ta ohi a?’

15-16. Ɔdi nɛ a nwu ŋma ɔ̄kā ku ɔyinɛ alɔ éyi lɛyikwu ō ya ojama lé a?

¹⁵ Ó klla cɛgbá nɛhi ku a jé ɛga nɛ a gē ya lɔhi ŋ ma. Ɔyinɛ alɔ nɔnyilɔ éyi nōo lé ka u Robert a ka ɔdā nɛ ó má ipu oyeeyi nōo jɛyi ɛlā nyā teyi peee a. Ó kahinii: “Ó lɛ uklɔ éyi nɛ um gē ya eko nɛ um lɛbɛɛka ihayi ofu a. Ɛ̄cī éyi igbihi nɛ um le gwu ŋma uklɔ a, ɔcɛnya éyi nɛ um gē yuklɔ tɔha mla ɔ a le da um ku um wa ɔlɛ nu. ‘Ó ka ka alɔ géē yɔ foofu alɔ, ka alɔ klla géē gwuta mla iyi alɔ.’ Eko aflɛyi a, ń je ohi okpaakpa a lɛ ɔ boobu ŋ, amáŋ igbihaajɛ n gáā ka ka ehee, klla lɛ ɔdā nōo ya a ta ɔ eyī peee.” Robert lɛ ojama ɔɔma yale, ɔɔma kē wɛ ɔdā olɔhi ibi. Amáŋ igbihaajɛ, ó gáā lɛ ɛlá gbo tu ɔdā nōo ya a, ó kē gáā le má ka ó lɛ ɔwɛ olɔhi fiyɛ nɛ ó gē yɛ i yɛce ɛlā ɔɔma. Ó kahinii: “Ń hayi  kli ō ta ojama ɔɔma boobu ɛgɛ nɛ Ujosɛfu ya ɛgiyi ɔnyā Upɔtifa a ŋ. (Ohút. 39:​7-9) Ku ɛlā ɔkwɛyi a, ó le hɛ um idaago ɛgɛ nōó lɔnɔ ta um nɛhi ō ta ojama ɔɔma a. Ɔdā nōo ya ɔɔma ta um abɔ ō má ku um cɛgbá ō ya ku ɛma nɛ um lɛ mla Ujehofa a kóō lɔfu fiyɛ.”

¹⁶ A lɔfu lɛ itene nɛhi ɔdaŋ ku a gē jila uce ō ya ku uwɔ má ɛgɛ nɛ u Robert ya a. Ɔdaŋ ku a kóō lɛ ojama éyi yale naana, da iyi uwɔ ɔka kahinii: ‘Ó je um eko gbɔbu ɛɛ ku um ta ojama ɔɔma?’ Ɔdaŋ ku a má ka ó lɛ ɛga éyi nɛ a cika ō ya lɔhi fiyɛ, a hii cɛ lɛ ɔtu gbenyi gā uwɔ ŋ. Ikɔkɔ ɔɔma, ɔtu kóō he uwɔ ku a lɛ ɛga éyi nɛ a gē ya lɔhi ŋ ma jé ɛ. Gbɔɔkɔ lɛ Ujehofa lɛyikwu ɛga nɛ á gē ya lɔhi ŋ ma, cɛɛ ku a ya aɔdā nōo géē ya ku a lɛ ɔtu caca fiyɛ ō lɛyitaajɛ lɛ ɔ.—Aíjē 139:​23, 24.

17. Ɛgɛnyá nɛ iye ku Ujehofa tɛɛma kwu ɔdā nōo ya ipu ɔ̄kā ku Robert a?

¹⁷ Ó lɛ ɔdā ɔhá nɛ alɔ klla nwu ŋma ɔ̄kā ku Robert a. Ó gɔbu ka kahinii: “Igbihi nɛ um ta ojama ŋma ɛgiyi ɔcɛnya nɛ um gē yuklɔ tɔha mla ɔ a, ó kahinii, ‘A lɛ ojama a yale!’ N da ɔ ɔka ɔdā nōo wɛyi ɛlā ku nu a. Ó da um ka ɔya ku nu éyi nōo wɛ Ɔcɛ Ocijali Ku Ujehofa gbɔbu a, ka ka ɛjɛɛji aɛdrɔ nōo wɛ Ācɛ Ocijali Ku Ujehofa a gē ya ɔdobɔbi tayinu ɔdaŋ ka é lɛ ɛga ɔɔma lɛ. Ohigbu ɛnyā, ó lɛ da ɔya ku nu a kóō gáā lɛ um jama ɔdaŋ ku um gē ya lɛ a. Abɔ um gáā lɛ ɛnyā jé a, n gweeye nɛhi ka ɔdā nɛ um ya a bi ojilima gē lɛ iye ku Ujehofa.”

18. Ɔdi nɛ a lɛ ɔtu ku uwɔ ya ekponu ō ya igbihi nɛ a lɛ ubatisim ya a? (Má ikpati nyā nōo kahinii: “ Aikpɛyi Ɛlā Ɛpa Nɛ A Lɔfu Jɔɔnyɛ Nu A.”)

¹⁸ Eko nɛ a kwu iyi uwɔ i gwɛɛya lɛ Ujehofa klla lɛ ubatisim ya, a géē mafu ku a dɔka ō ya ku iye ku Ujehofa kóō le ya tiihɔ ɛgɛ duuma nɛ āhɔ̄ a kóō géē lɛ a. A kē lɔfu lɔtuce kpɔcii ka Ujehofa jé ɛjɛɛji unwalu nɛ a yɔ i má mla ojama ɛyɛɛyɛyi nɛ a yɔ i yale a. Ó géē hɔha ce oceyitikwu ku uwɔ ō hayi kpaakpa lɛ ɔ. Lɔtuce lɔfu lɔfu ka o bu ipu alelekwu ihɔ ku nu, Ujehofa géē je ɔfu ō bi le lɔtu unwalu mla ō ya ojama lé a gā uwɔ. (Ulúk. 11:​11-13) Mla otabɔ ku Ujehofa, ó géē tɔɔtɛ gā uwɔ ō yɔ i yɛce Ujisɔsi igbihi nɛ a lɛ ubatisim ya.