Gerempung Saksi-Saksi Jehovah kemaya hari tu berengkah kenyau ari ujung abad ke-19. Maya nya, seraban mit Nembiak Bup Kudus ke diau semak Pittsburgh, Pennsylvania, ba Amerika Serikat, berengkah mansik Bup Kudus enggau teratur. Sida mandingka ajar ari gerija enggau ajar ari Bup Kudus ke bendar. Sida berengkah ngeluarka utai ke dipansik sida nengah bup, surat khabar, enggau majalah ke dikumbai The Watchtower—Announcing Jehovah’s Kingdom.

 Charles Taze Russell seiku ari raban Nembiak Bup Kudus nya. Taja pan Russell ke ngulu pengawa ngajar Bup Kudus maya nya sereta nyadi editor ti keterubah The Watchtower, tang iya ukai orang ke ngepunka pengarap ti baru. Juluk ati Russell enggau bala Nembiak Bup Kudus iya nya deka madahka ajar ari Jesus sereta nitihka pengawa gempuru Kristian ba abad ti keterubah. Ketegal Jesus ke ngepunka pengarap Kristian, nya alai kami mega ngumbai iya ke ngepunka gerempung kami.—Kolosi 1:18-20.