Baka Ni Saksi-Saksi Jehovah Dilatih?

TEBAH

Saksi-Saksi Jehovah seruran nerima latih ari segi semua aspek pengidup Kristian, nyengkaum pengawa nginjil sida. Pengawa nginjil ke diasuh Jesus kereja semua murid iya, iya nya nginjil enggau ngajar orang pasal Berita Manah pasal Perintah Petara. (Matthew 24:14; 28:19, 20) Kami nerima latih nya ba gempuru ninting minggu enggau konvensyen sereta gempuru besai tiap taun. Saksi-Saksi Jehovah ke bisi tanggung pengawa dalam gerempung kami nerima mayuh agi latih ba beberapa iti sekula Bup Kudus ti spesial.

Dalam artikel tu

Nama latih ke diterima Saksi-Saksi Jehovah?

Gempuru. Ninting minggu, kami datai ngagai dua iti gempuru ba endur kami nyembah Petara, ke dikumbai Palan Gempuru. Siti gempuru kesuah iya dipejalaika tengan minggu, lalu siti da ba ujung minggu. Barang sapa pan ulih datai, lalu nadai ngumpul duit pupu.

Gempuru tengan minggu. Kami nerima latih ngambika ngemansangka chara kami macha, chara berandau enggau orang, bejaku ba mua orang mayuh, sereta chara nginjil enggau ngajar orang. Latih nya dipejalaika nengah cheramah, randau, lakun, enggau video. Latih tu nulung kami bekesan agi lebuh bekunsika Berita Manah ari Bup Kudus enggau orang bukai, sereta ngajar orang ke bisi minat ba Bup Kudus. Semua orang ke datai ngagai gempuru bulih penguntung ari latih tu. Kelimpah ari nya, gempuru kami ngeringka agi pengarap enggau pengerindu kami ngagai Petara, sereta pengerindu kami ngagai sida ke sepengarap enggau kami.
Gempuru ujung minggu. Gempuru tu bisi dua begian, lalu berengkah enggau cheramah Bup Kudus ke orang mayuh. Begian kedua gempuru tu iya nya berandau pasal siti artikel ari majalah Menara Jaga edisi dikena belajar. a Artikel nya berandau sereta nerangka pasal topik enggau prinsip Bup Kudus ti nulung kami enda ngira ba pengawa nginjil tauka ba pengidup besehari-hari.

Gempuru besai sehari enggau konvensyen. Ninting taun, bala penginjil ari beberapa iti raban gempuru begelumu ba tiga iti gempuru besai. Gempuru ti ngerinduka ati tu bepelasarka sesiti tema ari Bup Kudus lalu nyengkaum cheramah, lakun, interbiu enggau video. Sama baka gempuru ninting minggu, gempuru besai sehari enggau konvensyen ngemansangka agi penemu Bup Kudus kami sereta nulung kami ngemansangka pengelandik ba pengawa nusui Berita Manah. Pia mega, semua orang dikelaluka datai lalu nadai ngumpul duit pupu.

Sekula belajarka Bup Kudus ke Saksi-Saksi Jehovah

Ngambika dilatih enggau silik agi, sekeda Saksi-Saksi Jehovah dikangau ngagai beberapa iti sekula Bup Kudus. Nama sekula nya? Nama tuju sekula nya lalu ni pengelama iya dipejalaika? Lalu sapa ke ulih enggau?

Sekula Pengerintis

Tuju: Kena ngelatih bala penginjil penuh jam, ke dikumbai pengerintis, b ngambika landik agi ba pengawa nginjil enggau ngajar orang. Kursus nya nyengkaum begian randau, lakun, cheramah enggau begian belatih.
Timpuh: Enam hari.
Sapa ke enggau: Sida ke udah nembuka setaun nyadi pengerintis dibai enggau sekula tu. Sida ke udah lama ngerintis ke enda enggau sekula nya dalam lima taun ti udah, engka dikangau baru.

Sekula Penginjil Perintah Petara

Tuju: Kena meri latih ti nyemetak agi ngagai penginjil penuh jam ke bepeneleba. Bala pemelajar ngemansangka pengelandik nginjil enggau ngajar, sereta belajarka sekeda topik Bup Kudus enggau dalam agi. Mayuh ari sida ke udah graduet dikangau ngagai endur ke begunaka mayuh agi penginjil.
Timpuh: Dua bulan.
Sapa ke enggau: Bala pengerintis ulih minta enggau enti sida nyapai sekeda syarat, sereta ulih pindah ngagai dini-dini endur ke begunaka bantu.

Sekula ke Tuai Gempuru

Tuju: Kena nulung bala tuai gempuru c ngereja tanggung pengawa sida ba raban gempuru, baka ngajar enggau ngibun raban gempuru, sereta ngenalamka agi pengerindu sida ke Petara enggau orang ke sepengarap.—1 Peter 5:2, 3.
Timpuh: Lima hari.
Sapa ke enggau: Bala tuai gempuru ke baru dipilih, sereta bala tuai gempuru ti bepeneleba ke enda enggau sekula nya pengelama lima taun, dikangau ke sekula tu.

Sekula ke Tuai ti Ngabas enggau Bini Sida

Tuju: Kena ngelatih bala tuai ti ngabas d (ke bejalai ari raban gempuru siti ngagai raban gempuru siti) kena nulung sida bejalaika tanggungjawap sida enggau manah agi. (1 Timoti 5:17) Kursus tu mega nulung sida enggau bini sida ngenalamka agi penemu Bup Kudus sida.
Timpuh: Satu bulan.
Sapa ke enggau: Bala tuai ti ngabas ke baru enggau bini sida dikangau ke sekula tu pengudah sida udah nyadi tuai ti ngabas pengelama setaun. Pengudah nya, sida iya dikangau baru enggau sekula tu kira-kira lima taun sekali.

Sekula Bup Kudus ke Menyadi ti Dipilih

Tuju: Kena nulung bala tuai gempuru enggau penulung gempuru e nyaga tanggung pengawa sida ba raban gempuru nitihka situasi ti benung nyadi sereta utai ti diguna. (2 Timoti 3:1) Sekula tu diatur tiap dua tauka tiga taun.
Timpuh: Enda tentu; kesuah iya, satu hari.
Sapa ke enggau: Bala tuai ti ngabas, tuai gempuru enggau penulung gempuru.

Sekula Bethel

Tuju: Kena nulung bala sida ke gawa ba Bethel f mujur ba pengawa sida, sereta ngenalamka agi pengerindu sida ngagai Petara enggau pangan diri.
Timpuh: Lima hari setengah.
Sapa ke enggau: Orang ke baru berengkah gawa ba Bethel dikangau datai enggau sekula tu. Sida ke udah lama gawa ba Bethel ke enda enggau sekula nya dalam lima taun ti udah, engka dikangau baru.

Sekula Gilead

Tuju: Kena nulung bala pemelajar ngenalamka agi pengerindu enggau penemu pasal Bup Kudus lalu nulung sida ngena utai ke dipelajar sida ba pengidup. (1 Tesalonika 2:13) Bala lelaki enggau indu ti tegap ba pengarap ke enggau sekula Gilead nyadi lebih beguna agi ngagai gerempung Jehovah, sereta ulih nyukung pengawa nginjil di serata dunya. Sida ke udah graduet sekula tu deka diasuh gawa ba pampang opis tauka nginjil penuh jam, sekalika ba menua sida empu tauka ba menua bukai.
Timpuh: Lima bulan.
Sapa ke enggau: Pampang opis ngangauka sekeda penginjil penuh jam ke dipilih minta enggau sekula tu. Sekula tu dipejalaika ba Palan Belajar Watchtower di Patterson, New York, Amerika Serikat.

Sekula ke Raban Komiti Pampang Opis enggau Bini Sida

Tuju: Kena ngelatih bala ari raban Komiti Pampang Opis g ngambika ulih ngemataka pengawa ke dikereja ba pampang opis nya, sereta pengawa ke dikereja Saksi-Saksi Jehovah ba menua ke dipegai pampang opis nya.
Timpuh: Dua bulan.
Sapa ke enggau: Indu Opis Saksi-Saksi Jehovah mai sekeda ari raban Komiti Pampang Opis ke dipilih, sereta bini sida, ngagai sekula tu ke dipejalaika ba Palan Belajar Watchtower di Patterson, New York.

Latih ti diberi ngagai bala Saksi bepelasarka nama?

Latih ke diterima Saksi-Saksi Jehovah endang bepelasarka Bup Kudus. Kami pechaya, Bup Kudus bepun ari Petara sereta ngundan ajar ti pemadu manah, ke ulih dikena ba semua aspek pengidup Kristian.—2 Timoti 3:16, 17.

Kati Saksi-Saksi Jehovah patut bebayar ke latih ke diterima sida?

Enda. Latih ke disediaka nya pechuma. Pengawa ke dikereja Saksi-Saksi Jehovah disukung ari duit pemeri.—2 Korint 9:7.

a Bup Kudus enggau perengka belajarka Bup Kudus, nyengkaum video, bisi ba laman web kami, jw.org.

b Pengerintis nya siku Saksi ke udah dibaptisa, lelaki tauka indu, ke nguji nyapai juluk ati deka ngulihka penyampau jam ke udah ditetapka tiap bulan ba pengawa nginjil.

c Bala tuai gempuru nya bala Saksi ti lelaki ke tegap ba pengarap, ke ngajar bepelasarka Bup Kudus sereta ngibun bala nembiak Jehovah enggau chara nulung sereta meransang sida. Bala tuai gempuru nadai nerima gaji ke pengawa sida.

d Tuai ti ngabas nya siku penginjil penuh jam. Ninting minggu, iya ngabas siti raban gempuru dalam pelilih menua ke dikemataka iya. Iya meransang bala menyadi Kristian iya nengah cheramah Bup Kudus, sereta nginjil begulai enggau sida.

e Bala penulung gempuru ngereja mayuh pengawa ti praktikal kena nulung bala menyadi Kristian sida. Enggau tulung tu, bala tuai gempuru ulih fokus ngagai pengawa ngajar enggau ngibun bala menyadi.

f Bethel nya nama ti diberi ngagai pampang opis Saksi-Saksi Jehovah. Sida ke gawa penuh jam ba dia nyukung pengawa Saksi-Saksi Jehovah ba endur ke dipegai pampang opis nya.

g Komiti Pampang Opis selalu bisi tiga tauka lebih lelaki ke tegap ba pengarap.

Baka ni Saksi-Saksi Jehovah bulih penguntung ari latih ke diterima sida?

“Aku orang ke pemalu. Nya kebuah aku ngasai tusah amat deka bejaku enggau orang ke enda dikelala aku pasal Bup Kudus. Tang latih ke diterima aku ari gempuru tengan minggu nulung aku lebih andalka diri sereta ngemansangka agi pengelandik ngajar orang. Diatu, aku mega senang agi bejaku enggau orang bukai, enda ngira ba raban gempuru aku tauka ba endur aku gawa.”—Natasha, Amerika Serikat.
“Sekula Penginjil Perintah Petara udah nulung aku neladan sifat Jehovah, lalu ngasuh aku lebih agi bepengerindu, sabar sereta manah ati enggau orang bukai. Asil iya, aku ngasaika diri udah nyadi orang ti manah agi, sereta manah agi enggau bala kaban enggau jiran aku. Ari sekula tu mega, aku udah belajar chara mansik topik Bup Kudus, lalu ulih nerangka ajar Bup Kudus enggau chara ti negu ati orang bukai.”—Stephen, Nigeria.
“Sekula ke Tuai Gempuru nulung aku ngemansangka sifat pemaruh ati, ngambika aku ulih nyadi tuai gempuru ti manah agi. Cheramah ba sekula nya nulung aku sedar, aku patut bebendar nunda teladan Jesus.”—Luca, Itali.
“Sekula Bup Kudus ke Menyadi ti Dipilih nulung aku nemu, aku patut nyadi orang ke manah ati sereta senang enggau berandau, ngambika orang bukai berasai nyamai mansang ngagai aku. Aku mega belajar, lebuh aku ngereja pengawa aku ngagai orang bukai, aku patut ngereja nya laban aku rinduka sida, ukai semina laban nya utai ti patut dikereja aku.”—Samuel, UK.
“Sekula Gilead nulung kami meresa diri ngena Bup Kudus, ke disemaka baka siti cheremin. (James 1:22-25) Enggau tu, kami ulih meda nama ubah ke patut digaga kami ba personaliti kami, sereta ba pengawa ke dikereja kami ngagai Jehovah. Kami mega belajar, kami patut lebih agi berunding pasal orang bukai, ukai diri empu aja. Lalu kami patut ngawakka pengerindu nyadika motivasi kami ba semua utai ke dikereja.”—Elnathan enggau Princess, Pilipina.