Seiku ari Saksi-Saksi Jehovah di Guatemala ke benama Marta belajarka jaku Kekchi ngambika bekunsika pesan Bup Kudus enggau orang ke ngena bansa jaku nya. Bisi sekali iya tepedaka seiku lelaki mupuk ari sepital. Ari gamal iya, Marta nyangka iya orang Kekchi ari sebuah kampung ba endur ke bebukit ti amat jarang dilawa Saksi-Saksi Jehovah. Taja pan Marta bedau amat pandai jaku Kekchi, iya mansang ngagai lelaki nya lalu berandau enggau iya ngena leka jaku Kekchi ke ditemu iya.

 Marta nanya lelaki nya enti iya bisi minat belajarka Bup Kudus. Lelaki nya enggau gaga ati nerima, tang iya madahka Marta, iya nadai duit mayar ke pelajar nya. Marta lalu nerangka, Saksi-Saksi Jehovah ngajar Bup Kudus enggau pechuma. Marta pan madah, semua ruang bilik iya mega ulih enggau belajarka Bup Kudus ngena talipun. Lelaki nya besetuju. Laban laki nya pandai macha jaku Sepanyol, Marta meri iya Salin Dunya Baru Bup Kudus dalam jaku Sepanyol. Iya mega meri lelaki nya siti bup ke dikena belajarka Bup Kudus ke betajuk Nama Utai ti Bendar Diajar Bup Kudus? dalam jaku Kekchi. Seminggu udah nya, lelaki nya, bini iya enggau dua iku anak sida berengkah belajarka Bup Kudus enggau Marta ngena talipun. Sida sebilik lalu belajar dua kali seminggu. Marta madahka, “Ketegal aku enda entu pandai jaku Kekchi, kami belajar ngena jaku Sepanyol. Dua iku anak nya meretika jaku Sepanyol, lalu laki nya nerangka randau kami ngagai jaku Kekchi ke bini iya.”

 Lelaki nya udah nyadi paderi ba gerija iya. Iya berengkah ngajar utai ke dipelajar iya ngagai orang ke sama gerija enggau iya. Sida rindu enggau utai ke didinga sida lalu nanya iya, ari ni iya belajarka penemu baru tu. Lebuh lelaki nya madah iya belajar Bup Kudus enggau Marta, belubah-lubah sida mega deka enggau. Nyau kelama, 15 iku orang datai ninting minggu kena belajarka Bup Kudus enggau Marta ngena talipun, lalu sida ngengkahka mikrofon semak talipun nya ngambika semua orang ulih ninga.

 Marta madahka utai ke nyadi ngagai bala tuai gempuru ba eklisia iya, lalu seiku ari sida mansang ngagai kampung alai pemelajar nya diau. Iya mai sida semua datai ningaka cheramah ke deka diberi Tuai ti Ngabas a ba endur bukai. Tang endur nya jauh amat ari sida. Ngambika ulih kin, sida patut deriba kerita pengelama sejam lalu bedarat dua jam. Bala pemelajar nya setuju, lalu 17 iku ari sida datai gempuru.

 Beberapa minggu udah nya, Tuai ti Ngabas nya enggau sekeda Saksi bukai datai begulai enggau bala pemelajar nya pengelama empat hari. Tiap pagi sida meda video pasal Bup Kudus dalam jaku Kekchi ari jw.org, lalu belajarka brosur Sapa Orang ti Ngereja Peneka Jehovah Kemaya Hari Tu? Mua ke lemai hari, sida meda video ari Berita JW. Tuai ti Ngabas nya pan ngaga atur ngambika genap iku sida deka diajar seiku-seiku.

 Pengelama empat hari nya, bala Saksi ke datai, mega nginjil ngagai kampung alai orang Kekchi diau ke semak dia, lalu mai orang datai ke gempuru ti spesial. Ba gempuru nya, semua 47 iku orang ke datai diberi peluang belajarka Bup Kudus. Sebelas iti ruang bilik nerima peluang nya.

 Beberapa bulan udah nya, bala tuai gempuru ngaga atur ngambika gempuru deka dipejalaika ninting minggu ba kampung keterubah nya tadi. Ke diatu, kira-kira 40 iku orang bejarit datai gempuru, lalu lebuh pengawa Ngingatka Pemati Jesus diintu dia, sida semua chukup gaga ati ngelaluka 91 iku orang datai.

 Marta ingat pasal pun cherita tu, lalu ngenang, “Aku beterima kasih ngagai Jehovah. Kekadang aku ngasaika diri enda entu ulih ngereja mayuh utai. Tang kitai semua sempama perengkah ke dikena Jehovah. Iya nemu ati orang ke diau ba kampung nya, lalu Iya narit ati sida ngena nembiak Iya. Jehovah amat sayauka sida.”