Bob benung mai kerita pengelaju 100 kilometer sejam lebuh hari chelap ba menua Alberta, Kanada. Maya nya, enda memukai tayar belakang ba sepiak kiba pechah, tang Bob enda nemu. Iya terus mai kerita penyauh 5 kilometer nuju rumah iya.

 Ba siti surat ke ditulis iya ngagai Palan Gempuru Saksi-Saksi Jehovah ke ba menua nya, Bob nerangka utai ke nyadi sepengudah nya. Ku iya madahka: “Lima iku nembiak mansang semak sepiak kerita aku lalu nurunka cheremin kerita. Sida madah ngagai aku pasal tayar kerita aku ke udah pechah. Kami ngetuka kerita ba tisi jalai lalu sida madahka diri deka nulung nukar tayar kerita aku. Maya nya, aku enda nemu sekalika bisi tayar bukai tauka perengka kena ngaduka tayar ba dalam kerita aku. Aku duduk ba tisi jalai dalam kerusi roda aku. Sida ngagai begian baruh kerita lalu tetemuka tayar bukai ke bisi dia, pia mega enggau perengka kena ngaduka tayar. Udah nya, sida nukar tayar nya. Hari chelap amat, lalu seleju pan benung nurun. Sida lima begari enggau manah tang sida nulung nukar tayar nya ngambika aku ulih terus mai kerita aku. Aku enda ulih ngaga tu kediri empu.

 “Terima kasih ngagai lima iku nembiak Saksi Jehovah ke nulung aku. Sida bisi ba endur nya laban sida benung nginjil. Ulah sida sejalai enggau utai ke dipadah sida lebuh nginjil. Enti sida nadai nulung aku, aku tentu balat tusah, lalu aku amat beterima kasih ke pengawa sida. Enda aku nyangka bisi ga melikat ti biak ba jalai sehari nya!”